ގްރާންޓް ތޯންޓަންއަށް 10 މިލިޔަން ޑޮލަރު ދެއްކި ކަމަށް އޭސީސީގެ ރައީސް އެއްބަސްވެވަޑައިގެންފި
3 ޑިސެމްބަރު 2018 | ހޯމަ 12:52ފާއިސާ ގްރޭންޑް ތޯޓަން އަށް ދެއްކީ އެ މީހުންނާއި އެކުވެވިފައިވާ އެއްބަސްވުމުގެ ދަށުން ދޭންޖެހޭ ފާޢިސާއަށްވާތީ
ރައީސް ޔާމީންގެ މައްޗަށް ބޮޑެތި ތުހުމަތުތަކެއް ކުރެވޭ
ކުރީގެ ރައީސް އަބްދުﷲ ޔާމީންގެ މައްޗަށް ތުހުމަތުކުރެވޭ 800 މިލިއަން ޑޮލަރުގެ ތެލުގެ ވަގު ވިޔަފާރީގެ މައްސަލަ ތަހުގީގުކުރުން ހުއްޓުވަން މަޝްހޫރު އޮޑިޓް ފަރމް ގްރާންޓް ތޯންޓަން އަށް 10 މިލިއަން ޑޮލަރު ދެއްކި ކަމަށް އެންޓި-ކޮރަޕްޝަން ކޮމިޝަނުގެ ރައީސް ހަސަން ލުތުފީ އެއްބަސްވެވަޑައިގެންފިއެވެ.
ހޯމަ ދުވަހު އޮތް މާލިއްޔަތު ކޮމިޓީގައި ވާހަކަދައްކަވަމުން ލުތުފީ ވިދާޅުވީ ގްރާންޓް ތޯންޓަން އަށް 10 މިލިޔަން ޑޮލަރު ދެއްކީ ގްރާންޓް ތޯންޓަން އާއި އެކީގައި ވެފައި އޮތް އެއްބަސްވުމެއްގެ ދަށުން އެ މީހުންނަށް ދޭންޖެހޭ ފައިސާއަށް ވާތީ ކަމަށެވެ. ލުތުފީ ވިދާޅުވީ ގްރާންޓް ތޯންޓަން އިން ކުރި މަސައްކަތުން 800 މިލިޔަން ޑޮލަރު ވަގު ވިޔަފާރީގެ އެއްވެސް ފާއިސާއެއް ހޯދިފައިނުވާ ކަމަށެވެ.
"އަޅުގަނޑުމެން މިހާތަނަށް އެބޭފުޅުން ކުރައްވާފައި އޮތް މަސައްކަތް ބެލި ބެލުމުގައި އެ ބޭފުޅުންނަކަށް އެހާތަނަށް އެއްވެސް އެއްޗެއް ރިކަވަރކުރެވިފައި ނެތް. މި 800 މިލިޔަން ޑޮލަރުގެ ތެލުގެ ވަގު ވިޔަފާރި އާއި ގުޅުން ހުރި މައްސަލަތަކުގެ. އަޅުގަނޑުމެން އެ މައްސަލައިގައި ސިންގަޕޯރ ދެ އޮފީހަށްވެސް ދިޔައިން. ގްރާންޓް ތޯންޓަން އިން ގެންގުޅުނު ހުރިހާ ފައިލްތަށް މިހާރުވެސް ވާނީ އަޅުގަނޑުމެންގެ ބެލުމުގެ ދަށުގައި. އެހެންވީމަ އެބޭފުޅުން މަސައްކަތް ކުރެއްވި ގޮތުގެ އެއްވެސް ރިޕޯރޓެއް ނެތް. އެހެންނަމަވެސް އެ ބޭފުޅުންނާއި އެކީގައި އޮތް އެއްބަސްވުމެއް އެއީ. އެ އެއްބަސްވުމުގެ ދަށުން ދޭންޖެހޭ ފާއިސާ ދޫކޮށްފައި އެ އޮތީ ވަހީދު ސަރުކާރުން" ލުތުފީ ވިދާޅުވިއެވެ.
