ރާއްޖެޓީވީގެ ކުރީގެ ޗީފް އޮޕަރޭޓިން އޮފިސަރ (ސީއޯއޯ) ހުސައިން ފިޔާޒް މޫސާއަށް ނޫސްވެރިކަމުގެ ދާއިރާއިން ލިބުނު ރަންގަލަން ރާއްޖެޓީވީގެ މުއައްޒަފުންނަށް ހަދިޔާ ކޮށްފިއެވެ.

ރަންގަލަން ހަދިޔާ ކުރުމަށްފަހު ފިޔާޒު ވިދާޅުވީ އެ ގަލަން ރާއްޖެޓީވީގެ ނޫސްވެރިންނަށް ހަދިޔާ ކުރީ ރާއްޖޭގެ ނޫސްވެރިކަމުގެ 75 އަހަރު ދިވެހި ހުރިހާ ނޫސްވެރިން ކުރި މަސައްކަތަށްވުރެ ވެތުވެދިޔަ 7 އަހަރު ރާއްޖެޓީވީގެ ނޫސްވެރިން ކުރި މަސައްކަތަކީ މާބޮޑު ޤުރުބާނިއަކަށް ވުމުންކަމަށެވެ.

"އަޅުގަނޑު ރާއްޖެޓީވީގެ ހުރިހާ ސްޓާފުންނަށް ރޭގަ އަޅުގަނޑަށް ލިބުނު ޝަރަފުގެ އެވޯޑު ހަދިޔާ ކުރަން ނިންމީ، އަޅުގަނޑު ގަބޫލުކުރާގޮތުގައި ރާއްޖޭގެ ނޫސްވެރިކަމުގެ ހަޔާތުގައި ވޭތުވެދިޔަ 75 އަހަރު ދިވެހި ހުރިހާ ނޫސްވެރިން ކުރި މަސައްކަތަށްވުރެ މާ ބޮޑު ގުރުބާނީއެކޭ މި ވޭތުވެދިޔަ 7 އަހަރު ދުވަހުގެ ތެރޭގައި ކުރީ. ހަމަ ޖަލަށް ލާއިރަށް ނިކުމެގެން ދުއްވައިގަންނަނީ މަގުމައްޗަށް ނުވަތަ ލިޔުމުގައި. ޖޫރިމަނާ ކުރާއިރަށް ޖެހިގެން އަންނަ ދުވަހު ޖޫރިމަނާ ދެއްކުމަށްފަހު އަނެއްކާވެސް މަސައްކަތުގައި. ފަހަތަށް ޖެހުމެއް ނެތި. އަޅުގަނޑު ގަބޫލުކުރާ ގޮތުގައި މިތަނުގެ މުވައްޒަފެއްގެ ގޮތުގައި ހުރެ އަޅުގަނޑަށް މި ޝަރަފު ލިބުނު ކަމުގައި ވިއަސް އެންމެ ހައްގުވެރި ފަރާތަކީ ރާއްޖެޓީވީގެ މުވައްޒަފުންނޭ،" ފިޔާޒު ވިދާޅުވިއެވެ. 

ރާއްޖޭގެ ނޫސްވެރިކަމުގެ ދާއިރާއަށް ހިދުމަތް ކޮށްދިނުމުގައި ފާހަގަކޮށްލެވޭ ފަރާތްތަކަށް ދެވޭ ނޫސްވެރިކަމުގެ ރަން ގަލަން ފިޔާޒަށް ލިބުނީ ނޫސްވެރިކަމުގެ އަލިމަސްޔޫބިލް ފާހަގަކުރުމަށާއި، ވޭތުވެ ދިޔަ އަހަރުގެ ނޫސްވެރިކަމުގެ އެވޯޑު ލިބުނު ފަރާތްތަކަށް އިނާމު ދިނުމަށް ދަރުބާރުގޭގައި އަންގާރަ ދުވަހު ބޭއްވި ހަފްލާގައެވެ. 

ފިޔާޒު އެންމެ ފުރަތަމަ ނޫސްވެރިކަމުގެ ދާއިރާއަށް ނުކުތީ އާފަތިސް ނޫހުންނެވެ. އެއަށްފަހު ފިޔާޒު ވަނީ ހަވީރު ނޫހުގައި ވެސް މަސައްކަތްކޮށްފައެވެ. އަދި ތިން އަހަރަށް ވުރެ ދިގު މުއްދަތަކަށް ވަނީ ރާއްޖެޓީވީގެ ޗީފް އޮޕަރޭޓިންގ އޮފިސަރކަން ވެސް ކޮށްފައެވެ.