ސައުދީގައި 12 ދާއިޜާއެއްގެ ވަޒީފާއަށް ބޭރު މީހުން ގެންދިއުން މަނާކުރަނީ

ސައުދީ އަރަބިއްޔާގާއި ބޭރު ގައުމުތަކުގެ މީހުންނަށް 12 ދާއިރާއެއްގައި ވަޒީފާ އަދާނުކުރެވޭނެ ކަމަށް ކަނޑައަޅައި އެ ވަޒީފާތަކަކީ އެ ގައުމުގެ ރައްޔިތުންނަށް ޚާއްސަ ވަޒީފާތަކެއް ކަމަށް ކަނޑައަޅައިފިއެވެ.

ސައުދީ ޕްރެސް އޭޖެންސީއިން އާދީއްތަ ދުވަހު ރިޕޯޓް ކޮށްފައިވާގޮތުގައި ލޭބަރ މިނިސްޓަރ އަލީ ބިން ނަސީރު އަލް ގާފިސް ނިންމަވާފައިވާ މި ނިންމެވުމަށް އަމަލުކުރަން ފަށާނީ މި އަހަރުގެ ސެޕްޓެމްބަރުން ފެށިގެންނެވެ.

ވަޒީރުގެ ގަރާރަކުން ނިންމެވި މި ނިންމުމުގެ އަމާޒަކީ ސައުދީގެ އަންހެނުންނާއި ފިރެހެނުންނަށް ޕްރައިވެޓް ސެކްޓަރގައި ވަޒީފާގެ ފުރުސަތުތައް އިތުރުކުރުން ކަމަށް އެސްޕީއޭއިން ރިޕޯޓް ކޮށްފައިވެއެވެ.

ލޭބަރ މިނިސްޓްރީގެ ތަރުޖަމާނު ޚާލިދް އަބަލްޚާއިލް ވިދާޅުވީ މި ވަޒިފާތައް އާއްމުކޮށް ހިމެނެނީ ސޭލްސްގެ ދާއިރާއިން ގަޑިއާއި، އައިނާއި ،މެޑިކަލް އާލާތްތަކާއި، އިލެކްޓްރިކް އަދި އިލެކްޓްރޯނިކް ސާމާނާއި،އޮޓޯ ޕާޓްސްއާއި، އިމާރާތްކުރާ ސާމާނާއި، އެއްގަމު އުޅަނދާއި،ފަރުނީޗަރު ފިހާރަތަކާއި އަދިވެސް އިތުރު ދާއިރާތައް ހިމެނެއެވެ.

މިނިސްޓަރ ވަނީ މި ޕްރޮޖެކްޓަށް އެހީތެރިކަން ފޯރުކޮށްދިނުމަށް ކޮމިޓީއެއް އުފައްދަވާނެ ކަމަށް ވިދާޅުވެފައެވެ.

ސައުދީ އަރަބިއްޔާގައި މިދިޔަ އަހަރު ވަނީ ތެލުގެ އަގު ދަށަށްދިއުމާއި ގުޅިގެން އިގްތިސާދަށް އައި ހީނަރުކަމާއި ގުޅިގެން ވަޒީފާ ނެތް މީހުންގެ ނިސްބަތް 12 އިންސައްތައަށް ވުރެ މައްޗަށް އަރާފައެވެ.

ސައުދީ އަރަބިއްޔާއިން މި ބަދަލު ގެންނަން ނިންމާފައިވަނީ އެ ގައުމުގެ އިގްތިސާދު ވަރުގަދަ ކުރުމަށް ވަލީއަހުދު މުހައްމަދު ބިން ސަލްމާން ގެންނަވަން ފައްޓަވާފައިވާ ބަދަލުތަކުގެ ތެރެއިންނެވެ.