ދިހަ މިލިއަން ޑޮލަރު ދެއްކި މައްސަލަ ނިންމި ނަމަވެސް، ރައީސް މައުމޫނުގެ ވެރިކަމުގައި، އެސްޓީއޯގެ ޗެއާމަނަކަށް ޔާމީން ހުންނެވި ދުވަސްވަރު ހިންގާފައިވާ ކަމަށް ތުހުމަތުކުރެވޭ 800 މިލިއަން ޑޮލަރުގެ ތެލުގެ ވަގު ވިޔަފާރީގެ މައްސަލަ އޭސީސީން ދަނީ ބަލަމުންނެވެ. ނަމަވެސް 10 މިލިއަން ޑޮލަރު ދެއްކި މައްސަލައިގެ ނިންމުމުގައި، ކުރީގެ ރައީސް މައުމޫނާއި ރައީސް ޔާމީން ބައިވެރިވެގެން ތެލުގެ ވަގު ވިޔަފާރިއެއް ކޮށްފައިވާކަން ސާބިތުކުރަން އެކަށީގެންވާ މިންވަރަށް ހެކި ލިބިފައި ނެތް ކަމަށް ނިންމުމުން، މިހާރު ބަލަމުންދާ މައްސަލައާއި ފުށޫ އަރާނެ އެވެ.
ގްރާންޓް ތޯންޓަންއާ ހަވާލުކޮށްގެން ކުރިއަށް ގެންދިޔަ ތަހްގީގު ހުއްޓާލަން ރައީސް މުހައްމަދު ވަހީދުގެ ސަރުކާރުން 10 މިލިއަން ޑޮލަރު ދެއްކި މައްސަލަ ފައިލް ކުރަން ނިންމީ ރާއްޖެ.އެމްވީއަށް އެނގިފައިވާ ގޮތުގައި ސެޕްޓެމްބަރު 23 ގައި ބޭއްވި ރިޔާސީ އިންތިޚާބުގެ ކުރިންނެވެ. ނަމަވެސް އެ ނިންމުން އޭސީސީން ހާމަކޮށްފައެއް ނުވެ އެވެ.
ރައީސް ވަހީދުގެ ސަރުކާރުން ގްރާންޓް ތޯންޓަން އަށް ފައިސާ ދެއްކީ، ރައީސް ޔާމީން ބާރު އަޅުއްވައިގެން ކަމަށް ރައީސް ވަހީދުގެ އެޑްވައިޒަރު ޑރ. ހަސަން ސައީދު 2013 ގެ ރިޔާސީ އިންތިޚާބުގެ ކެމްޕެއިން ތެރޭގައި ވަނީ ވިދާޅުވެފަ އެވެ.
ރައީސް މައުމޫންގެ ވެރިކަމުގައި، ރައީސް ޔާމީން އެސްޓީއޯގެ ޗެއާމަނަކަށް ހުންނެވި ދުވަސްވަރު އެ ކުންފުނީގެ މުވައްޒަފުންތަކެއް ހިއްސާދާރުންނަށް ހަދައި މޯކަމްގެ ނަމުގައި ސިންގަޕޫރުގައި އުފެއްދި ކުންފުނިން ތެޔޮ ވިއްކީ، އޭރު ގިނަ ގައުމުތަކަކުން ދަތިކުރުމުގެ ފިޔަވަޅު އަޅާފައި އޮތް އަސްކަރީ ވެރިކަމެއް ހިންގަމުން ދިޔަ ބަރުމާއަށެވެ.
ރައީސް ނަޝީދުގެ ވެރިކަމުގައި އުފެއްދެވި ނެޝަނަލް އިންކުއަރީ ކޮމިޝަނުންނާއި ރައްޔިތުންގެ މަޖިލީހުން ވެސް 800 މިލިއަން ޑޮލަރުގެ ތެލުގެ މައްސަލަ ބަލަމުންދިޔަ އެވެ. އެ މައްސަލައިގައި އޭރު މަޖިލީހުގެ މުލަކު ދާއިރާގެ މެމްބަރަކަށް ހުންނެވި ޔާމީން ވިދާޅުވެފައި ވަނީ ތެލުގެ ވަގު ވިޔަފާރިކުރިކަން އެ މަނިކުފާނުގެ މައްޗަށް ސާބިތު ނުކުރެވޭނެ ކަމަށެވެ.
