މުޒާހަރާ ކުރިޔަސް މަގާމު ދޫކޮށް ނުލާނަން:ސޫދާންގެ ރައީސް
10 ޖެނުއަރީ 2019 | ބުރާސްފަތި 02:28އަލްބަޝީރުވަނީ ވޯޓު ފޮށިން އޭނާ ބަލިކުރުމަށް ގޮވާލައި އިދިކޮޅު ފަރާތްތަކަށް ގޮންޖައްސަވާފަ
އުމަރު އަލް ބަޝީރު
މަގާމުން ދުރަށް ވަޑައިނުގަންނަވާނެކަމަށް ސޫދާންގެ ރައީސް އުމަރު އަލް ބަޝީރު ސަޕޯޓަރުންނަށް ވައުދުވެވަޑައިގެންފިއެވެ.
އުމަރު އަލް ބަޝީރު މަގާމުން ދުރަށް ވަޑައިގަތުމަށް ގޮވާލައި ބޮޑު އެއްވުމެއް ކުރިއަށް ދިޔައިރު، އެ މަނިކުފާނަށް ތާއިދުކުރާ ފަރާތްތަކުން ބޭއްވި އެއްވުމެއްގައި ވިދާޅުވީ މަގާމުން ދުރަށް ވަޑައިނުގަންނަވާނެ ކަމަށެވެ.
ސަރުކާރާ ދެކޮޅަށް މިދިޔަ މަހު ފެށި ވަރުގަދަ މުޒާހަރާތަކާއެެކު ގޮންޖެހުންތައް ކުރިމަތިވެފައިވާ އުމަރު އަލް ބަޝީރަށް ތާއީދުކޮށް ސޫދާނުގެ ވެރިރަށުގެ މަގުތަކަށް ބުދަ ދުވަހު ވަނީ އެތައްހާސް ބަޔަކު އެއްވެފައެެވެ.
1989 ވަނަ އަހަރު ގެނައި ބަޣާވާތަކުން ވެރިކަމަށް ވަޑައިގެން ހުންނެވި އުމަރު އަލް ބަޝީރަށް ތާއީދުކޮށް އެއްވުން ބާއްވާފައި މިވަނީ ވާދަވެރި ފަރާތްތަކުން އޮމްޑަރމަންގައި ބަޝީރާ ދެކޮޅަށް އިތުރު މުޒާހަރާތަކެއް ފަށާފައިވަނިކޮށެވެ.
އޭއެފްޕީގެ މުރާސިލު ބުނެފައިވާ ގޮތުގައި ބަޝީރަށް ތާއީދުކޮށް ޚަރްތޫމްގެ ގްރީން ޔާޑުގައި ބޭއްވި އެއްވުން ކުރިޔަށްދިޔައިރު އެތައް ސަތޭކަ ރަޔަޓް ފުލުހުންނާއި، ސިފައިންނާއި، ސެކިއުރިޓީ އެޖެންޓުން ސަލާމަތީ ކަންކަންބަލަހައްޓަމުން ގެންދިޔަވެ. އޭގެ ތެެރެއިން ބައެއް މީހުންނަށް މެޝިން ބަޑި ހިފައިގެންތިބި ކަމަށްވެސް ބުނެފައިވެއެވެ.
ކާކީ ގަމީހާއި ފަޓްލޫނެއް ތުރުކުރައްވައިގެން ހިނިތުންވެފައި ހުންނެވި ބަޝީރު ވަނީ އަތް ޕުޅުގައި އޮތް ދަނޑިބުރިން ހަނާއަޅުއްވައި އެއްވެފައި ތިބި މީހުންނަށް ސަލާމް ކުރައްވާފައެވެ. އެކި ސަރަހައްދުތަކުން ބަސްދަތުރުކޮށް އެއްވުމަށް ގޮސްތިބި މީހުންވަނީ ދިދަވިހުރުވައި ކަށިގަޑުފުމެފައެވެ.
އުމަރު އަލްބަޝީރުވަނީ ވޯޓު ފޮށިން އޭނާ ބަލިކުރުމަށް ގޮވާލައި އިދިކޮޅު ފަރާތްތަކަށް ގޮންޖައްސަވާފައެވެ.
