އަށާރަ އަހަރަށް ފަހު ޕާޓީގެ ލީޑަރުކަމުން އެންޖެލާ މާކެލް ވަކިވެ ވަޑައިގަންނަވައިފި
9 ޑިސެމްބަރު 2018 | އާދީއްތަ 13:49ޕާޓީގެ ލީޑަރުކަމަށާއި އެ ގައުމުގެ ޗާންސެލާކަން ކުރެއްވި ފުރަތަމަ އަންހެން ބޭފުޅާ
ޖަރުމަނުގެ ޗާންސެލާ އެންޖެލާ މާކެލް
ޖަރުމަނުގެ ވެރިކަން ކުރާ ކޯލިޝަންގެ މައި ޕާޓީ ކްރިސްޓިއަން ޑިމޮކްރެޓިކް ޔޫނިއަންގެ ލީޑަރުކަމުން އެންޖެލާ މާކެލް، އަށާރަ އަހަރަށް ފަހު ވަކިވެ ވަޑައިގަންނަވައިފި އެވެ.
މާކެލް ވަނީ އޮކްޓޫބަރު މަހު ޕާޓީގެ ލީޑަރުކަމުގެ މަގާމުން އިސްތިއުފާ ދެއްވާނެކަން އިއުލާން ކުރައްވާފައެވެ. ނަމަވެސް ރަސްމީކޮށް އެކަމަނާ މަގާމުން ވަކިވެ ވަޑައިގެންނެވީ، އެ ޕާޓީގެ ލީޑާރުކަމަށް ބޭފުޅަކު އައްޔަނު ކުރެއްވުމަށް ހުކުރު ދުވަހު ބޭއްވުނު ކޮންގްރެސް އެއްގައެވެ.
ޕާޓީގެ ލީޑަރުގެ ގޮތުގައި ހުންނަވައިގެން މާކެލް ދެއްވި އެއްމެ ފަހު ހިތާބު ނިމުމުން އެކަމަނާ އަށް ވަނީ ދިހަ މިނިޓަށް ދިގުދެމިގެން ދިޔަ އަތްތިލަބަޑީގެ ސަލާމެއް އަރުވާފައެވެ. ވަރަށް އަސަރުން ފުރިފައި ހުރެ މާކެލް ވިދާޅުވެފައި ވަނީ ޕާޓީގެ ލީޑަރުކަން ކުރުމަކީ އެކަމަނާ އަށް ލިބިގެންދިޔަ ވަރަށް ބޮޑު ފަހުރެއް ކަމަށެވެ.
މާކެލްއަށް ފަހު ޕާޓީގެ ލީޑަރުކަމަށް އައްޔަން ކުރެވިފައި ވަނީ އެނެގްރެޓް ކްރަމްޕް-ކެރެންބާއެވެ. އެނެގްރެޓްއަކީ މާކެލްގެ ވަރަށް އަރިސް، ސިޔާސީ ފިކުރު އެއްގޮތް ބޭކަނބަލެކެވެ.
ޖަރުމަނުގެ އެންމެ ފުރަތަމަ އަންހެން ޗާންސެލަރ އަކަށް ވެވަޑައިގަތުމުގެ ޝަރަފު ލިބިވަޑައިގެންނެވި، މާކެލްގެ ޒައާމަތުގައި ޖަރުމަނުގެ އިގްތިސާދު ވަނީ ވަރަށް ބޮޑުތަން ކުރިއަރައިގެން ގޮސްފައެވެ.
