ސައުދީގައި ވަރިވީކަން އަންގައިދޭން އަންހެނުންގެ ފޯނަށް މެސެޖެއް!
7 ޖެނުއަރީ 2019 | ހޯމަ 15:44މިކަން ކުރަން ނިންމާފައިވަނީ ސައުދީގައި އަނބިމީހާ ގާތު ނުބުނެ ވަރިވުން ހުއްޓުވުމުގެ ގޮތުން
ސައުދީ އަންހެނުންތަކެއް
ސައުދީގައި އަނބިމީހާ ގާތު ނުބުނެ ވަރިވުން ހުއްޓުމަކަށް ގެނައުމުގެ ގޮތުން، ވަރިވިކަން އަންގައިދިނުމަށް ފޯނަށް މެސެޖެއް ފޮނުވަން އެ ގައުމުގެ ކޯޓުތަކުން ނިންމައިފިއެވެ.
އެ ގައުމުގެ ޖަސްޓިސް މިނިސްޓްރީ އިން ކުރި ޓްވީޓެއްގައި ބުނެފައި ވަނީ އެސްއެމްއެސްގެ ޒަރިއްޔާ އިން އަންހެނުންނަށް ވަރި ކައިވެނީގެ ހާލަަތަށް އަންނަ ބަދަލުތައް ލިބެމުންދާނެ ކަމަށެވެ.
މިކަމާ ބެހޭ ގޮތުން އެ މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، މިއީ އަންހެނުންގެ ހައްގުތައް ހިމާޔަތްކުރުމަށާއި، ޓެކްނޮލޮޖީގެ ޒަރިއްޔާ އިން ދެވޭ ހިދުމަތްތައް އިތުރަށް ފުޅާކުރުމުގެ ނިޔަތުގައި ކުރަން ފެށި ކަމެއް ކަމަށެވެ.
މި މެސެޖުގައި ވަރީގެ ސެޓްފިކެޓް ނަންބަރާއި ވަރީގެ ލިޔެކިޔުންތައް ލިބޭނެ ކޯޓުގެ ނަން ހިމެނޭނެއެވެ. އަދި މި މައުލޫމާތުތައް ވެބްސައިޓެއްގެ ޒަރިއްޔާއިން ވެސް ބެލޭނެ އިންތިޒާމް ވަނީ ހަމަޖައްސާފައެވެ.
މިއީ ސައުދީ ވަލީއަހުދު މުހައްމަދު ބިން ސަލްމާންގެ 2030 ގެ ތަސައްވުރުގެ ދަށުން ގެންނަން ނިންމާފައިވާ އިޖްތިމާއީ އަދި އިގްތިސާދީ ބަދަލުތަކުގެ ތެރޭގައި ހިމެނޭ ކަމެކެވެ. މި ބަދަލުތަކުގެ ދަށުން 2017 ވަނަ އަހަރުގެ ފަހުކޮޅު ސައުދީ ސަރުކާރުން ވަނީ އެ ގައުމުގެ ތާރިހުގައި ފުރަތަމަ ފަހަރަށް އަންހެނުންނަށް ކާރު ދުއްވުމުގެ ހުއްދަ ވެސް ދީފައެވެ.
