އަތޮޅުތަކުގެ ސިއްހީ ހިދުމަތް ރަނގަޅުނުވެ ރާއްޖޭގެ ސިއްހީދާއިރާ ކުރިއެރުމަކީ ގޮންޖެހުން ބޮޑު ކަމަކަށް ވާނެ ކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެއެވެ.
ރާއްޖެއެމްވީ އަށް ދެއްވި ހާއްސް އިންޓަވިއުއެއްގައި މިނިސްޓަރ އަމީން ވިދާޅުވީ، މާލެ ސަރަހައްދުގައި ސިއްހީ ދާއިރާއަށް އިންވެސްޓް ކުރާނެ ފަރާތްތައް އެބަހުރިކަމަށާއި, މިހާރު އެންމެ ބޮޑު އަމާޒަކީ އަތޮޅުތަކުގެ ސިއްހީ ހިދުމަތުގެ ފެންވަރު ރަނގަޅު ކުރުމުގެ އިތުރުން ރައްޔިތުންގެ އިތުބާރު ހޯދުންކަމަށެވެ.
މިނިސްޓަރ ވިދާޅުވީ ސިއްހީ ހިދުމަތައް ބޭނުންވާ އެންމެ މުހިންމު އެއްކަމަކީ ރައްޔިތުންގެ އިތުބާރު ހޯދުންކަމަށާއި، އެކަންތައް ކުރެވޭނީ ރަށްރަށުގައި އެކަށީގެންވާ ސިއްހީ ހިދުމަތްތައް ފޯރުކޮށްދީ ދަތުރު ނުކޮށް އާންމު ބަލިތަކަށް ފަރުވާހޯދޭ އިންތިޒާމް ހަމަޖައްސައިގެންކަމަށެވެ.
ސިއްހީ ދާއިރާއަކީ ގޮންޖެހުން ބޮޑު އަދި ވަރަށް އުނދަގޫ ދާއިރާއެއް ކަމަށާއި، ފާއިތުވެގެންދިޔަ މަހެއްހާ ދުވަހު އެންމެ ބޮޑަށް ފާހަގަކުރެވުނު ކަމަކީ އަތޮޅުތަކުގައި ދިރިއުޅޭ ރައްޔިތުންނަށް އެކަށީގެންވާ ހިދުމަތްތަކެއް ނެތި ސަލާންޖަހަން ޖެހުން ކަމަށްވެސް މިނިސްޓަރު ވިދާޅުވިއެވެ.
މިނިސްޓަރ ވިދާޅުވީ ރާއްޖޭގެ އަތޮޅުތަކުގެ ސިއްހީ ހިދުމަތް ރަނގަޅު ކުރުމަށްޓަކައި ވަރަށް ބޮޑު އިސްކަމެއް ދޭންޖެހޭ ކަމަށެވެ. އެގޮތުން ބޭސް ލިބިމުގެ ގޮންޖެހުމާއި ޑޮކްޓަރުން ހަމަނުވުމާއި ސިއްހީ ހިދުމަތް ފޯރުކޮށްދޭން ބޭނުންވާ ލެބޯޓްރީ ތަކާއި ވަސީލަތްތައް ނެތުމުގެ ސަބަބުން އަތޮޅުތަކުގައި ދިރިއުޅޭ ރައްޔިތުން ވަރަށް ބޮޑު ތަކުލީފެއް އުފުއްލަން ޖެހޭ ކަމަށްވެސް މިނިޓަރ ވަނީ ވިދާޅުވެފައެވެ.
މީގެއިތުރުން މިނިސްޓަރ ވިދާޅުވީ އަތޮޅުތަކުގައި ޓާޝިއަރީ ހޮސްޕިޓަލް ގާއިމްކޮށް މިހާރު ހިންގަމުންދާ ހޮސްޕިޓަލްތަކުގެ ހިދުމަތް ފުޅާކޮށް މެނޭޖްމަންޓަށް ކުރިޔަށް އޮތް ދުވަސްތަކުގައި ބަދަލު ގެންނާނެކަމަށެވެ.
