އައިއެމްޓީއެމް ފެއަރ އަންނަ އަހަރު ޖޫން މަހު

އިންޓަނޭޝަނަލް މޯލްޑިވްސް ޓްރެވަލް މާކެޓް ފެއަރ އަންނަ އަހަރުގެ ޖޫން މަހު ބާއްވަން ނިންމައިފިއެވެ.

އައިއެމްޓީއެމް ޕްރައިވެޓް ލިމިޓެޑުން ކުރިއަށްދާ މި ފެއަރ ބޭއްވުމަށް ހަމަޖެހިފައިވަނީ 2019 ވަނަ އަހަރުގެ ޖޫން މަހުގެ 22 އިން 23 އަށް ހުޅުމާލޭގެ ދެވަނަ ފިޔަވަހީގައެވެ.

މި ފެއަރ ބޭއްވުމުގެ މަގުސަދަކީ ރާއްޖޭގެ ރިސޯޓުތަކާއި ގެސްޓްހައުސް، ލިވަބޯޑްސް، ޓުއަ އޮޕަރޭޓާސް އަދި ޑައިވިން ސްކޫލުތަކަށް ޕްލެޓްފޯމެއް ހުޅުވައިދިނުން ކަމަށާއި މި ފެއާގައި ރާއްޖެއިން 200 ފަރާތަކަށް ބައިވެރިވުމުގެ ފުރުސަތު ހުޅުވާލާފައިވާ ކަމަށް އައިއެމްޓީއެމް އިން ވަނީ ބުނެފައެވެ.

ފެއަރގައި ބައިވެރިވުމަށް ރަޖިސްޓްރީ ކުރަން ބޭނުންވާ ފަރާތްތަކަށް އައިއެމްޓީއެމްގެ ވެބްސައިޓް www.imtmonline.com/visitorregistration މެދުވެރިކޮށް، ޖެނުއަރީ މަހުގެ 20 ވަނަ ދުވަހާއި ހަމައަށް ރަޖިސްޓްރީ ކުރުމުގެ ފުރުސަތު ވަނީ ހުޅުވާލާފައެވެ. އަދި މި ޓޫރިޒަމް ފެއަރގައި ބައިވެރިވާން ބޭނުންވާ ފަރާތްތަކަށް ބޮލަކަށް 250 ޑޮލަރު ދެއްކުމުން ބައިވެރިވެވޭނެއެވެ.

އައިއެމްޓީއެމް އިން ބުނީ އަންނަ އަހަރުގެ ފެއަރގައި 25 ގައުމަކުން ރެޕްރެޒެންޓޭޓިވުން އަދި 300 ޓްރޭޑް ވިޒިޓަރުން ބައިވެރިވާނެ ކަމަށެވެ.

މިއަހަރު މި ފެއަރ ބާއްވާފައިވަނީ އަދާރަން ސެލެކްޓް ހުދުރަންފުށި ރިސޯޓުގައެވެ. އަދި ޓޫރިޒަމް މިނިސްޓްރީގެ ފަރާތުން ވަނީ ފެއަރ އެންޑޯޒް ވެސް ކޮށްފައެވެ.