ރާއްޖެޓީވީ ފަސްލައްކަ ރުފިޔާއިން ޖޫރިމަނާކުރި މައްސަލައިގެ ޝަރީއަތުގެ އަޑުއެހުންތަށް ނިންމާލައިފި
ދެން އޮންނާނީ މި މައްސަލައިގެ ހުކުމްކުރުމުގެ ޝަރީއަތުގެ މަޖިލީހެއް
ޖޫރިމަނާގެ ފާއިސާ ދެއްކުމުގެ ކުރިން ރާއްޖެޓީވީގެ މުވައްޒިފުން ފޮޓޯއަކަށް ހުއްޓިލައިގެން
ރާއްޖެޓީވީ ފަސްލައްކަ ރުފިޔާއިން ބްރޯޑްކާސްޓިން ކޮމިޝަނުން ޖޫރިމަނާކުރި މައްސަލައިގެ ޝަރީއަތުގެ އަޑުއެހުންތަށް ނިންމާލައިފިއެވެ. ބުދަދުވަހު ސިވިލްކޯޓުގައި އޮތް ޝަރީއަތުގެ މަޖިލީހުގައި ދައުވާ އިއްވުމާއި ދައުވާއަށް ޖަވާބުދާރީވާން ރާއްޖެޓީވީ އަށާއި، ބްރޯޑްކާސްޓިން ކޮމިޝަނަށްވަނީ ދީފައެވެ.
ދައުވާއަށް ޖަވާބުދާރީވަމުން ބްރޯޑްކާސްޓިން ކޮމިޝަނުން ބުނެފައިވަނީ މި މައްސަލައަކީ އެހެން ފަރާތަކުން ބްރޯޑްކާސްޓިން ކޮމިޝަނަށްހުށަހަޅައިގެން އެ ކޮމިޝަނުން ބަލާފައިވާ މައްސަލައެއް ކަމަށާއި، އަދި އެ މައްސަލަ އެ ކޮމިޝަނުން ބަލާފައިވަނީ ރަނގަޅަށް ކަމަށެވެ. އޭރު އެ ކޮމިޝަނުން ރާއްޖެޓީވީ ޖޫރިމަނާކޮށްފައިވަނީ ތިމަރަފުށީ ދާއިރާގެ މެމްބަރު މުހައްމަދު މުސްތަފާ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ އިސްތިއުފާއަށް ގޮވާލާ ގައުމީ ސަލާމަތަށް ނުރައްކާވާ ގޮތަށް ރާއްޖެޓީވީން އެ ކޮންޓެންޓް ބްރޮޑްކާސްޓް ކުރުމުން ކަމަށެވެ.
ބްރޯޑްކާސްޓިން ކޮމިޝަނަށް ރައްދުދެއްވަމުން ޝަރީއަތުގެ މަޖިލީހުގައި ރާއްޖެޓީވީގެ ގާނޫނީވަކީލް ނިޝާން އިބްރާހިމް ވިދާޅުވެފައިވަނީ ބްރޯޑްކާސްޓިން ކޮމިޝަނުން ރާއްޖެޓީވީ ޖޫރިމަނާކޮށްފައިވަނީ އަބުރުގެ ގާނޫނުގެ ނުވަވަނަ މާއްދާގެ ދަށުން ބްރޯޑްކޮމްއަށް ލިބޭ ބާރަކުން ނޫން ކަމަށެވެ. އަދި ތަހްގީގް ކުރުމުގެ ހަމައެއް އެ ކޮމިޝަންގައި ނެތް ކަމަށެވެ. ޝަރީއަތުގެ މަޖިލީހުގައި ނިޝާން ބުނެފައިވަނީ އެކަން ކުރަން އޮންނަ އިޖްރާއަތު ގާނޫނުގައި އޮންނަ ކަމަށާއި، މި ކަމަކީ އަބަރުގެ ގާނޫނު މަނާ ކުރުމުގެ ގާނޫނާއި ގާނޫނު އަސާސީ އާއި ރާއްޖެ ބައިވެރިވުމާއި ބައިނަލް އަގްވާމީ ގާނޫނު ޔޫޑީއެޗްއާރް އާއި އައިސީސީޕީއާރްގެ މަފްހޫމް އާއި ހިލާފް ކަމެއް ކަމަށެވެ.
