ސިޔާސީ ނުފޫޒުން ހުކުމްކުރި ފަރާތްތައް ޝަކުވާ ހުށަހަޅަން ދިން ފުރުޞަތު އިތުރުކޮށްފިއެވެ.

ރައީސުލްޖުމްހޫރިއްޔާގެ އޮފީހުން ބުނީ، ފެބުރުއަރީ 2012 ގެ ފަހުން، ސިޔާސީ މަޤުޞަދެއް ހާސިލުކުރުމަށްޓަކައި ބަންދުކޮށް، ޖިނާއީ ޢަދުލުގެ ނިޒާމުގެ ތެރެއިން އެކިއެކި ފިޔަވަޅު އަޅާފައިވާ ފަރާތްތަކާއި، އެކިއެކި ޙުކުމްތައްކޮށް، އެޙުކުމްތައް ތަންފީޛުކުރަމުންދާ ފަރާތްތަކުން ޝަކުވާ ހުށަހެޅުމަށް ކުރިން ހުޅުވައިލި މުއްދަތު މިހާރު އިތުރުކޮށްފައިވާ ކަމަށެވެ. އެ ގޮތުން އެފަދަ ޝަކުވާތައް މި ޖަނަވަރީ މަހުގެ 22 ވަނަ ދުވަހުގެ 14:00 ގެ ނިޔަލަށް ހުށަހެޅޭނެ ކަމަށް ރައީސް އޮފީހުން ވަނީ ހާމަކޮށްފައެވެ.

މިގޮތުން، ޝަކުވާ ހުށަހެޅުމުގެ މުއްދަތު އިތުރުކޮށްފައި ވަނީ މި މުއްދަތު އިތުރު ކޮށްދިނުމަށް ގިނަ ފަރާތްތަކަކުން އެދެމުންދާތީ ކަމަށްވެސް ރައީސް އޮފީހުން ވަނީ ބުނެފައެވެ. މި ފުރުޞަތު ފުރަތަމަ ހުޅުވާލިއިރު، ޝަކުވާ ހުށަހެޅުމަށް ކަނޑައަޅާފައިވަނީ 6 ޑިސެންބަރު 2018 އިން ފެށިގެން 30 ދުވަހުގެ މުއްދަތަކެވެ.

ސިޔާސީ ހައްޔަރީންގެ މައްސަލަތައް ބަލައި، ނުޙައްޤުން ބަންދުކޮށްފައިވާ ފަރާތްތައް މިނިވަންކުރުމަށް ރައީސުލްޖުމްހޫރިއްޔާ ވެވަޑައިގެންފައިވާ ވަޢުދުފުޅު ފުއްދެވުމުގެގޮތުން، އެކަމަށް ޚާއްޞަ ކޮމިޓީއެއް އުފައްދަވައި، އެމަނިކުފާނު މަޤާމާ ހަވާލުވެވަޑައިގެންނެވި ފުރަތަމަ ދުވަހު ވަނީ އެ މަސައްކަތްޕުޅު ފައްޓަވާފައެވެ.