ކެނެޑާގެ ޑިޕްލޮމެޓެއް ހައްޔަރު ކުރިތާ މާގިނަ ދުވަސްތަކެއް ނުވަނީސް ކެނެޑާގެ އިތުރު މީހަކު ޗައިނާއިން ހައްޔަރު ކޮށްފައިވާ ކަމަށް ރިޕޯޓްތައް ބުނެފިއެވެ.
ހޯމަ ދުވަހު ޗައިނާގެ ލިއައޮނިން ޕޮރްވިންސުން ކެނެޑާ މީހަކު ހައްޔަރު ކުރެވިފައިވާ ކަމަށް ލިއައޮނިން ޕޮރްވިންސުގެ އޮފިޝަލުންނާއި ހަވާލާދީ ޗައިނާގެ ނޫސްތަކުން ރިޕޯޓް ކުރެއެވެ.
ހައްޔަރު ކޮށްފައިވަނީ މައިކަލް ސްޕަވޯ ނަމަކަށް ކިޔާ މީހެއްކަމަށާއި، އޭނާ ހައްޔަރު ކުރެވިފައިވަނީ ޗައިނާގެ ގައުމީ ސަލާމަތަށް ނުރައްކާވާ ކަމަށް ޝައްކު ކުރެވިގެން ކަމަށް އޮފިޝަލުން ބުނެއެވެ.
ބައެއް މަސްދަރުތައް ބުނާ ގޮތުގައި ސްޕަވޯ އަކީ ވިޔަފާރި ވެރިއެއް ކަމަށާއި، ނޯތް ކޮރެއާގެ ލީޑަރު ކިމް-ޖޮންގް އުންއާ ގާތްގުޅުމެއް އޮންނަ މީހެއް ކަމަށެވެ.
ކެނެޑާގެ ފޮރިން މިނިސްޓްރީއާ ހަވަލާދީ ރިޕޯޓްތައް ބުނާ ގޮތުގައި ޗައިނާއިން ހައްޔަރު ކޮށްފައިވާ ކެނެޑާގެ ކުރީގެ ޑިޕޮލޮމެޓް މައިކަލް ކޮވްރިގުގެ އިތުރުން ސްޕަވޯ ހައްޔަރު ކޮށްފައިވާ ކަމުގެ މައުލޫމާތު ލިބިފައިވާ ކަމަށެވެ. އަދި އެ މައްސަލާގެ އިތުރު ތަފްސީލު ހޯދަމުންދާ ކަމަށް ކެނެޑާގެ ފޮރިން މިނިސްޓްރީއާ ހަވާލާދީ ރިޕޯޓްތައް ބުނެއެވެ.
ޗައިނާއިން ކެނެޑާގެ ދެވަނަ މީހަކު ހައްޔަރު ކޮށްފައިވާއިރު، ކެނެޑާއިން ހައްޔަރު ކުރި ޗައިނާގެ ވާވޭ ކުންފުނީގެ ސީއެފްއޯ މެންގް ވަންޒޫ ކަފާލާތުގެ ދަށުން މިނިވަން ކޮށްފައިވަނީ ބުދަ ދުވަހުއެވެ.
