ލަޔަން އެއަރގެ ފްލައިޓްގެ ބްލެކް ބޮކްސް ވޮެއިސް ރިކޯޑަރ ފެނިއްޖެ

މިދިޔަ އަހަރުގެ އޮކްޓޯބަރ މަހު ޖަކާޓާގެ އައްސޭރި ފަށަށް ވެއްޓުނު ލަޔަން އެއަރގެ ފްލައިޓްގެ ކަޅުފޮށީގެ ވޮއިސް ރެކޯޑަރ ފެނިއްޖެ ކަމަށް އިންޑޮނީޝިއާގެ އޮފިޝަލުން ބުނެފިއެވެ.

އޮކްޓޯބަރ މަހުގެ 29 ވަަނަ ދުވަހު އެ އެއަރލައިންގެ ފްލައިޓް ޖޭޓީ 610 ޖަކާޓާ އިން ފުރިތާ އިރުކޮޅެއްގެ ތެރޭގައި ޖާވާ ކަނޑަށް ވެއްޓުނު ހާދިސާގައި ބޯޓް ވެއްޓުނު އިރު ބޯޯޓުގައި ތިބި 189 މީހުން ވަނީ މަރުވެފައެވެ.

ބޯޓް ވެއްޓިފައި ވަނީ އަނބުރާ ޖެއްސުމުގެ ހުއްދައަށް ޕައިލެޓް އެދިފައިވަނިކޮށް ސިގްނަލް ކެނޑުމަށް ފަހުއެވެ.

ތަހުގީގުކުރާ ފަރާތްތަކުން ބުނެފައި ވަނީ ބޯޓުގެ ޓެކްނިކަލް މައްސަލަތެއް ދިމާވެފައިވާ ކަމަށެވެ.

ބޯޓުގެ މައިގަނޑު އަދި ފެނިފައެއް ނުވެއެވެ.

އިންޑޮނީޝިއާގެ ޓްރާންސްޕޯޓް ސޭފްޓީ ކޮމިޓީގެ ޑެޕިއުޓީ ޗީފް ހަރްޔޯ ސަޓްމިކޯ ވިދާޅުވި ކަމަށް ރޮއިޓަރސްގައި ބުނެފައި ވަނީ "ކޮކްޕިޓް ވޮއިސް ރެކޯޑަރ ފެނިއްޖެ" ކަމަށާއި "ނަމަވެސް ފެނުނީ ކޮންތާކުންކަން ނޭނގޭ" ކަމަށެވެ.

އޭއެފްޕީގައި ސަޓްމިކޯ ވިދާޅުވެފައި ވަނީ ރެކޯޑަރ ފެނިފައި ވަނީ ޖަކާޓާގެ ގަޑިން ގާތްގަނޑަކަށް 9 ޖަހާކަންހާއިރު ކަމަށެވެ.

އިންޑޮނީޝިއާގެ ކަނޑުގެ ސިފައިންގެ ތަރުޖަމާނު އަގުންގ ނުގުރޮހޯ ރޮއިޓަރސްގައި ވިދާޅުވެފައި ވަނީ ރިކޯޑަރ ފެނިފައި ވަނީ ކަނޑުގެ އަށް މީޓަރ އަޑިން ބިންގަޑުގައި އޮއްވައި ކަމެށެވެ.

އޭނާ ވިދާޅުވީ ރެކޯޑަރގެ ސިގްނަލް ކުޑަކުޑަކޮށް ލިބެމުންދާތާ ދުވަސްތަކެއް ވެއްޖެ ކަމަށެވެ.

ރެކޯޑަރގައި ކޫރުން ހުރިކަން ޝައްކެއް ވެސް ނެތް ކަމަށާއި ނަމަވެސް ލިބިފައި ވަނީ ކޮން ގެއްލުމެއްކަން ކަށަވަރު ނުވާ ކަމަށެވެ.

ބޯޓު ވެއްޓެން ދިމާވި ސަބަބު ޕައިލެޓާއި ގްރައުންޑް ކޮންޓްރޯލްއާ ދެމެދު އެންމެ ފަހުން ކުރެވިފައިވާ މުއާމަލާތްތަކުގެ އަލީގައި ތަހުގީގުކުރާ ފަރާތްތަކަށް ދެނެގަނެވޭނެއެވެ.