ކުދި ސިޔާސީ ޕާޓީތައް އުވާލީ ބޮޑެތި މަހުޖަނުންގެ ނުފޫޒުން ކަމަށް، ނަވައިނަވައި މޫވްމެންޓްގައި އިސްކޮށް ހަރަކާތްތެރިވާ އަހްމަދު މުހައްމަދު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި އަހްމަދު މުހައްމަދު ވިދާޅުވީ ކުދި ސިޔާސީ ޕާޓީތަކަކީ ޑިމޮކްރެޓިކް ވެރިކަމެއްގައި ވަރަށް މުހިންމު ބައެއް ކަމަށާއި ރާއްޖޭގައި ކުރިން ކުދި ސިޔާސީ ޕާޓީތަކަށް ޖާގަ އޮތް ކަމަށެވެ. އެފަދަ ޕާޓީތަކުގެ ހިޔާލުތަކާއި ފިކުރުތައް ވެސް ވަރަށް މުހިންމު ކަމަށް އޭނާ ވިދާޅުވި އެވެ.
މިހާރު ވުޖޫދަށް އަންނަމުންދާ ޕާޓީތަކާއި މިހާރު ހުރި ބޮޑެތި ޕާޓީ ތަކާއި ތަފާތެއް ނެތްކަމަށާއި މިހާރު ވެސް ޕާޓީތައް އުފެދެމުން ދަނީ މަހުޖަނުންގެ ބާރުން މަހުޖަނުން އިތުރަށް މުއްސަނދި ވުމަށާއި، އެ ފަރާތްތަކަށް ހިމާޔަތް ހޯދުމަށް ކަމަށް އަހްމަދު މުހައްމަދު ވިދާޅުވި އެވެ.
ޕްރޮގުރާމުގައި ނަވައިނަވައިގައި ހަރަކާތްތެރިވާ ރެޝީނާ ވިދަޅުވީ މިހާރުގެ ސިޔާސީ ޕާޓީތަކުން މަސަތްކަތް ކުރަނީ މުއްސަނދި މީހާ އަށް އުތުރު ހައްގުތަކެއް ހޯދައިދިނުމަށް ކަމަށާއި ނަވާނަވައިގެ މަގްސަދަކީ ރައްޔިތުންގެ ހަައްގުތައް ހޯދުންކަމަށެވެ.
ނަވާނަވައިގެ މާނަ ހިއްސާކުރަމުން ބުނެފައިވަނީ އޭގެ މާނަޔަކީ 99 ޕަސެންޓް ރައްޔިތުން ކަމަށާއި ބާކީ އޮތް އެއް ޕަސެންޓަކީ މުއްސަނދި މީހުންކަމަށެވެ . އަދި އެ 1 ޕަސެންޓްގެ މީހުންނަކީ ރައްޔިތުން ކޮންޓްރޯލް ކުރާ ބައެއް ކަމަށާއި ނަވާނަވައިން އެންމެ މުހިންމު ކަމެއްގެ ގޮތުގައި ކުރިޔަށް ގެންދާނެ އެއް ކަމަކީ 99 ޕަސެންޓް މީހުންގެ އަޑު ފޯރުކޮށްދިނުން ކަމަށެވެ.
