އާސަންދަ ކުންފުނިން ހިންގަމުން އައި ހުޅުމާލެ ހޮސްޕިޓަލް އަލުން ހެލްތު މިނިސްޓްރީގެ ދަށަށް ބަދަލުކޮށްފިއެވެ.

ހެލްތު މިނިސްޓްރީގެ ޕާމަނަންޓް ސެކްރެޓަރީ ހަދީޖާ އަބްދުއްސަމަދު ބުދަދުވަހު ވިދާޅުވީ ހުޅުމާލެ ހޮސްޕިޓަލް ހެލްތު މިނިސްޓްރީގެ ދަށަށް ބަދަލުކޮށްފައިވާކަން ރައީސް އޮފީހުން އަންގާފައިވާ ކަމަށާއި ހޮސްޕިޓަލް ހިންގުމާ ގުޅޭ ތަފްސީލީ މައުލޫމާތުތައް އަންނަ ހަފުތާގައި ހާމަކުރާނެ ކަމަށެވެ.

އާސަންދަ ކުންފުނީގެ ދަށަށް ހުޅުމާލެ ހޮސްޕިޓަލް ބަދަލުކުރީ ކުރީގެ ރައީސް އަބްދުﷲ ޔާމީންގެ ސަރުކާރުގައެވެ.

އާސަންދައިން އެ ހޮސްޕިޓަލާ ހަވާލުވުމަށް ފަހު އެތަނަށް ބޮޑެތި ކުރިއެރުންތަކެއް ގެނެސްފައިވާއިރު އޭގެ ތެރޭގައި ކެންސަރަށް ފަރުވާ ކުރެވޭ އޮންކޮލޮޖީ ސެންޓަރެއް ހުޅުވުމާއި އެމްއާރުއައި ހިދުމަތާއި ސީޓީ ސްކޭނާއި މެމޯގްރާމް ހެދޭނެ ވަސީލަތްތައް ގާއިމުކޮށްފައި ވެއެވެ.

މީގެ އިތުރުން ކެންސަރު ދެނެގަތުމަށް ޓެސްޓް ކުރުމާއި ކެންސަރަށް ކުރާ ފަރުވާގެ މުހިންމު ބަޔަކަށްވާ ދިރިއުޅުމުގެ އާދަތައް ދަސްކޮށްދިނުމާއި ކެންސަރަށް މީހުން ހޭލުންތެރި ކުރުން ފަދަ ހިދުމަތްތައް ވަނީ އެ ހޮސްޕިޓަލުން ދޭން ފަށާފައެވެ. މާލޭގައި ބޭނުންކުރާ އެމްއާރުއައި މެޝިންތަކުގެ ތެރެއިން އެންމެ އެޑްވާންސް މެޝިން ހުންނާނީ ހުޅުމާލެ ހޮސްޕިޓަލްގައި ކަމަށް މައުލޫމާތު ލިބިފައި ވެއެވެ. 

އާސަންދަ ކުންފުންޏާ ހަވާލުކޮށްގެން އެ ހޮސްޕިޓަލް ހިންގަން ފެށި ފަހުން ފާއިތުވި ދެ އަހަރުގެ ތެރޭ އާސަންދަ ސްކީމުން 193 މިލިޔަނަށް ވުރެ ގިނަ ރުފިޔާ އެ ހޮސްޕިޓަލަށް ހަރަދު ކޮށްފައިވާ ކަމަށް އޮޑިޓް ރިޕޯޓުގައި ބުނެފައިވާއިރު އާސަންދަ ކުންފުނިން އޮޑިޓް އޮފީހަށް މައުލޫމާތު ދީފައި ވަނީ އެގޮތަށް ހަރަދުކުރަން ޖެހުނީ ބަޖެޓްކުރި ފައިސާ އެ ކުންފުންޏަށް ދޫކޮށްފައި ނުވާތީ އެ ހޮސްޕިޓަލްގެ ހިދުމަތްތައް މެދުނުކެނޑި ކުރިއަށް ގެންދިއުމަށް ކަމަށެވެ.

އާސަންދަ އިން ހުޅުމާލެ ހޮސްޕިޓަލަށް ޚަރަދުކޮށްފައި ވަނީ، އެތަނުގެ ކެޕިޓަލް ޚަރަދުތައް ކުރަން 2016 ގައި 260 މިލިޔަން ރުފިޔާގެ ބަޖެޓެއް ވެސް ފާސްކޮށްފައި ވަނިކޮށެވެ.

އާސަންދަ އިން ޚިދުމަތް ދިން ސިއްހީ މަރުކަޒުތަކަށް ދޭން ޖެހޭ ފައިސާ ނުދެވި ލަސްވެފައި ވަނީ އެހެންވެ ކަމަށް ނޮވެމްބަރު މަހު ނެރުނު އާސަންދަ އޮފީހުގެ އޮޑިޓް ރިޕޯޓުގައި ބުނެފައި ވެއެވެ.