އުތުރު ކޮރެއާ އާއިއެކު ވިޔަފާރިކުރާ އިތުރު އުޅަނދުތަކެއް ބްލެކްލިސްޓް ކޮށްފި
އުތުރު ކޮރެއާއަށް ތެޔޮ ވިއްކުމަކީ މަނާކަމެއް
އުތުރު ކޮރެއާގެ ބަނދަރެއް
ބައިނަލްއަޤްވާމީ ޤާނޫނުތަކާއި ޚިލާފަށް އަދި އދ އިން އަޅާފައިވާ ދަތިކުރުމުގެ ފިޔަވަޅުތަކަށް ބެލުމެއް ނެތި އުތުރު ކޮރެއާއާއިއެކު ވިޔަފާރި ކުރި މައްސަލައިގައި 27 ބޯޓަކާއި 21 ޝިޕިންގ ކުންފުންޏެއް އދ އިން ބްލެކްލިސްޓް ކޮށްފިއެވެ.
އދގެ ސަލާމަތީ މަޖިލީހުން މި އުޅަނދުތަކާއި ކުންފުނިތައް ބްލެކްލިސްޓްކުރީ އެމެރިކާގެ އިސްނެގުމަކަށެވެ. މި ކުންފުނިތަކާއި އުޅަނދުތަކަކީ އުތުރު ކޮރެއާއަށް ވަގަށް ތެލާއި ބޯޓުދެއްޔާއި އެނޫން ވެސް ތަކެތި ސަޕްލައިކޮށްދޭކަން ފަޅާއަރާފައިވާ ކުންފުނިތަކާއި އުޅަނދުތަކެވެ.
އދ އިން ބްލެކްލިސްޓް ކުރި އުޅަނދުތަކަށް ބައިނަލްއަޤްވާމީ ޕޯޓްތަކުގައި ބަނދަރުކުރުން ބައިނަލްއަޤްވާމީ ޤާނޫނުތަކުގެ ދަށުން މަނާވާނެއެވެ. އަދި ބްލެކްލިސްޓްކުރި ކުންފުނިތަކުގެ މުދާ ފްރީޒްކުރުމުގެ ބާރު އދގެ މެމްބަރު ޤައުމުތަކަށް ލިބިގެންދާނެއެވެ.
މިއީ އދ އިން މިގޮތަށް މިހާ ގިނަ ކުންފުންޏާއި އުޅަނދުތަކާއި ދެކޮޅަށް ފިޔަވަޅު އެޅި ފުރަތަމަ ފަހަރެވެ.
އދ އާއި އެމެރިކާ އަދި އެހެން ޤައުމުތަކުން އުތުރު ކޮރެއާ އާއި ދެކޮޅަށް ދަތިކުރުމުގެ ފިޔަވަޅު އަޅާފައިވާ އެޤައުމުން ހިންގާ ނިއުކްލިއަރ ޕްރޮގްރާމްގެ ސަބަބުންނާއި އުތުރު ކޮރެއާގެ ސަރުކާރުން އިންސާނީ ހައްޤުތަކަށް އަރައިގަންނަ މައްސަލައިގައެވެ.
2006 ވަނަ އަހަރުން ފެށިގެން އުތުރު ކޮރެއާއާއި ދެކޮޅަށް ބައިނަލްއަޤްވާމީ ދަތިކުރުމުގެ ފިޔަވަޅު އަޅައި، އެޤައުމަށް ތެލާއި އެހެނިހެން ތަކެތި އެތެރެކުރުން ހުއްޓުވުމަށް މަސައްކަތްތަކެއް ކުރެވުނު ނަމަވެސް، ބައެއް ކުންފުނިތަކުން ބައިނަލްއަޤްވާމީ ޤާނޫނުތަކާއި ޚިލާފަށް އުތުރު ކޮރެއާއަށް މިތަކެތި ސަޕްލައިކޮށްދޭކަން ވަނީ ފަޅާއަރައެވެ. ދާދިފަހުން ވެސް ދިވެހިރާއްޖޭގެ ދިދަ ނަގާފައިވާ އުޅަނދަކުން އުތުރު ކޮރެއާގެ އުޅަނދަކާއި މިފަދަ މަނާ މުޢާމަލާތްތަކެއް ކުރާކަން ޖަޕާނުގެ އަސްކަރިއްޔާއިން ވަނީ ހާމަކޮށްފައެވެ.
މިފަދަ މައްސަލަތަކުގައި ޝާމިލްވާ ޤައުމުތަކާއި، ކުންފުނިތަކާއި އަދި އުޅަނދުތަކާއި ދެކޮޅަށް ވެސް އދ އިން ދަނީ ފިޔަވަޅު އަޅަމުންނެވެ.
މިފަހަރު ފިޔަވަޅު އެޅި ކުންފުނިތަކުގެ ތެރެއިން 16 ކުންފުންޏަކީ އުތުރު ކޮރެއާގެ ކުންފުނިތަކެވެ. އަދި އޭގެ އިތުރުން ހޮންކޮންގަށް ނިސްބަތްވާ 5 ކުންފުންޏަކާއި، ޗައިނާއަށް ނިސްބަތްވާ 2 ކުންފުންޏެއްގެ އިތުރުން ޓައިވާނުގެ 2 ކުންފުންޏަކާއި، ޕެނަމާ ކުންފުންޏަކާއި ސިންގަޕޫރު ކުންފުންޏަކާއި ދެކޮޅަށް އދއިން ވަނީ ފިޔަވަޅު އަޅާފައެވެ.
