އިމާރަތްކުރާ ތަންތަނުގެ ސަލާމަތާއި ރައްކާތެރިކަން ކަށަވަރު ކުރުމަށް ސަރުކާރުން ފަށާފައިވާ މަސައްކަތުގެ ދަށުން 161 ކޮންސްޓްރަކްޝަން ސައިޓެއްގެ އިންސްޕެކްޝަން އަންގާރަ ދުވަހު ފަށައިފިއެވެ.

އެ އިންސްޕެކްޝަން ކުރިއަށް ގެންގޮސްފައިވަނީ މިނިސްޓްރީ އޮފް ނެޝަނަލް ޕްލޭނިންގ އެންޑް އިންފްރާސްޓްރަކްޗަރއާއި، ހައުސިން މިނިސްޓްރީއާއި، މާލޭ ސިޓީ ކައުންސިލުގެ އަދި އެމްއެންޑީއެފް ގުޅިގެންނެވެ. 

މާލެ ނުވަ ޒޯނަކަށް ބާހަލައިގެން އިންސްޕެކްޝަން ކުރިއަށް ގެންދާއިރު، ހުއްދަ ނުހޯދައި އިމާރަތްކުރަމުންދާ ތަންތަނުގެ މި އިންސްޕެކްޝަނުން އެނގިގެން ދާނެ ކަމަށް ޕްލޭނިން މިނިސްޓްރީން ބުނެ އެވެ. 

ޕްލޭނިން މިނިސްޓްރީގެ އޮފިޝަލަކު ވިދާޅުވީ މިހާތަނަށް ބެލި ބެލުމުން އިމާރަތްކުރާ ތަންތަނުގައި އުޅޭ މަސައްކަތު މީހުންގެ ރައްކާތެރިކަމާއި ސަލާމަތީ ފިޔަވަޅުތައް އެކަށީގެންވާ ގޮތެއްގައި އަޅާފައި ނުވާކަން ފާހަގަކުރެވޭ ކަމަށާއި، އެ ތަންތަނުގެ މަސައްކަތްތައް ދާ ގޮތް ބަލަން ސުޕަވައިޒަރުން ނުތިބޭ ކަމަށެވެ. 

"ސައިޓުގެ ސޭފްޓީއަށްވުރެ ލޭބަރާރސްގެ ސޭފްޓީ މި ތަންތަނުގައި އެންޝުއަރ ކުރެވިފައި ނެތް އެއްވެސް ވަރަކަށް. ދެން ސޭފްޓީ ޝޫސް ، މާސްކް ކަހަލަ އެއްޗެހި ބޭނުން ނުކުރޭ ވަރަށް. ގިނަ ސައިޓުތަކުގައި ލޭބަރަރސް އެކަނި ބަހައްޓާފައި މި ހުންނަނީ. ސުޕަވައިޒަރަކަށް މި ޖެހެނީ ހަމަ އަަޅުގަނޑުމެންވެސް މަސައްކަތް ހިނގާ ގަޑީގައިވެސް ގުޅައިގެން ގެންނަން. ސުޕަވައިޒަރުން ނެތްކަން ފާހަގަކުރެވޭ ހަމަ." އޮފިޝަލް ވިދާޅުވި އެވެ. 

 

އަންގާރަ ދުވަހު ހެނދުނު 09:00 އިން މެންދުރު 12:00 އަށް އިންސްޕެކްޝަން ކުރިއަށް ގެންގޮސްފައިވާއިރު، އަދި މެންދުރު 14:00 އިން 18:30 އަށް ވެސް އިންސްޕެކްޝަން ކުރިއަށް ގެންދާނެ އެވެ.