ރައީސް ސޯލިހްގެ ނަސޭހަތް: އަގުބޮޑު މެޑެލް ކަމުގައި ހަދަންވީ ރިވެތި އަދަބާއި އިސްލާމީ އަހްލާގު
13 ޖެނުއަރީ 2019 | އާދީއްތަ 10:53ދަރިވަރުންގެ ފޭރާންކަމުގައި ހަދަންވާނީ ތެދުވެރިކަމާއި އަމާނާތްތެރިކަން
ރައީސް އިބްރާހިމް މުހަމްއަމަދު ސޯލިޙް
ދިރާސީ އާ އަހަރާއެކު ރައީސް އިބްރާހިމް މުހައްމަދު ސޯލިހް ދަރިވަރުންނަށް އަގުހުރި ނަސޭހަތްތަކެއް ދެއްވައިފި އެވެ.
ހުޅުމާލޭ ހުރަވީ ސްކޫލް ހުޅުވުމަށް އާދީއްތަ ދުވަހު ބޭއްވި ރަސްމިއްޔާތުގައި ރައީސް ސޯލިހް ވިދާޅުވީ ތަޢުލީމީ މަރުޙަލާގައި ދަރިވަރުން ހާސިލުކުރާ، އެންމެ އަގުބޮޑު މެޑެލްކަމުގައި ހަދަންވާނީ ރިވެތި އަދަބުތަކާއި އިސްލާމީ އަޚްލާޤު ކަމަށާއި ދަރިވަރުންގެ ފޭރާންކަމުގައި ހަދަންވާނީ ތެދުވެރިކަމާއި އަމާނާތްތެރިކަން ކަމަށެވެ.
"އެއީ ތިޔަ ކުދީންގެ ދިރިއުޅުން އުޖާލާކޮށްދޭނެ ކަންތައްތަކެއް،" އެ މަނިކުފާނު ވިދާޅުވި އެވެ.
މިއަދުގެ ދަރިވަރުންނަކީ މި ޤައުމުގެ ކުރިމަގުގެ ލީޑަރުން ކަމަށާއި މި ގައުމުގެ އެންމެ އަގުބޮޑު ރައުސްމާލު ކަމަށް އަބަދު ވެސް ދަރިވަރުން ހަނދާނުގައި ބަހައްޓަން ވާނެ ކަމަށް ރައީސް ސޯލިހް ވދިާޅުވި އެވެ. ޤައުމުގެ މިޞްރާބު ސީދާކުރާނެ ލީޑަރުން ކަމުގައި މިހާރުގެ ދަރިވަރުންނަށް ވެވޭނީ، ދިރިއުޅުމުގެ ކޮންމެ ކަމެއްގައިވެސް ނުރަނގަޅު ގޮތް ދޫކޮށްލައި، ރަނގަޅު ގޮތުގައި ހިފައިގެން ކަމަށާއި ސްކޫލް މަރުޙަލާގައިވެސް އަމިއްލަ ފައިދާއަށްވުރެ ބޮޑަށް އާންމު މަޞްލަޙަތަށް އިސްކަން ދީގެން ކަމަށް އެ މަނިކުފާނު ވިދާޅުވި އެވެ. އަދި ހަމަޔާއި އިންޞާފަށް ލޯބިކޮށް، ތަފާތު ވިސްނުމުގެ ކުދީންނާއެކު އުޅެން ދަސްކޮށްގެން ކަމަށް ވެސް އެ މަނިކުފާނު ވިދާޅުވި އެވެ.
"ދިމާވާ ކޮންމެ ކަމެއްވެސް ޙައްލު ކުރަންވާނީ، ޞުލްޙަވެރިކަމާއެކު ކަމަށާއި، އެއް ކުއްޖަކު އަނެއް ކުއްޖަކަށް، އިޙްތިރާމު ކުރުމަކީ، ވަރަށް މުހިންމު ކަމެއްކަން އަޅުގަނޑު ފާހަގަކުރަން. އެކުވެރީންނާވެސް އަދި ޓީޗަރުންނާމެދުވެސް ޢަމަލުކުރަންވާނީ އޯގާތެރިކަމާއެކު،" ރައީސް ސޯލިހް ވިދާޅުވި އެވެ.