ރާއްޖެޓީވީން އެދިފައިވާ ގޮތަށް ބްރޯޑްކާސްޓިން ކޮމިޝަނުގެ ނިންމުން ބާތިލްކޮށްދިނުމަށް ރާއްޖެޓީވީން ވަނީ ބުދަދުވަހުގެ ޝަރީއަތުގެ މަޖިލީހުގައި އެދިފައެވެ. ޝަރިއަތުންވަނީ އަބުރުގެ ގާނޫނު މިހާރު އުވާލާފައިވާތީ މައްސަލަތަށް އަލުން މުރާޖައާކުރުމުގެ ގޮތުން އެކަމާއި ބްރޮޑްއިން ބުނަނީ ކީކޭތޯ އެ ކޮމިޝަނާއި ޝަރީއަތުގެ މަޖިލީހުގައި ސުވާލުކޮށްފައެވެ. އަބުރުގެ ގާނޫނު އުވާލާފައިވިޔަސް އެ ފުރުސަތުގެ ބޭނުން ހިފުމުގެ ވިސްނުން ނުގެންގުޅޭ ކަމަށް ބްރޯޑްކާސްޓިން ކޮމިޝަނުން ވަނީ ޝަރީއަތުގެ މަޖިލީހުގައި ބުނެފައެވެ. ބުދަދުވަހުގެ ބްރޯޑްކާސްޓިން ކޮމިޝަނުން ވަނީ އެ މީހުން ނިންމާފައިވާ ނިންމުން ޝަރީއަތުގެ މަޖިލީހުގައި ދިފާއުކޮށްފައެވެ. ބުދަދުވަހު އޮތް ޝަރީއަތުގެ މަޖިލިސް ނިންމަވާލައްވަމުން ފަނޑިޔާރު ވިދާޅުވެފައިވަނީ ދެން އޮންނާނީ މި މައްސަލައިގެ ހުކުމްކުރުން ކަމަށެވެ.
ރާއްޖެޓީވީ ފަސް ލައްކަ ރުފިޔާއިން ޖޫރިމަނާ ކުރުމުން ރާއްޖެޓީވީންވަނީ ބްރޯޑްކާސްޓިންގް ކޮމިޝަނަށް އެ ފާއިސާ ދައްކާފައެވެ. ޖޫރިމަނާ ފާއިސާ ބްރޯޑްކާސްޓިން ކޮމިޝަނަށް ދައްކާފައިވަނީ 2017 ވަނަ އަހަރުގެ ނޮވެމްބަރުމަހުގެ ފަސްވަނަ ދުވަހުއެވެ.
މިކަމާ ގުޅިގެން ރާއްޖެ ޓީވީން 2017 ވަނަ އަހަރުގެ އޮކްޓޯބަރ 8 ވަނަ ދުވަހު ނެރުނު ނޫސްބަޔާނުގައި ބުނެފައިވަނީ އެ ފިޔަވަޅަކީ ރާއްޖެ ޓީވީ އަށް އަނިޔާވެރިވުމަށް ގާނޫނީ އިމުގެ ބޭރުން ޒާތީވެ ސިލްސިލާކޮށް ކުރަމުން ގެންދާ މަސައްކަތްތަކުގެ ތެރެއަށް އިތުރުވި ބޮޅެއްކަމަށް ދެކޭ ކަމަށެވެ. އަދި ބްރޯޑްކާސްޓިން ކޮމިޝަން އިންސާފުގެ ހަމައިން ނެއްޓިފައިވާ ކަމާއި، މައްސަލަތައް ބެލުމުގެ ގާބިލްކަމެއް ކޮމިޝަންގައި ނެތްކަން އެ ކޮމިޝަންގެ ކޮންމެ ނިންމުމަކުން ހާމަވާ ކަމަށް އެ ބަޔާނުގައިވަނީ ބުނެފައެވެ.
5 ލައްކަ ރުފިޔާގެ ޖޫރިމަނާގެ އިތުރުން އޭގެ ކުރިން 1 މިލިއަން ރުފިޔާ އާއި 2 ލައްކަ ރުފިޔާ އިން ރާއްޖެ ޓީވީ ޖޫރިމަނާކުރި މައްސަލަ ވެސް ރާއްޖެ ޓީވީއިން ވަނީ މީގެ ކުރިން ކޯޓަށް ހުށަހަޅާފައެވެ.
ރާއްޖެޓީވީ ޖޫރިމަނާކުރި ފާއިސާ އަނބުރާ ލިބިއްޖެ ނަމަ ހަދިޔާކުރާނީ ހާއްސަ އެހީއަށް ބޭނުންވާ ފަރާތްތަކަށް ކަމަށް ރާއްޖެޓީވީގެ މެނޭޖިންގ ޑިރެކްޓަރ އަހްމަދު ސަލީމް ވަނީ ވިދާޅުވެފައެވެ. އަދި އެގޮތަށް ނިންމީ ރާއްޖެޓީވީ ޖޫރިމަނާ ކުރި ކޮންމެ ފަހަރަކު މިފައިސާ ދެއްކުމަށް ރައްޔިތުންގެ ހިއްސާ ވަރަށް ބޮޑަށް ލިބިފައި ވާތީ، އަނެއްކާ ވެސް އެހީތެރިކަމެއް ބޭނުންވެފައި ތިބި ފަރާތްތަކަށް އެ ފައިސާ ހަދިޔާކުރުމަކީ އެންމެ ރަނގަޅު ގޮތް ކަމަށް ޤަބޫލުކުރެވޭތީ ކަމަށް ސަލީމް ވިދާޅުވިއެވެ.
