އާއިލާތައް ބަނގުރޫޓްވުމުގެ އެއްއަސާސަކީ މައިންބަފައިން ހިތުގައި ޖެއްސުން: އިލްޔާސް

އާއިލާތައް ބަނގުރޫޓްވުމުގެ އެންމެ ބޮޑު އެއްއަސާސަކީ މައިންބަފައިން ހިތުގައި ޖެއްސުން ކަމަށް މަޝްހޫރު ދީނީ އިލްމުވެރިޔާ ޝައިޚް އިލްޔާސް ހުސެއިން ވިދާޅުވެއްޖެއެވެ.

''ބާއްޖަވެރި އާއިލާ'' މި މައުޟޫއަށް ހުކުރު ދުވަހު ރޭ ދެއްވި ދީނީ ދަރުސްގައި ވިދާޅުވީ ބާއްޖަވެރިކަން ލިބިގަތުމަށްޓަކައި ޒަވާޖީ ހަޔާތެއް ފަށާއިރު، މައިންބަފައިންގެ ރުހުން ހޯދުމަކީ މުހިންމު ކަމެއް ކަމަށެވެ. އަދި ކައިވެނި ކުރާ ކުއްޖަކީ ރަނގަޅު ކުއްޖެއްތޯ މައިންބަފައިންގާތު އަހައި، މައިންބަފައިންގެ ރުހުން ހޯދަން ޖެހޭ ކަމަށެވެ. ނަމަވެސް މިހާރުގެ މިމުޖުތަމައުއިން މިމަންޒަރު ވަރަށް ނުފެންނަ ކަމަށް ޝެއިހް ވިދާޅުވިއެވެ.

ޝެއިހް އިލްޔާސް ވިދާޅުވީ މައިންބަފައިންގެ ރުހުމާއި ނުލާ ޒަވާޖީ ހަޔާތެއް ފެށި ނަމަވެސް ދިރިއުޅުން ބާއްޖަވެރިނުވާނެ ކަމަށެވެ.

"އެއްފަހަރު ވެސް ސުވާލު ކުރިންތޯ އޭ މަންމައޭ. މޭރީ ކުރާށޭ މި އުޅެނީ. މިވެނި ކުއްޖަކު ރަނގަޅުތޯ؟ މަންމަ ކީކޭތޯ ބުނަނީ. އަޅުގަނޑުމެންގެ ތެރެއިން ކިތައް ޒުވާނުންތޯ އެހީ. ކީއްވެގެންތޯ އަޅުގަނޑުމެން ނިކަމެތި ކުރަނީ. ބާއްޖަވެރި ނުވާނެ ހަޔާތް. އާއިލާތައް ބަގުރޫޓް ވެގެންދަނީ," ޝެއިހް އިލްޔާސް ވިދާޅުވިއެވެ.

ޝެއިހް އިލްޔާސް ވިދާޅުވީ ބާއްޖަވެރި ދިރިއުޅުމެއް ހޯދުމަށް ދިނީ ގޮތުން މައިންބަފައިންގެ ރުހުން ހޯދުމަކީ ވާޖިބެއް ކަމަށާއި، ޒަވާޖީ ހަޔާތެއް ފަށާއިރު ޚާއްސަ ގޮތެއްގައި މިކަން ކުރަންޖެހޭ ކަމަށެވެ.

"ހުރިހާ ކަމެއްގައި އެމީހުންގެ މަޝްވަރާ ހޯދުން. އެމީހުން ލަފާ ހޯދުން . އެމީހުން ހިތުގައި ނުޖެއްސުން . އެމީހުން އަބަދު ވެސް އުފަލުގައި ބެހެއްޓުން . 100 ޕަސެންޓް ޔަގީން އެމީހަކަށް އޮންނާނެ ހިތްހަމަ ޖެހުމާއި އުފާ." ޝެއިހް އިލްޔާސް ވިދާޅުވިއެވެ.

