ވޮޝިންޓަންގައި ކުރިއަށްދިޔަ "ވިމެންސް މާޗް" އަށް ޕްރިޔަންކާގެ ސަޕޯޓު އޮތްކަން ހާމަކޮށްފި
ވިމެންސް މާޗުގައި ބައިވެރިނުވެވުމުން އިންތިހާއަށް ދެރަވެ މާޔޫސްވެފައިވާ ކަމަށް ޕްރިޔަންކާގެ ޓްވީޓުގައި ބުނެފައިވޭ
ވިމެންސް މާޗުގައި ބައިވެރިނުވެވުމުން ޕްރިޔަންކާ ހުރީ މާޔޫސްވެފައި
އެމެރިކާގެ 45 ވަނަ ރައީސްކަމަށް އިންތިޚާބުވެވަޑައިގެންނެވި ޑޮނަލްޑް ޓްރަމްޕާއި ދެކޮޅަށް އެމެރިކާގައި ކުރިއަށް ގެންދާ "ވިމެންސް މާޗް" އަށް ބޮލީވުޑްގެ ފިލްމީ ތަރި ޕްރިޔަންކާ ޗޯޕްރާގެ ތާޢީދު އޮތް ކަން އޭނާ ހާމަކޮށްފިއެވެ.
ޓްރަމްޕް ހުވާކުރެއްވިތާ އެއްދުވަސް ވެސް ނުވަނީސް އެތައް ލައްކަ އަންހެނުންނެއް ބައިވެރިވެ "ވިމެންސް މާޗް" ގެ ނަމުގައި ވޮޝިންގޓަންގައި ކުރިއަށް ގެންދާ ޙަރަކާތުގައި ބައިވެރިނުވެވުނު ނަމަވެސް، ޕްރިޔަންކާ ވަނީ އޭނާގެ ޓްވިޓާ މެދުވެރިކޮށް ސަޕޯޓް އޮތްކަން ހާމަކޮށްފައެވެ. ޕްރިޔަންކާ ކޮށްފައިވާ ޓްވީޓުގައި "ވިމެންސް މާޗު" ގައި ބައިވެރިވި އެންމެހާ އަޚުންނާއި އުޚުތުންނާ މެދު ފަޚުރުވެރިވާ ކަމަށާއި ބައިވެރި ނުވެވުނު ކަމާމެދު އިންތިހާއަށް ދެރަވެ މާޔޫސްވެފައިވާ" ކަމަށް ވަނީ ލިޔެފައެވެ.
ބޮލީވުޑް ފަތަޙަ ކުރުމަށްފަހު ހޮލީވުޑްގައި ފައިތިލަ ސާބިތުކުރަމުން އަންނަ ޕްރިޔަންކާ މިވަގުތު ހުރީ އޭނާގެ ހޮލީވުޑް ފިލްމު "ބޭވޮޗް"ގެ ޝޫޓިންތައް ފުރިހަމަ ކުރުމަށް ލޮސް އެންޖެލީސްއަށް ގޮހެވެ.
އެކްޝަން ކޮމެޑީ ފިލްމެއްކަމަށްވާ "ބޭވޮޗް" މިއަހަރުގެ މޭއި މަހުގެ 26 ވަނަ ދުވަހު ރިލީޒްކުރުމަށް ހަމަޖެހިފައިވާއިރު، ސެތް ގޯރޑަން ޑައިރެކްޓްކޮށްފައިވާ މިފިލްމުގައި ޕްރިޔަންކާއާއެކު ޑްވޭން ޖޯންސަންއާއި ޒެކް އެފްރޯންވެސް ފެނިގެންދާނެއެވެ.
