މާލެ އައީ ޗުއްޓީ ހޭދަކޮށްލަން، ލިބުނީ ފުން ހިތާމައެއް!

މާފަންނު ނަލަހިޔާ ސަރަހައްދުން ހިނގާފައި ދަނިކޮށް އެ ސަރަހައްދުގައި އިމާރަތްކުރަމުންދިޔަ އިމާރާތަކުން ސިމެންތި ބަސްތާއެއް ވެއްޓި، ކުޑަ ކުޖަކަށް ސީރިއަސް އަނިޔާތަކެއް ލިބުނުއިރު، އެ ހާދިސާގެ ވިޑިއޯ ފުޓޭޖް އިން ފެންނަ ދެމައިންނަކީ ރާއްޖޭގައި މަސައްކަތް ކުރާ ބަނގްލަދޭޝް ޑޮކްޓަރެއްގެ ކުޑަ ކުޑަ އާއިލާއެވެ. ޗުއްޓީ ހޭދަކޮށްލުމަށް މާލެ އައިއިރު، ކުރިއަށް އޮތް ހިތާމައިގެ ހިލަމެއްވެސް އެ އާއިލާއަކަށް ނުވެއެވެ. ނަމަވެސް އެ ހިތާމަވެރި ހާދިސާގައި ލިބުނު ގެއްލުމުގައި ހަތް އަހަރުގެ ކުއްޖާ މިހާރު އޮތީ އައިޖީއެމްއެޗުގައި ސީރިއަސް ހާލުގައެވެ.

މި ހަދިސާއާ ގުޅިގެން އާންމުވެފައިވާ ސީސީޓީވީ ފުޓޭޖް އިން އެކުއްޖާ މަންމައާއެކު އެ ސަރަހައްދުން ހިނގާފައި ދަނިކޮށް، މަތިން ސިމެންތި ބަސްތާއެއް ވެއްޓޭތަން ފެނެއެވެ. އަންހެން މީހާއަށް އެއްވެސް އަނިޔާއެއް ލިބިފައި ނުވި ނަމަވެސް ސިމެންތި ބަސްތާ ވެއްޓެނީ އެ ކުޑަ ކުއްޖާގެ ބޮލަށެވެ. ވީޑިއޯ އިން ފެންނަ ގޮތުގައި އެ ބަސްތާ ވެއްޓުމާއެކު އެ ކުއްޖާގެ ހަށިގަނޑުން ހަރަކާތް ހުއްޓެއެވެ.

އެ ވީޑިއޯ އިން ފެންނަ ގޮތުގައި އެ ހާދިސާ ހިނގިއިރު، އެ ސަރަހައްދުގައި އިންޒާރުގެ ބޯޑު ވެސް ބަހައްޓާފައި ހުއްޓެވެ.

މީސްމީޑިއާގައި އެ ފުޓޭޖް ވައިރަލް ވުމާއެކު، އެއްބަޔަކު ކުށްވެރި ކުރީ އެ ސަރަހައްދުގައި ބޯޑެއް ބަހައްޓާފަ ހުއްޓައި ކުޑަ ކުއްޖަކު ގޮވައިގެން އެތަނުން ދިޔަ މަންމައެވެ. އަނެއް ބަޔަކު ބުނަމުން ދިޔައީ އެއީ އިމާރާތްކުރުމުގެ މަސައްކަތް ކުރާ ފަރާތުގެ އިހުމާލު ކަމަށެވެ. މީގެ އިތުރުން، އަނެއް ބަޔަކު ކުށްވެރި ކުރީ އެތަނުގައި މަސައްކަތް ކުރި ބިދޭސީ މުވައްޒަފުންނެވެ. ކޮންމެ މިހާކުވެސް ޤަބޫލުކުރާ އެއް ހަޤީޤަތަކީ މި ހިތާމަވެރި ހާދިސާގެ ފަހަތުގައި ބައެއްގެ ބޮޑެތި އިހުމާލުތަކެއް ވާކަމެވެ.

މި ހާދިސާއާ ގުޅިގެން މާލޭ ސިޓީ ކައުންސިލުގެ މޭޔަރ ޝިފާ މުހައްމަދު ވިދާޅުވީ، އަނިޔާވެފައިވަނީ ރާއްޖެއަށް ޗުއްޓީ ހޭދަކޮށްލަން އައި އާއިލާއެއްގެ 7 އަހަރުގެ ކުއްޖަކަށް ކަމަށާއި، އެ ހާދިސާގައި އެކުއްޖާގެ ބޮލަށާއި ހަށިގަނޑަށް ބޮޑެތި ގެއްލުންތަކެއް ލިބިފައިވާ ކަމަށެވެ. މޭޔަރ އިތުރަށް ވިދާޅުވީ، ފާއިތުވި އަހަރުތަކުގައި މާލޭ ސިޓީ ބެލެހެއްޓުމުގެ ކަންކަން އޮތީ ވަރަށް ދޯދިޔާކޮށް ކަމަށެވެ.