ޝެއިހް އިލްޔާސް ވިދާޅުވީ ރާއްޖެއަކީ ވަރީގައި ވޯލްޑް ރިކޯޑް އޮތްތަނެއް ކަމަށާއި، މާތްﷲ ހުއްދަ ކުރައްވާފައިވާ ކަންތައްތަކުގެ ތެރެއިން ރުހިވޮޑިނުގަންނަވާ ކަމުގެ ވޯލްޑް ރިކޯޑް ލިބުމަކީ ހިތާމަ ކުރަންޖެހޭ ކަމެއް ކަމަށެވެ.

މައިންބަފައިންނަށް އިސްލާމްދީނުގައި ދެއްވާއިފައިވާ މާގަމަށް އަލިއަޅުއްވާލައްވައި ޝެއިހް އިލްޔާސް ވިދާޅުވީ މަންމަ ހިތުގައި ޖައްސައިފިނަމަ އެމީހެއްގެ ދިރިއުޅުން ބަނގުރޫޓްވެއްޖެ ކަމަށާއި، ދުވަހަކު ވެސް ކާމީޔާބެއް ނެތް ކަމަށެވެ.

ޝެއިހް ވިދާޅުވީ މާތްﷲ އާއި ރަސޫލާ މުހައްމަދުފާނު ދެކެ ލޯބިވުމަށްފަހުގައި އެންމެ ބޮޑަށް ލޯބިވާން ޖެހެނީ މަންމަދެކެ ކަމަށެވެ. މަންމަގެ ދަރަޖަ ތިން ގުނަ މަތި ކުރައްވާފައިވާއިރު، މަންމައަށްވުރެ އަނބިމީހާ އިސް ނުކުރެވޭނެ ކަމަށް ޝެއިހް އިލްޔާސް ވިދާޅުވިއެވެ. އަދި ވިދާޅުވީ އަންހެނުން ލިބޭނެ ކަމަށާއި، މަންމަ ނުލިބޭނެ ކަމަށެވެ. އެހެންކަމުން އެމަންމައަށް އުއްފު ވެސް ނުބުނުމަށް ޝެއިހް ނަސޭހަތްތެރިވިއެވެ.

ޝެއިހް އިލްޔާސް ވިދާޅުވީ އިސްލާމް ދީނުގައި މައިންބަފައިންގެ މަގާމަކީ ވަރަށް މަތީ މަގާމެއް ކަމަށާއި، އަންހެނުންގެ މަގާމަކީ އިސްލާމްދީނުގައި ތަސައްވުރުން ބޭރުގައި އަޅުގަނޑުމެންނަށް މަތިކުރެވިފައި މަގާމެއް ދެވިފައިވާ ބައެއް ކަމަށެވެ. އަދި ވިދާޅުވީ މާތްﷲއަށް އަޅުކަން ކުރުމަށްފަހު މައިންބަފައިންނަށް ކަމޭ ހިތުމުން ބާއްޖަވެރިކަމާއި، ހިތްހަމަޖެހުމާއި، ހަމަހިމޭންކަމުގެ އިހުސާސްކަން އެމީހެއްގެ ހިތަށް ލިބޭނެ ކަމަށެވެ.

ގާތްތިމާގެ ގުޅުން ބަދަހިކުރުމާއި ބެހޭ ގޮތުން ޝެއިހް އިލްޔާސް ވިދާޅުވީ ގާތްތިމާގެ ގުޅުން ކެނޑުމަކީ އިލާހީ ރަހުމަތް އެ މީހަކަށް ކެނޑިގެންދާނެ ކަމެއް ކަމަށާއި، ކިތަންމެ ވަރަކަށް އުފަލާއި ހިތްހަމަ ޖެހުން ހޯދަން މަސައްކަތް ކުރި ނަމަވެސް ކާމިޔާބު ނުވާނެ ކަމަށެވެ.

އެހެންކަމުން އާއިލާގެ ގުޅުން ބަދަހިކުރުމަށް މަސައްކަތް ކުރުމަށް ޝައިހް ވަނީ ގޮވާލައްވާފައެވެ.