ހާލުގައި ޖެހުނު އާއިލާތައް މަގުމަތި ނުކުރަން، އާންމު ހާލަތަށް ދެވެންދެން ބަލަހައްޓާނަން: ޑިޒާސްޓަރ

ހ. ތިލަފުށި ގޭގެ ގުދަނުގައި ހިނގައި ދިޔަ އަލިފާނުގެ ހާދިސާގައި ގެއްލުން ލިބުނު ފަރާތްތަކުގެ ތެރެއިން ޑިޒާސްޓާގެ ބެލުމުގެ ދަށުގައި މިހާރު ތިބި އާއިލާތަކަށް 3 މަސް ދުވަހުގެ ކުލީގެ ފައިސާ ދިން ނަމަވެސް އެއްވެސް ފަރާތެއް ނުކުންނަށް އަންގާ މަޖުބޫރުކޮށްފައި ނުވާނެކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ހާމަކޮށްފިއެވެ.

ހުކުރު ދުވަހުގެ އެ އޮތޯރިޓީން ބޭއްވި ނޫސްވެރިންގެ ބައްދަލުވުމުގައި އެ އޮޓޯރިޓީގެ ޗީފް އެގްޒެކެޓިވް ހިސާން ހަސަން ވިދާޅުވީ މި ހާދިސާއާއި ގުޅިގެން 31 އާއިލާއެއްގެ 145 މީހުން ބަލަހައްޓަމުންދާ ކަމަށެވެ. އަދި މީގެ ތެރެއިން 7 އާއިލާއެއްގެ 31 މީހުންނަކީ އަލިފާން ރޯވި ތަންތަނުގެ ވެރިފަރާތް ކަމަށާއި، އެފަރާތްތަކަށް ގާކޮށިން އަދި މޫކައި ސުއިޓްސްއިން އެޕާޓްމަންޓުގައި ބައިތިއްބާފައިވާ ކަމަށެވެ.

ހިސާން ވިދާޅުވީ މީގެ ތެރޭގައި ކުއްޔަށް ދިރިއުޅޭ 24 އާއިލާއެއް ވެސް ގާކޮށީގެ އެޕާޓްމަންޓުތަކުގައާއި މޫކައި ސުއިޓްސްގެ އެޕާޓްމަންޓުގައި އެބަތިބި ކަމަށެވެ. އަދި އެފަރާތްތަކަށް ޑިޒާސްޓާ މެނޭޖްމަންޓް އޮތޯރިޓީން މިހާރުވާނީ 3 މަސް ދުވަހުގެ ކުއްޔަށްވާ ފައިސާއާއި ކެއިންބުއިމަށްދޭ އެލަވަންސް 30 އޮކްޓޯބަރުގެ ނިޔަލަށް ފޯރުކޮށްދީފައި ކަމަށް ހިސާން ވިދާޅުވިއެވެ.

ހިސާން ވިދާޅުވީ ބައެއް އާއިލާތައް މިހާރު ދިރިއުޅެމުންދާ ކޮޓަރިތަކުން ނުކުންނަން އަންގާވާހަކަ ބައެއް މީޑިއާތަކުގައި ފެތުރެމުންދާ ކަމަށާއި، އެއީ ސީދާ ކަނޑައެޅިގެން ދޮގެއް ކަމަށެވެ. އޭނާ ވިދާޅުވީ އެ ފަރާތްތަކާއި ގުޅިގެން މަސައްކަތް ކުރަމުންދަނީ، އެފަރާތްތަކަށް ފައިސާ ޖަމާކުރެވިފައިވާތީ ވީހާވެސް އަވަހަކަށް ތަންތަނަށް ބަދަލުވުމަށް ކަމަށާއި، ތަންތަން ނުލިބޭ ފަރާތްތައް ވެސް މީގެ ތެރޭގައި ހިމެނޭ ކަމަށެވެ.

ހިސާން ވިދާޅުވީ ކުއްޔަށްވި 3 މަސް ދުވަހަށް ވާ ފައިސާ އެފަރާތްތަކަށް ދީފައިވާނީ އެ ފަރާތްތަކުން ކުރިން ދައްކަމުން ދިޔަ ކުލީގެ ނިސްބަތުން ކަމަށެވެ. އަދި މީގެ ދެ ހަފްތާ ކުރިން އެބޭފުޅުންގެ އެކައުންޓުތަކަށް އެ ފައިސާ ޖަމާކޮށްދީފައިވާމެ ލަކަމަށާއި، އެ އާއިލާތަކަށް ބުރާސްފަތި ދުވަހުގެ ނިޔަލާ ހަމައަށް ފުޑް މަނީގެ ގޮތުގައި 1.5 މިލިއަން ރުފިޔާ ފޯރުކޮށްދީފައިވާ ކަމަށް އުމަރު ވިދާޅުވިއެވެ.

ހިސާން ވިދާޅުވީ ފަސް މީހުންގެ އާއިލާއަކަށް ހާދިސާގެ ދުވަހުން ފެށިގެން އޮކްޓޯބަރުގެ ނިޔަލަށް 40000 ރުފިޔާ ކެއިން ބުއިމަށް ޑިޒާސްޓާއިން ހަމަޖައްސާދީފައި ވާނެ ކަމަށެވެ. އަދި ކުއްޔަށްވާ ފައިސާ އެކު މި ބައިވެސް ވާނީ އެފަރާތްތަކަށް މިހާރު ލިބިފައި ކަމަށް ހިސާން ވިދާޅުވިއެވެ.