ތަޢުލީމީ މަރުޙަލާގައި ލިބޭ އެންމެ ބޮޑު ހަކަތައަކަށް ވާނީ، މައިންބަފައިންގެ ހެޔޮ ނަސޭހަތާއި، ޓީޗަރުންގެ ފުރިހަމަ އިރުޝާދު ކަމަށާއި ސްކޫލްގެ އެހެން ދަރިވަރުންނަކީ، ޢާއިލާގެ މެމްބަރުން ކަމުގައި ބަލައިގަނެ، އެކުދީންނަށް އެހީތެރިވެދީ، ގުޅުން ދެމެހެއްޓުމަކީ، މަދުރަސީ ޙަޔާތުން ހޯދަންޖެހޭ އެންމެ މުހިންމު ތަރުބިއްޔަތެއް ކަމަށް ރައީސް ސޯލިހް ވިދާޅުވި އެވެ.
"ތަޢުލީމީ ޙަޔާތުގެ މި މަރުޙަލާގައި، ތިޔަކުދިން އަމާޒު ހިފަންވީ، ހަމައެކަނި ތަޢުލީމީ އަރުތަތަކެއް ހާސިލުކުރާކަށް ނޫން. ތިޔަ ކުދިން މިއަދު އުނގެނޭ ޢިލްމުގެ ބޭނުން، މާދަމާ ހިފޭނީވެސް، އަދި ދިރިއުޅުމުގެ އައްސޭރިތަކަށް ފޯރާނީވެސް، ސަލާމަތް ޞިއްޙަތެއްގައި ތިބެގެން. ހަށިގަނޑުގެ ހެދިބޮޑުވުމާ އެއްވަރަށް، ބުއްދިވެސް ތަރައްޤީވެގެން،" އެ މަނިކުފާނު ވިދާޅުވި އެވެ.
ސްކޫލުން ބޭރުގައިވެސް ޢިލްމު އުނގެނުމަށް ލޯބިކުރަންވާނެ ކަމަށާއި "ފޮތް ކިޔުމާއި ދިރާސާކުރަން ދަސްކުރަންވާނެ" ކަމަށާއި "ޓީޗަރުންނާ ގިނަގިނައިން ސުވާލުކޮށް، ކަންކަން އޮޅުންފިލުވުމަކީ، ތަޢުލީމީ ޙަޔާތުގެ އެންމެ މުހިންމު އެއް ކަންތައް" ކަމަށް ވެސް ރައީސް ސޯލިހް ވިދާޅުވި އެވެ.
ދަރިވަރުންގެ އިތުރުން ޓީޗަރުންނަށް ވެސް ރައީސް ސޯލިހް ވަނީ ނަސޭހަތްތެރިވެވަޑައިގެންފަ އެވެ.
"އަޅުގަނޑު މިއަދު ރާއްޖޭގެ ހުރިހާ މުދައްރިސުންގެ އަރިހުންވެސް އެދޭ ވަރަށްބޮޑު އެދުމެއް އެބައޮތް. އެއީ ދަރިވަރުންގެ ޙައްޤުތައް ކަށަވަރު ކޮށްދިނުމާއެކު، އެ ޙައްޤުތަކާ އެކުގައިވާ ޒިންމާތައް، އެކުދީންނަށް ދަސްކޮށްދެވޭނެ މާޙައުލެއް ޤާއިމުކޮށްދެއްވުން،" އެ މަނިކުފާނު ވިދާޅުވި އެވެ.
އުނގެނުމަކީ އެންމެން އެކުގައި ކުރާ ކަމަކަށް ހަދަންވާނެކަން ފާހަގަ ކުރައްވައި ރައީސް ސޯލިހް ވިދާޅުވީ އެއީ ވަކި ޢުމުރެއްގެ،ވަކި ޖިންސެއްގެ، ވަކި މިންތިއެއްގެ މެދުގައި ހިނގާ ކަމެއްނޫން ކަމަށެވެ.
"ޢިލްމާއި، ހުނަރާއި، އުނގެނުން އެންމެ ފުންމިނުގައި ކަށަވަރު ކުރެވޭނީ، އެންމެން އެކުގައި މުޖްތަމަޢުގެ ހުރިހާ އެންމެން، ޢުމުރުން ދުވަސްވީ މީހުންނާއި،އަންހެނުންނާއި ފިރިހެނުންނާއި، އެކި ޤައުމުތަކުގެ މީހުންގެ ބައިވެރިވުމާއެކު. ކިޔަވައިދިނުމާއި އުނގެނުމުގެ މާޙައުލު މިގޮތަށް ބައްޓަންކުރުމުން، ހަމްދަރުދީވާން އެނގޭ، އެކަކު އަނެކަކަށް އިޙްތިރާމު ކުރަން އެނގޭ ޖީލެއް ބިނާކޮށްދެވޭނެ" އެ މަނިކުފާނު ނަސޭހަތްތެރިވެވަޑައިގެންނެވި އެވެ.