"ގާތްގަނޑަކަށް 5 އަހަރު މިވަނީ މިހެންހުރި ހުރިހާ މަސައްކަތްތަކެއް ބޭނުންހާ ގޮތަކަށް ކުރީގެ ސަރުކާރުން ދޫކޮށްލެވިފަވާތީވެ އަޅުގަނޑުމެން ހަމަ މަގަށް އެޅުވުމަށްޓަކައި މާދަމާގެ ބައްދަލުވުންވެސް ޝެޑިއުލް ކޮށްފަ މި އޮތީ" މޭޔަރ ވިދާޅުވިއެވެ.

އިމާރަތްކުރުމުގެ ދާއިރާގައި ހަރަކާތްތެރިވާ ކުންފުނިތަކުން ވަރަށް ދޫދިޔާކޮށް އަމަލުކުރަމުންގެންދާކަމުގެ ޝަކުވާތައް އަބަދުވެސް އާންމުންކުރެ އެވެ. އެތަށް ފަހަރަކު އެކި މީހުންނަށް އެކި އެކި އަނިޔާތަށް ލިބިފައިވެއެވެ. މަގުމަތީގައި ތޫނު އެއްޗެހި ބެހެއްޓުމާއި، ހިތުހުރި ތަނެއްގައި މުދާ ބެހެއްޓުމުން ފެށިގެންގޮސް އެތަށް އެތަށް ޝަކުވާތަކަކަކީ މާލޭގައި ދިރިއުޅޭ އާންމު ރައްޔިތުން އަބަދުވެސް ކުރާ ބޮޑެތި ޝަކުވާތަކެކެވެ.

ނޫސްވެރިންނާއި ވާހަކަދައްކަވަމުން ޕްލޭނިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ އިމާރަތްކުރުމުގެ ކަންކަމުގައި ކުންފުނި ތަކުން ބޮޑު ޒިންމާއެއް އަދާކުރަން ޖެހޭކަމަށެވެ. އަދި ކުންފުނިތަކުން އަމަލުކުރަނީ ވަރަށް ދޯދިޔާ އުސޫލެއްގެ ދަށުންކަން ފާހަގަކުރެވިފައިވާކަމަށް އޭނާ ވިދާޅުވި އެވެ.

"އަޅުގަނޑަށް ހީވަނީ މީގަ އެބަ އޮތްހެން ހަމަ ކޮންސްޓްރަކްޝަން ކުންފުނިތަކުގެ ވަރަށް ބޮޑު ޒިންމާއެއް. އެއީ ސޭފްޓީ. ސޭފްޓީ އަކީ ކޮންމެހެން ޤަވާއިދު ހެދިޔަސް ނުހެދިޔަސް ރަނގަޅަށް ބަލަން ޖެހޭ ކަންކަން. އަޅުގަނޑަށް މައުލޫމާތު ލިބިފައިވާ ގޮތުގައި މިއަދު އެ ހިނގި ހާދިސާ ހިނގާފައިވާއިރު، އެކަން ކުރުމަށް ހުއްދަވެސް ނަގާފައެއް ނެތް. ބޯޑުވެސް ނަގާފައި ބޯޑުވެސް ނަގާފައި އެ އޮތީ އެހެން ކަމަކަށް ނަގާފައި އޮތް ބޯޑެއް ކަމަށް އަޅުގަނޑުމެންނަށް މައުލޫމާތު ލިބޭ" އަކުރަމް ވިދާޅުވިއެވެ.

ކޮންމެ މީހެއްގެ އިހުމާލުން ވިޔަސް މިފަދަ ހާދިސާތައް ހިނގާ މިންވަރު އިތުރުވެފައިވުމަކީ ކަންބޮޑުވާން ޖެހޭ ކަމެކެވެ. އަދި އެކަމަށް އަވަސް ހައްލެއް ގެންނަން ޖެހޭ ކަމެއް ވެސް މެއެވެ. މުޖުތަމައުގައި ހިނގާ މިފަދަ ހިތާމަވެރި ހާދިސާތައް މަދުކުރެވޭނީ މުއައްސަސާތަކާއި ކުންފުނި ތަކުގެ އިތުރުން އަމިއްލަ ފަރުދުންގެ ޒިންމާވެސް އެންމެ ފުރިހަމައަށް އަދާކޮށްގެންނެވެ.