އެއްމިލިޔަން ޑޮަލަރު ވާނީ އޭސީސީގެ ނަމުގައި ބޭންކް އެކައުންޓެއް ހުޅުވާ ޖަމާކޮށްފައި: ލުތުފީ

އެންޓި ކޮރަޕްޝަން ކޮމިޝަން (އޭސީސީ)ގެ ނަމުގައި ބޭންކް އެކުންޓެއް ހުޅުވުމަށްފަހު ރައީސް އަބްދުﷲ ޔާމީންގެ އެކައުންޓަށް ޖަމާވި އެއްމިލިޔަން ޑޮލަރު ހިފަހައްޓާފައިވާ ކަމަށް އެކޮމިޝަނުގެ ރައީސް ހަސަން ލުތުފީ ވިދާޅުވެއްޖެއެވެ.

ރައްޔިތުންގެ މަޖިލީހުގެ އޮޑިޓަރ ޖެނެރަލް ނެރުއްވާފައިވާ އޮޑިޓް ރިޕޯރޓްތަކާއި ގުޅޭ ގޮތުން މަޝްވަރާކުރެއްވުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަފުޅު ދައްކަވަމުން ލުތުފީ ވިދާޅުވީ ރައީސް ޔާމީންގެ އެކުންޓަށް ވަތް ފާއިސާ ހިފަހައްޓާފައިވާ ކަމަށާއި، މި މައްސަލައަކީ ތަހުގީގު މަރުހަލާގައި އޮތް މައްސަލައަކަށްވާތީ އޭސީސީއަށް އެ ފާއިސާ ލިބުނު ތާރީހު ބުނެދެވެން ނެތް ކަމަށެވެ.

ލުތުފީ ވިދާޅުވީ ރައީސް ޔާމީންގެ އެކައުންޓަށް ޖަމާވި އެއް މިލިޔަން ޑޮލަރު މައްސަލައިގެ ތަހުގީގު ނިންމާނުލެވި ދިގުލައިގެންދަނީ އެކަމާއި ގުޅުންހުރި ގިނަ ބަޔަކު ރާއްޖެއިން ފިލައިގެން ގޮސްފައިވާތީ، އެ މީހުންގެ ބަޔާން ނުނެގިން ކަމަށެވެ.

ލުތުފީ ވިދާޅުވީ އެ މީހުން ހޯދުމަށް އިންޓަޕޯލް ރެޑްނޯޓިސް ނެރުނު ނަމަވެސް އެ މީހުން ރާއްޖެ ގެނެވިފައިނުވާ ކަމަށެވެ.

"އެ މައްސަލައާއި ގުޅުން ހުރި ގިނަ ފަރާތްތަކަކީ ރާއްޖެއިން ބޭރުގައި ފިލައިގެން ގޮސްފައި ތިބި ފަރާތްތަށް. މައްސަލައެއްގައި ހަމަ އެންމެ މީހެއްގެ ބަޔާނަކުންނެއް އަޅުގަނޑުމެންނަށް ނުފުދޭނެ. މި މައްސަލައިގައި ސުވާލުކުރަންޖެހޭ ގިނަ ފަރާތްތަކުގެ ގިނަ މީހުންވީ ރާއްޖޭން ބޭރުގައި. އެހެންވީމައި އެކަމާއި ގުޅިގެން މޯލްޑިވްސް ޕޮލިސް ސާރވިސް މެދުވެރިކޮށް އިންޓަޕޯލް ރެޑްނޯޓިސް އެ ފަރާތްތަކާއި ދެކޮޅަށް ނެރެފައިވާނީ" ލުތުފީ ވިދާޅުވިއެވެ.

ލުތުފީ ވިދާޅުވީ އިންޓަޕޯލް ރެޑްނޯޓިސް ނެރެފައިވާ މީހުންގެ ބަޔާނެއް ނުލިބެނީސް އެ މައްސަލަ ނިންމާފައި ޝަރީއަތަކަށް ނުފޮނުވޭނެ ކަމަށާއި، އެ މައްސަލަ އަދިވެސް ނުނިމި އޮތީ އެ ސަބަބާއި ހެދި ކަމަށެވެ.

އެމްއެމްޕީއާރްސީ މައްސަލައިގައި ހޯދުމަށް އިންޓަރޕޯލް ރެޑްނޯޓިސް ނެރެފައިވަނީ ހުސެއިން މުހައްމަދު (އޮއިއްޓޭ) އިޝްފާހު އަލީ، އައްލާމް ލަތީފް (މޮހޯ) ވިޝާމް މުހައްމަދު، އަދި އަސީލް އަހްމަދެވެ.