ހިންނަވަރު ދާއިރާގެ ޓިކެޓް ޖީހާން ކާމިޔާބުކޮށްފި
ހިންނަވަރު ދާއިރާގެ ޓިކެޓް ޖީހާން ކާމިޔާބުކޮށްފައި ވަނީ 404 ވޯޓުން
ހިންނަވަރު ދާއިރާގެ ޓިކެޓް ކާމިޔަބުކުރެއްވި ޖީހާން މަހްމޫދު އާއި އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު
މިހާރުގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް، ފާއިތުވި 25 ވަރަކަށް އަހަރު ދިފާއުކުރެއްވި ހިންނަވަރު ދާއިރާގެ ގޮނޑިއަށް އެމްޑީޕީން ވާދަކުރާނެ ކެންޑިޑޭޓަކަށް ބޮޑު ތަފާތަކުން ޖީހާން މަހްމޫދު، ދޭލިޔާގެ ޅ. ހިންނަވަރު ކާމިޔާބު ކޮށްފިއެވެ.
"ރަންގޮނޑީ"ގެ ގޮތުގައި މަޝްހޫރުވެފައިވާ ހިންނަވަރު ދާއިރާގެ ޓިކެޓް ޖީހާން ކާމިޔާބުކޮށްފައި ވަނީ 404 ވޯޓުންނެވެ. އިބޫގެ އާއިލާ މެންބަރެއް ކަމަށްވާ ޖީހާންއާ އެންމެ ގާތުން ވާދަކޮށްފައިވާ ހިންނަވަރުގެ ޒުވާނެއް ކަމަށްވާ އާދަމް މުހައްމަދު، އާވާޒް، ޅ. ހިންވަރުއެވެ. އޭނާ އަށް 302 ވޯޓު ލިބިފައި ވެއެވެ. ތިން ވަނ އަށް ވާދަކުރީ އަހްމަދު ޝަރީފް އަބްދުއްރަހްމާން ޔޫސުފް (ހަންޓަރ އަހްމަދު) އަޅިވިލާގެ ޅ. ހިންނަވަރުއެވެ. އޭނާ އަށް ލިބިފައި ވަނީ 291 ވޯޓެވެ. ހަތަރު ކެންޑިޑޭޓުން ވާދަކުރި ފޯރިގަދަ މި ޕްރައިމަރީގައި އެންމެ މަދުން ވޯޓު ލިބުނީ ރާއްޖެ ޓީވީގެ ނިއުސް ޑިރެކްޓަރަކަށް ހުންނެވުމަށް ފަހު ޕްރައިމަރީގައި ވާދަކުރެއްވި ހުޝާމް މުހައްމަދު (ހިރިގާ ހުޝާމް) ހިރިގާ ޅ. ހިންނަވަރުއެވެ. އޭނާ އަށް ލިބިފައި ވަނީ 180 ވޯޓެވެ.
ހިންނަވަރު ދާއިރާގެ ގޮނޑި ކާމިޔާބުކޮށްފައިވާ ޖީހާންއަކީ އެޗްއާރްސީއެމްގެ މެމްބަރުކަން ކޮށްފައިވާ ފަރާތެކެއެވެ. އެޗްއާރްސީއެމްގެ މެމްބަރުކަން ކުރެއްވިއިރު، އިންސާނީ ހައްގުތައް ރައްކާތެރިކޮށް ދިނުމުގައި ޖީހާން ވަނީ ގިނަ މަސައްކަތްތަކެއް ކޮށްފައެވެ. އަދި މިހާރު ޕީއެޗްޑީ އަށް ކިޔަވާ ވިދާޅުވަމުން ގެންދަވާ ބޭފުޅެކެވެ.
ހިންނަވަރުގައި ޕްރައިމަރީއެއް ބޭއްވުނު މިއީ ފުރަތަމަ ފަހަރެވެ. ފާއިތުވި އަހަރުތަކުގައި ޕްރައިމަރީގައި ރައީސް ސޯލިހުއާ ވާދަކުރައްވަން އެއްވެސް ކެންޑިޑޭޓަކު ނިކުމެފައެއް ނުވެއެވެ.
