ޕްރިޔަންކާ ޗޯޕްރާ އާއި ނިކް ޖޯންސްގެ ކައިވެނީގެ ހަފްލާއެއް އާދިއްތަ ދުވަހުގެ ރޭ ލޮސް އެންޖްލްސްގައި ބޭއްވުމަށް ހަމަޖެހިފައިވާ ކަމަށް ރިޕޯޓްތައް ބުނެފިއެވެ.

މިހިނގާ ޑިސެމްބަރު މަހުގެ 1 އަދި 2 ގައި ކައިވެނި ކޮށްފައިވާ މި ޖޯޑުގެ ކައިވެނީގެ ފުރަތަމަ ހަފްލާ ބާއްވާފައިވަނީ ދިއްލީގައެވެ. މި ހަފްލާގައި އިންޑިއާގެ ބޮޑު ވަޒީރު ނަރެންދްރަ މޯދީ ވެސް ވަނީ ބައިވެރިވެ ވަޑައިގެންފައެވެ. މީގެ އިތުރުން މިމަހުގެ 19 އަދި 20 ގައި ވަނީ މުމްބާއީގައި ވެސް ކައިވެނީގެ ދެ ހަފްލާއެއް ބާއްވާފައެވެ. މި ހަފްލާތަކުގައި ވަނީ ހައި ޕްރޮފައިލް މެހެމާނުން ބައިވެރިވެފައެވެ. އޭގެތެރޭގައި ދާދިފަހުން ކައިވެނި ކުރި ދިޕިކާ ޕަދުކޯން އާއި ރަންވީރު ސިންގް، ސަލްމާން ޚާން، ކެޓްރީނާ ކެއިފް، އަނުޝްކާ ޝަރްމާ އަދި ކަންގަނާ ރަނައުޓް ހިމެނެއެވެ.

ނިކްގެ އުފަން ގައުމު، އެމެރިކާގައި ބާއްވާ މި ހަފްލާގެ ގެސްޓް ލިސްޓްގައި ޕްރިޔަންކާގެ ގާތް އެކުވެރިން ކަމަށްވާ ކެރީ ވޮޝިންޓަން، ޑުވެއިން ޖޯންސަން، އިލަން ޑިހެންރަސް އަދި ޑަޗަސް އޮފް ސަޒެކްސް މޭގަން މާކަލް ހިމެނޭ ކަމަށް ރިޕޯޓްތައް ބުނެއެވެ.