ނޫސްވެރިކަމުގެ ޤައުމީ އިނާމު ދިނުމުގެ ރަސްމިއްޔާތުގައި އަންގާރަ ދުވަހު، ރައީސް ސޯލިހް ބައިވެރިވެ ވަޑައިގަންނަވާ
މީގެ ކުރީގެ އަހަރުތަކުގައި އެއްވެސް ރައީސްއަކު ނޫސްވެރިކަމުގެ އިނާމް ދިނުމުގެ ހަފްލާގައި ބައިވެރިވެ ވަޑައިގެންފައެއް ނުވޭ
2015 ވަނަ އަހަރު ބޭއްވި ނޫސްވެރިކަމުގެ އެވޯޑް ދިނުމުގެ ރަސްމިއްޔާތުގެ ތެރެއިން
ނޫސްވެރިކަމުގެ ޤައުމީ އިނާމު ދިނުމުގެ ރަސްމިއްޔާތު، އަންގާރަ ދުވަހުގެ ރޭ ބާއްވާއިރު އެ ޖަލްސާގައި ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް ބައިވެރިވެ ވަޑައިގެންވުމަށް ހަމަޖެހިއްޖެއެވެ.
މިއީ ނޫސްވެރިކަމުގެ އިނާމް ދިނުމުގެ ހަފްލާއަކަށް ރައީސަކު ވަޑައިގަންނަވާ ފުރަތަމަ ފަހަރެވެ. މީގެ ކުރީ އަހަރުތަކުގައި އެއްވެސް ރައީސަކު ނޫސްވެރިކަމުގެ އިނާމް ދިނުމުގެ ހަފްލާގައި ބައިވެރިވެ ވަޑައިގެންފަ އެއް ނުވެއެވެ.
ޖުމްހޫރީ ފަންސާހާ ގުޅިގެން، ދިވެހި ނޫސްވެރިކަމުގެ އަލިމަސްޔޫބީލު ފާހަގަކުރުމަށާއި ނޫސްވެރިކަމުގެ އިނާމު ދިނުމަށް ބާއްވާ މި ޖަލްސާގައި ރައީސްގެ އިތުރުން ހޯމް މިނިސްޓަރ ޝެއިހް އިމްރާނު އަބްދުﷲ އާއި ސަރުކާރުގެ އިސްވެރިން ބައިވެރިވެ ވަޑައިގަންނަވާނެއެވެ.
މޯލްޑިވްސް މީޑިއާ ކޮމިޝަން (އެމްއެމްސީ) އިން އިންތިޒާމްކޮށްގެން ކުރިއަށް ގެންދާ ނޫސްވެރިކަމުގެ އިނާމް ދޭން ފަށާފައި ވަނީ 2014 ވަނަ އަހަރުއެވެ. މި ހަފްލާގައި 8 ދާއިރާއަކުން ނޫސްވެރިންނަށް އިނާމް ދިނުމަށް ހަމަޖެހިފައި ވާއިރު އެ 8 ދާއިރާ އަކީ އިޖުތިމާއީ ދާއިރާ، ސިޔާސީ ދާއިރާ، ޝަރުއީ ދާއިރާ، ވިޔާފާރީގެ ދާއިރާ، ކުޅިވަރުގެ ދާއިރާ، ފޮޓޯ ޖާނަލިޒަމްގެ ދާއިރާ އަދި ވީޑިއޯ ޖާނަލަޒިމްގެ ދާއިރާގެ އިތުރުން ފީޗާ ލިއުމުގެ ދާއިރާއެވެ. އޭގެ އިތުރުން ލައިފްޓައިމް އެޗީވްމަންޓް އިނާމާއި އެންމެ އުއްމީދީ ނޫސްވެރިޔާގެ އިނާމް ވެސް ދިނުމަށް ވަނީ ނިންމާފައިވެއެވެ.
ރާއްޖޭގެ ނޫސްވެރިކަމަށް 50 އަހަރު ފުރުން ރައީސް މައުމޫން އަބްދުލްގައްޔޫމްގެ ވެރިކަމުގައި ފާހަގަކޮށް "ރަން ގަލަން" އަދި "ރިހި ގަލަން" ދެއްވާފައިވެ އެވެ.
