ފަތުރުވެރިން ބަހައްޓާ ހުރިހާ ތަނެއް އިންސްޕެކްޓް ކުރަނީ
17 ޖެނުއަރީ 2019 | ބުރާސްފަތި 09:19އިންސްޕެކްޝަނަކީ ރައީސް އަންގަވައިގެން ކުރައްވާ ކަމެއް
ހުޅުމާލޭގައި އެންމެ ފުޅާ ދާއިރާއެއްގައި ގެސްޓް ހައުސް ހިންގާ ޔޫއައި ބްރޭންޑްގެ ދަށުން ހިންގާ ޔޫއައި އިން ހޮޓެލް: ގެސްޓުން ބައިތިއްބާ ތަންތަނުގެ އިންސްޕެކްޝަންތަކެއް ހެދުމަށް ވަނީ ނިންމާފައި
ރާއްޖޭގައި ފަތުރުވެރިން ބަހައްޓާ ހުރިހާ ތަންތަން އިންސްޕެކްޓް ކުރަން ނިންމާފައިވާ ކަމަށް ޓުއަރިޒަމް މިނިސްޓްރީން ބުނެފިއެވެ.
ޓުއަރިޒަމް މިނިސްޓްރީގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓުއަރިޒަމް މިނިސްޓަރ އަލީ ވަހީދު ވިދާޅުވީ ފަތުވެރިން ބަހައްޓާ ހުރިހާ ތަންތަން ހައެއް ނުވަތަ އަށް މަސް ތެރޭގައި އިންސްޕެކްޓް ކުރަން ނިންމާފައިވާ ކަމަށެވެ.
މިނިސްޓަރު ވިދާޅުވީ އިންސްޕެކްޝަނެއް ކުރިއަށް ގެންދަން ނިންމީ، ފަތުރުވެރިކަމުގެ އިންޑަސްޓްރީގައި ވަރަށް ގާތް ގާތުގައި ނުރައްކާތެރި ހާދިސާތަކެއް ހިގަމުންދާތީވެ، ރާއްޖޭގައި ފަތުރުވެރިކަން ބަހައްޓާ ތަންތަނަކީ އެކަށީގެންވާ ރައްކާތެރި މާހައުލެއް ލިބޭ ފަދަ ތަންތަންތޯ ބެލުމަށް ކަމަށެވެ.
އިންސްޕެކްޝަންތައް ކުރިއަށް ދާނީ ފުލުހުންނާއި، އެމްއެންޑީއެފްއާ އެކު ކަމަށް މިނިސްޓަރ ވިދާޅުވިއެވެ.
"މި އިންސްޕެކްޝަންތައް އަޅުގަނޑުމެން ކުރާނީ އެމްއެންޑީއެފް އާއި ފުލުހުންގެ ވެސް އެހީތެރިކަމާ އެކު. މިއީ ރައީސް ސޯލިހުގެ ހާއްސަ އެންގުމުގެ ދަށުން އަޅުގަނޑުމެން ފަށާ އިންސްޕެކްޝަންތަކެއް،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މީގެ ކުރިން ވެސް އިންސްޕެކްޝަންތަކެއް ކުރެވިފައި ހުރި ކަމަށާއި، ނަމަވެސް އެއީ އެކަށީގެންވާ މިންވަރަށް ބެލިގެން ރަނގަޅަށް ކުރެވިފައި ހުރި އިސްޕެކްޝަންތަކެއް ނޫން ކަމަށެވެ. ނަމަވެސް މިނިސްޓްރީގެ އަމާޒަކީ މިހާރު މި ކުރެވޭ އިންސްޕެކްޝަންތަކަކީ ރަނގަޅަށް ބެލިގެން އޭގެ ހެޔޮ ފައިދާ އިންޑަސްޓްރީ އަށް ކުރާނެ ފަދަ ގޮތަކަށް ނިންމާލެވޭ އިންސްޕެކްޝަނަކަށް ވެގެން ދިއުން ކަމަށެވެ.
އެކި ހާދިސާތަކުގައި މި އަހަރުގެ މިހާތަނަށް ނުވަ ފަތުރުވެރިއަކު މަރުވެފައިވާއިރު، ފަތުވެރިކަމުގެ ދާއިރާގައި މަސައްކަތް ކުރާ ތިން މުވައްޒިފަކު މަރުވެ، އަލިފާނުގެ ތިން ހާދިސާއެއް ވަނީ ހިގާފައެވެ.
ނިމިދިޔަ އަހަރަކީ ފަތުވެރިކަމުގެ ދާއިރާއަށް ކާމިޔާބު އަހަރެއް ކަމަށް މިނިސްޓަރު ވަނީ ވިދާޅުވެފައެވެ. އެ ގޮތުން ފާއިތުވި އަހަރު 5.8 އިންސައްތައިގެ ކުރިއެރުމެއް ފަތުރުވެރިކަމުގެ ދާއިރާއަށް ލިބިފައިވާއިރު، 1.2 މިލިޔަން ފަތުރުވެރިން ރާއްޖެ އައިސްފައި ވެއެވެ. އެއީ ރިކޯރޑް އަދަދެއް ކަމަށް މިނިސްޓަރު ވަނީ ވިދާޅުވެފައެވެ.
މިދިޔަ އަހަރު ރާއްޖެއައިސްފައިވާ ފަތުރުވެރިންގެ 48.9 އިންސައްތަ ފަތުރުވެރިންނަކީ ޔޫރަޕްގެ ފަތުރުވެރިންނެވެ. އެއް ގައުމަކުން އެންމެ ގިނަ ފަތުރުވެރިން އައިސްފައި ވަނީ ޗައިނާއިންނެވެ. 2018 ވަނަ އަހަރު 44860 އެނދު އިތުރުވެފައިވާ ކަމަށް މިނިސްޓަރު ވިދާޅުވިއެވެ.
