ޒީރޯއަށް ފުރަތަމަ ދުވަހު 30 ކްރޯޑް ލިބޭނެ ކަމަށް ފިލްމް ދިރާސާކުރާ ފަރާތްތަކުން ބުނެފި

މިހިނގާ ޑިސެމްބަރު މަހުގެ 21 ވަނަ ދުވަހު ރިލީޒްކުރާ ޝާހުރުކް ޚާންގެ ފިލްމް "ޒީރޯ" އަށް ފިލްމް ރިލީޒްކުރާ ދުވަހު ލިބޭ އާމްދަނީ 30 ކްރޯޑަށް އަރާނެ ކަމަށް ލަފާ ކުރެވޭ ކަމަށް ފިލްމް ދިރާސާކުރާ ފަރާތްތަކުން ބުނެފިއެވެ. ނަމަވެސް މި ފިލްމަށް މިދިޔަ މަހު ރިލީޒްކުރި އާމިރުޚާންގެ ފިލްމް "ތަގްސް އޮފް ހިންދުސްތާން" ބީޓް ކުރެވޭނެހެން ހީނުވާކަމަށް ވަނީ ބުނެފައެވެ.

ޓްރޭޑް އެނަލިސްޓެއް ކަމަށްވާ އަކްޝޭ ރާތީ ބުނެފައިވަނީ އެ ފިލްމަށް 30 ކްރޯޑަށް ވުރެ މަތީ އާމްދަނީއެއް ލިބޭނެ ކަމުގެ ޔަގީންކަން އެބަ އޮތް ކަމަށެވެ.

"ޒީރޯ"ގެ ޓްރެއިލާ އާއި ލަވަތައް ބެލުމަށްފަހު އާންމުންގެ ފަރާތުން ލިބެމުންދާ ތަރުހީބަށް ބަލާފައި މި ފިލްމަކީ ބެލުންތެރިން ގަޔާވާނެ ފިލްމެއް ކަމަށް ބެލޭވޭ ކަމަށް އޭނާ ވަނީ ބުނެފައެވެ.

"ތަގްސް އޮފް ހިންދުސްތާން" ރިލީޒްކުރި ދުވަހު ފިލްމަށް ވަނީ ބޮކްސް އޮފީހުގައި އާމްދަނީގެ ގޮތުގައި 50 ކްރޯޑް ރުޕީސް ލިބިފައެވެ. ނަމަވެސް ދެވަނަ ދުވަހު ލިބުނު އާމްދަނީ ވަނީ 50 ޕަސެންޓަށް ވުރެ ވެސް ދަށަށް ގޮސްފައެވެ.

މި ފިލްމަށް ލިބެމުން ދިޔަ ތަރުހީބު ކުޑަވެފައި ވަނީ ފިލްމު ކްރިޓިކުންގެ ފާޅުކުރި ނެގެޓިވް ހިޔާލުތައް ގިނަވުމުން ކަމަށް ބެލެވޭ ކަމަށް ރިޕޯޓްތައް ބުނެއެވެ.

އާނަންދް އެލް ރާއީ ޑައިރެކްޓް ކުރާ މި ފިލްމްގައި ޝާހުރުކް ޚާން އާއި އެކު ލީޑްރޯލުން ފެނިގެންދަނީ އަނުޝްކާ ޝަރްމާ އާއި ކެޓްރީނާ ކެއިފް އެވެ.