100 މިލިއަނަކީ އަޅުގަނޑުގެ ސައްހަ ފައިސާ، ފުލުހުން އެ މައުލޫމާތު ހާމަކުރީތީ ހިތާމަކުރަން: ޔާމިން
18 ޑިސެމްބަރު 2018 | އަންގާރަ 13:18ތުހުމަތެއް ކުރާނަމަ ތުހުމަތުން ބަރީއަ ވެވަޑައިގަންނަވާނެ ކަމަށް ވިދާޅުވި
ކުރީގެ ރައީސް ޔާމީން ޕީޕީއެމްގެ އޮފީހުގައި
އެމަނިކުފާނުގެ އެކައުންޓްގައި ގާނޫނާ ހިލާފަށް ހޯދާފައިވާ އެއްވެސް ފައިސާއެއް ނުހުންނާނެ ކަމަށް ކުރީގެ ރައީސް އަބްދުﷲ ޔާމިން ވިދާޅުވެއްޖެއެވެ.
އަންނަ އަހަރު ބާއްވާ މަޖިލިސް އިންތިހާބުގައި ވާދަ ކުރެއްވުމަށް ޕީޕީއެމް ޓިކެޓް ލިބޭނެ ކަމުގެ ލިޔުން އެ ޕާޓީގެ މެމްބަރުންނާ ހަވާލު ކުރުމަށް ޕީޕީއެމް އޮފީހުގައި ބޭއްވި ހަރަކާތަކަށްފަހު ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޔާމިން ވިދާޅުވީ އެމަނިކުފާނުގެ އެކައުންޓްގައި ހުރި ހުރިހާ ފައިސާއަކަށް ޒިންމާ އުފުލައްވާ ކަމަށެވެ. އަދި އެއީ މީހެއްގެ ފައިސާއެއް ނޫން ކަމަށާއި އެމަނިކުފާނުގެ ސައްހަ ފައިސާ ކަމަށް ވިދާޅުވިއެވެ.
"މިއަދުވެސް ރައްޔިތުންނަށް ކަށަވަރުކަން އަރުވަން ބޭނުން މި 100 މިލިއަން ރުފިޔާގެ ވާހަކައިގައި، އޭގައި ނުހުންނާނެ ގާނޫނާ ހިލާފު އެންމެ ލާރިއެއް ވެސް. ގާނޫނާ ހިލާފު އެންމެ ލާރިއެއްވެސް ނޯންނާނެ، ދައުލަތުގެ ތަހުގީގު އިދާރާއަކުން ނުވަތަ އެހެންވެސް އިދާރާއަކުން އެ 100 މިލިއަން ރުފިޔާގެ ތަފްސީލްގެ ތުހުމަތެއް އަޅުގަނޑަށް ކުރައްވައިފި ކަމަށްވަންޏާއި އެ ތުހުމަތުން އަޅުގަނޑު ބަރީއަ ވާނަން. މިތާ ހުންނާނީ ޖާއިޒު ފައިސާ. މިތަނާ ހުންނާނީ ސައްހަ ފައިސާ. މިއީކީ ދައުލަތުގެ ފައިސާއެއްވެސް ނޫން. އެއީ މީހެއްގެ ފައިސާއެއް ވެސް ނޫން. މިތާކު ނުހުންނާނެ ގާނޫނާ ހިލާފު ފައިސާއެއް،" ޔާމިން ވިދާޅުވިއެވެ.
ރައީސް ޔާމިން ވިދާޅުވީ އެމަނިކުފާނު މާލީ ބަޔާނެއް ހުށައަޅުއްވާފައިވާނެ ކަމަށާއި އެހެން ނަމަވެސް ފުލުހުން އެ ބަޔާނުގައި ފައިސާގެ އަދަދާ ގުޅިގެން އެއްވެސް ސުވާލެއް މިހާތަނަށް އެމަނިކުފާނާ ކުރައްވާފައިނުވާ ކަމަށެވެ. އަދި ވިދާޅުވީ އެމަނިކުފާނުގެ އެކައުންޓްގައި އެ އަދަދަށް އެ ފައިސާ ހުރެގެން އެއްވެސް ތުހުމަތެއްވެސް ފުލުހުން ކުރައްވާފައިނުވާ ކަމަށެވެ.
"މީހެއްގެ އެކައުންޓްގައި ފައިސާ ހުރުމަކީ މީހަކަށް ތުހުމަތު ކުރެވޭ ކަމެއް ނޫން. އަޅުގަނޑު މިއީ ކުރިން 800 މިލިއަން ޑޮލަރު ގެންގުޅުނު މީހެއް. ތި ސަތޭކަ މިލިއަން ރުފިޔާއަކީ 800 މިލިއަން ޑޮލަރާ އަޅާ ބަލާއިރު ނިސްބަތުން ވަރަށް ކުޑަކުޑަ އެއްޗެއް ނޫންތޯ. ދެން ފުލުހުން އަޅުގަނޑު ގާތުން އައްސަވާ މި 100 މިލިއަން ރުފިޔާ މި އައިސްފައި އޮތީ މިވެނި ކަމަކަށޭ. އޭރުން އަޅުގަނޑު އެ ތުހުމަތުން ބަރީއަ ވާނަން،" ޔާމިން ވިދާޅުވިއެވެ.
ރައީސް ޔާމިން ވިދާޅުވީ އެމަނިކުފާނުގެ މާލީ ބަޔާނުގައިވާ މައުލޫމާތު ފުލުހުން ބޭނުން ކުރަންވާނީ ޖާއިޒު ގޮތުގައި ކަމަށާއި އެ މަނިކުފާނުގެ އެކަންޓްގައި ހުރި ފައިސާއާ ބެހޭ މައުލޫމާތު ބޭނުން ކުރައްވާފައިވަނީ ނާޖާއިޒު ގޮތުގައިކަމަށެވެ.
"ދިވެހި ރައްޔިތުންނަށް މިއަދުވެސް އަޅުގަނޑު ދަންނަވާލަން ބޭނުންވަނީ އަޅުގަނޑު ވަރަށް ހިތާމަކުރަން އަޅުގަނޑުގެ މާލީ ބަޔާން މި ގޮތައް ނާޖާއިޒް ގޮތެއްގައި ބޭނުން ކުރެވުނީމަ. މީހުންގެ އެކައުންޓްގައި ހުންނަ ފައިސާއަކީ މީހުންގެ ޕްރައިވެޓް ނޮލެޖް. މީހުން ޕްރައިވެޓް މައުލޫމާތު،" ޔާމިން ވިދާޅުވިއެވެ.
ރައީސް ޔާމިންގެ ނަމުގައި އިސްލާމިކް ބޭންކްގައި ހުޅުވާފައިވާ އެކައުންޓަކަށް 22 މިލިއަން ރުފިޔާ ވަދެފައިވާ މައްސަލައެއް ފުލުހުން ދަނީ ތަހުގީގު ކުރަމުންނެވެ. ފުލުހުން ހާމަކޮށްފައިވާ ގޮތުގައި ރައީސް ޔާމިންގެ ދެ ކައުންޓެއް ފްރީޒްކޮށްފައިވާއިރު އެ އެކައުންޓްތަކުގައި ހުރި ފައިސާގެ ޖުމްލަ 100 މިލިއަން ދިވެހި ރުފިޔާއަށްވުރެ ގިނައެވެ.
