ސައުދީގައި ފައްޅި އެޅުމާ ބެހޭ އެއްބަސްވުމަކަށް އައިސްފައިވާ ކަމަށް ދެކެވޭ ވާހަކަ އަކީ ދޮގެއް: ވެޓިކަން

ސައުދީ އަރަބިޔާގައި ނަސާރާ ދީނުގެ ފައްޅި އެޅުމަށް އެ ޤައުމާއިއެކު ވެޓިކަންއިން، އެއްބަސްވުމަކަށް އައިސްފައިވާ ކަމަށް ދެކެވޭ ވާހަކަތައް ވެޓިކަން އިން ދޮގުކޮށްފިއެވެ.

ސަައުދީ އާއި ވެޓިކަން އިން ސައުދީ ގައި ފައްޅި އެޅުމަށް އެއްބަސްވެފައިވާ ކަމަށް އެންމެ ފުރަތަމަ ރިޕޯޓުކޮށްފައި ވަނީ މެދުއިރުމަތީގެ މީޑިއާތަކުންނެވެ.

މެދުއިރުމަތީގެ މީޑިއާތަކުން ރިޕޯޓުކޮށްފައި ވަނީ ސައުދީގައި ފައްޅި އެޅުމަށް ނިންމާފައިވަނީ އެ ގައުމުގައި އުޅޭ ނަސާރާ ދީނުގެ މީހުން، އެމީހުން ބޭނުންވާ ގޮތަށް އަޅުކަން ކުރުމުގެ ފުރުސަތު ދިނުމުގެ ގޮތުން ކަމަށެވެ. މިސްރުގެ ނޫހެއް ކަމަށްވާ އީޖިޕްޓް އިންޑިޕެންޑެންޓްއިން ހާމަކޮށްފައިވާ ގޮތުގައި ސައުދީ ގައި ފައްޅި އެޅުމާ ބެހޭ އެއްބަސްވުމެއްގައި ސޮއި ކޮށްފައިވަނީ ނިމިގެންދިޔަ އޭޕްރީލް މަހު، ވެޓިކަންގެ ޕޮންޓިފިކަލް ކައުންސިލް ފޯ އިންޓަރ ރިލީޖަސް ޑައިލޮގްގެ ރައީސް، ކާޑިނަލް ޖީން ލުއީ ޓޯރާން ސައުދީ އަރަބިއާއަށް ކުރެއްވި ދަތުރުފުޅެއްގައެވެ.

ސައުދީއާއި އާއި އިތުރަށް ވާހަކަ ދެއްކުމަށާއި، ގުޅުން ބަދަހި ކުރުމަށް އެއްބަސްވުމެއްގައި ސޮއި ކޮށްފައިވާކަން ޚުދު ކާޑިނަލް ޓޯރާން ވެޓިކަން ނިއުސްއަށް ކަށަވަރު ކޮށްދެއްވާފައިވާއިރު، ފައްޅި އެޅުމާއި ގުޅޭގޮތުން ވެވުނު އެއްބަސްވުމުގެ ތަފްސީލެއް އެބޭފުޅާ ދެއްވާފައެއް ނުވެއެވެ.

ކާޑިނަލް ޓޯރާންގެ ދަތުރުފުޅުގައި ސައުދީ ރަސްގެފާނު ސަލްމާން ބިން ޢަބްދުލް އަޒީޒް އަލް ސައުދުގެ އިތުރުން ސައުދީގެ އިސް އެކި ފަރާތްތަކާއި ވަނީ ބައްދަލު ކުރައްވާފައެވެ.

އިސްލާމް ދީން ނޫން ދީނަކަށް އުޅުން މަނާ ސައުދީގެ އިޖުތިމާއީ އަދި ދީނީ ވިސްނުމަށް ބޮޑެތި ބަދަލުތަކެއް އަންނަމުންދާއިރު، އެ ގައުމުން ދަނީ "މުނިފޫނިފިލުވުމުގެ" އެކި ވަސީލަތްތަކާއި ތަންތަން ހިމެނޭގޮތަށް އިގުތިސާދީ ޚާއްސަ ސަރަޙައްދެއް ތަރައްގީ ކުރަމުންނެވެ.