މައިންބަފައިންނަށް ކަމޭހިތުމަކީ އިސްލާމް ދީނުގައި ވަރަށް މަތީ ދަރަޖައެއް ދެވިފައިވާ ކަމެއް ކަމަށް މިއަދުގެ ހުކުރު ޚުތުބާގައި ބުނެފިއެވެ.

"މައިންބަފައިންނަށް ކަމޭހިތުން" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، މައިންބަފައިންނަށް ހެޔޮކޮށް ހިތުމަށް ޤުރުއާނުގެ ވަރަށް ގިނަ އާޔަތްތަކުގައި އަންގަވާފައިވާ ކަމަށާއި، އެއީ އިސްލާމީ ރިވެތި އަހުލާޤުގެ ތެރޭގައިވެސް ހިމެނޭ ކަމެއް ކަމަށެވެ.

އޭގެ އިތުރުން، މާތް ﷲ އަށް ފަހު އަޅުތަކުންނަށް އެންމެ އޯގާތެރި ފަރާތަކީ މައިންބަފައިން ކަމަށްވެސް ޚުތުބާގައި ބުނެފައިވެއެވެ.

ޚުތުބާގައި އިތުރަށް ބުނީ، ވަކިން ޚާއްސަކޮށް މަންމައަށް ހެޔޮކޮށް ހިތުމަށް އިސްލާމް ދީނުގައި ބާރުއަޅުއްވާފައިވާ ކަމަށާއި، އެމީހަކަށް އެންމެ އޯގާތެރިވުން ހައްޤު ފަރާތަކީ މަންމަ ކަމަށް ކީރިތި ރަސޫލާވެސް ހަދީޘް ކުރައްވާފައިވާ ކަމަށެވެ. އަދި ކާފައާއި މާމައަކީވެސް މަންމައާއި އެއްފަދައިން ކަމޭހިތަންޖެހޭ ބައެއް ކަމަށްވެސް ޚުތުބާގައި ބުނެފައިވެއެވެ.

އޭގެ އިތުރުން، މައިންބަފައިންނަށް އިހާނަތްތެރި ވުމުން ދުނިޔެއާއި އާޚިރަތުގައި ލިބޭ އަޒާބުގެ މައްޗަށްވެސް ޚުތުބާގައި އަލިއަޅުވާލާފައިވެއެވެ. އެގޮތުން ޚުތުބާގައި ބުނީ، މައިންބަފައިންނަށް އިހާނަތްތެރިވާ މަންޒަރު މިއަދު ދިވެހި މުޖުތަމައުންވެސް ފެންނަ ކަމަށާއި، އެމީހުން އުމުރުން ދުވަސް ވުމުން އަޅާނުލާ ދޫކޮށްލާ ދަރިން އުޅޭ ކަމަށެވެ. އަދި ދަރިން ތަނަވަސްކަން މަތީގައި ތިބޭއިރުވެސް މައިންބަފައިން ސަލާން ޖަހައިގެން އުޅެންޖެހޭ ކަމަށާއި، އެފަދަ އެއްވެސް ކަމަކީ ދީނުގައި ހުއްދަވެގެންވާ ކަމެއް ނޫން ކަމަށް ޚުތުބާގައި ބުނެފައިވެއެވެ.