ގައިދީންނާމެދު އަމަލުކުރެވޭ ގޮތުގެ މައުލޫމާތު ހިއްސާ ކުރުމަށް އެދިއްޖެ

ޖަލުތަކުގެ ގައިދީންނާއި ދޭތެރޭ އަމަލުކުރެވޭ ގޮތުގެ މައުލޫމާތު ހިއްސާ ކުރުމަށް ޖަލުތައް އޮޑިޓް ކުރަން އުފެއްދި " ކަމިޝަނަރ އޮފް ޕްރިޒަން އޯޑިޓް" އިން ހުޅުވާލައިފިއެވެ.

ޖަލުތައް އޮޑިޓް ކުރަން ރައީސުލް ޖުމްހޫރިއްޔާ އުފައްދަވާފައިވާ ކަމިޝަނުން ނެރެފައިވާ ނޫސް ބަޔާނުގައި ބުނެފައިވަނީ އެ ކަމިޝަންގެ މަސައްކަތް މި ދިޔަ އަހަރުގެ ޑިސެމްބަރުމަހުގެ 18 ވަނަ ދުވަހު ފަށާފައިވާ ކަމަށާއި، ޖަލުތައް އޮޑިޓް ކުރަން ބޭނުންވާ މައުލޫމާތު އެއްކޮށް ދިރާސާ ކުރަމުން އަންނަ ކަމަށެވެ.

ކަމިޝަނުގެ ނޫސް ބަޔާނުގައި ބުނެފައިވަނީ ޖަލުތަކުގެ ހާލަތާއި ޖަލުތަކުގައި ގައިދީންނާ ދޭތެރޭ އަމަލުކުރެވޭ ގޮތުގެ މައުލޫމާތު ހިއްސާ ކުރަން ބޭނުންވާ ފަރާތްތަކަށް އެ ފުރުސަތު ބުދަ ދުވަހުން ފެށިގެން ޖެނުއަރީމަހުގެ 10 ވަނަ ދުވަހުގެ ނިޔަލަށް ހުޅުވާލާފައިވާ ކަމަށެވެ.

މައުލޫމާތު ހިއްސާ ކުރަން ބޭނުންވާ ފަރާތްތަކުން pac@homeaffairs.gov.mv އަށް މެއިލްކޮށްގެންނާއި ރަސްމީ ގަޑީގައި 3321752 އަށް ގުޅައިގެން ނުވަތަ ސިޓީއަކުން ކޮމިޝަންގެ އޮފީހަށް ހާޒިރުވެގެން ވެސް މައުލޫމާތު ދެވޭނެ ކަމަށް ކޮމިޝަނުން ނެރެފައިވާ ނޫސްބަޔާނުގައި ވަނީ ބުނެފައެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ރިޔާސީ ކެމްޕޭން ތެރޭގައި ވިދާޅުވެފައިވަނީ ރާއްޖޭގެ ޖަލުތަކަކީ އިންސާނުން އުޅެން އެކަށީގެންވާ ތަނެއް ނޫން ކަމަށާއި، އެ މަނިކުފާނުގެ ވެރިކަމުގެ 100 ދުވަހުގެ ތެރޭގައި ޖަލުތަކުގެ މިނިވަން އޮޑިޓެއް ހައްދަވާނެ ކަމަށެވެ.

އެގޮތުން މި ދިޔަ އަހަރުގެ ޑިސެމްބަރުމަހުގެ 18 ވަނަ ދުވަހު ރައީސު ސޯލިހު ވަނީ ޖަލުތަކުގެ މިނިވަން އޮޑިޓެއް ހެއްދެވުމަށް ހަތް މެމްބަރުން އެކުލެވޭ ކޮމިޓީއެއް އުފައްދަވާފައެވެ.

ރާއްޖޭގައި މިވަގުތު ހުރީ މާލެ ޖަލާއި ކ. މާފުށީ ޖަލާއި ކ. ހިންމަފުށީ ޖަލުގެ އިތުރުން ފުލުހުން ބަލަހައްޓަމުން އަންނަ ޖަލުތަކުގެ ތެރޭގައި މާލޭގައި ހުންނަ އަތޮޅުވެއްސާއި ދޫނިދޫ ޖަލު ހިމެނެ އެވެ. މީގެ އިތުރުން ބިދޭސީންނަށް ހާއްސަކޮށް، ހުޅުމާލޭގައި ހުޅުވާފައި ހުންނަ ޑިޓެންޝަން ސެންޓަރު ހިމެނެއެވެ.