މާޗް 10 ގެ ފަހުން ބްރިޖްގައި ހެލްޓްމެޓް އެޅުން މަޖްބޫރުކޮށްފި
10 ޖެނުއަރީ 2019 | ބުރާސްފަތި 09:21ހެލްމެޓް ނާޅާ ދަތުރުކުރާ ފަރާތްތަކަށް ފިޔަވަޅު އަޅާނެ
ޓްރާންސްޕޯޓް މިނިސްޓްރީން ބޭއްވި ނޫސްވެރިންގެ ބައްދަލުވުމުގެ ތެރެއިން
ސިނަމާލެ ބްރިޖުން ދަތުރުކުރާ އިރު ހެލްމެޓް އަޅަން މަޖުބޫރުކުރަން ޓްރާންސްޕޯޓް އޮތޯރިޓީން ނިންމައިފިއެވެ.
ޓްރާންސްޕޯޓް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އައިޝަތު ނަހުލާ ވިދާޅުވީ ބްރިޖުން ދަތުރުކުރާއިރު މާޗް މަހުގެ 10 ވަނަ ދުވަހުން ފެށިގެން ހެލްމެޓް އަޅަން މަޖުބޫރުވާނެ ކަމަށެވެ. އަދި އެ ތާރީހުން ފެށިގެން ހެލްމެޓް ނާޅައި، ބްރިޖް ހުރަސްކޮށް ދަތުރުކުރާ ނަމަ ޓްރެފިކް ޕޮލިހުން އެ ފަރާތްތައް ހުއްޓުވާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މާޗް 10 ވަނަ ދުވަހުން ފެށިގެން ހެލްމެޓް ނާޅާ ބްރިޖް ހުރަސްކޮށް ދަތުރުކުރާ ފަރާތްތަކާ މެދު ގާނޫނީ ގޮތުން ފިޔަވަޅު އަޅަމުންދާނެ ކަމަށެވެ. މި ބަދަލަކީ އާއްމުންގެ ސަލާމަތާއި ރައްކާތެރި ކަމަށް ވިސްނާފައި ގެންނެވި ބަދަލެއް ކަމަށް މިނިސްޓަރ ފާހަގަކުރެއްވިއެވެ.
"ބްރިޖު މަތީގައި ހިނގަމުންދާ ނުރައްކާތެރި އެކްސިޑެންޓްތައް ގިނަވެފައިވާއިރު، ބޮލަށް އަނިޔާވެ ފުރާނައަށް ނުރައްކާވުން ހުއްޓުވަން އޮތް ހައްލެއް ކަމަށް ފެންނަ ހައްލު،" މިނިސްޓަރ ވިދާޅުވިއެވެ.
ބްރިޖް މަތީގައި ނުރައްކާތެރި ގިނަ އެކްސިޑެންޓްތައް ހިނގަމުންދާއިރު، އެ އެކްސިޑެންޓްތަކުގައި ބޮލަށް ލިބޭ އަނިޔާތައް ފާހަގަކޮށްލެވެއެވެ.
