ރައީސް އުފެއްދެވި ދެ ކޮމިޝަނަށް ބާރުތައް ދިނުމުގެ ބިލެއް މަޖްލީހަށް
ބިލްގެ ފުރަތަމަ ކިޔުން ހޯމަ ދުވަހު މަޖިލީހުގައި ކުރިއަށް ގެންދިޔަ
ް،ސަރުކާރުގެ ފަރާތުން ބިލް ހުށަހެޅުއްވި ރ. އަލިފުށި ދާއިރާގެ މެންބަރު މުޙައްމަދު ރަޝީދު ޙުސައިން
ރައީސް އިބްރާހިމް މުހައްމަދު ސޯލިހު އެކުލަވާލާފައިވާ ދެ ރިޔާސީ ކޮމިޝަނަށް ބޮޑެތި ބާރުތަކެއް ލިބިދޭ ގޮތަށް ސަރުކާރުގެ ފަރާތުން މަޖިލީހަށް ބިލެއް ހުށަހަޅައިފި އެވެ.
ސަރުކާރުގެ ފަރާތުން އަލިފުށި ދާއިރާގެ މެންބަރު މުހައްމަދު ރަޝީދު ހުސައިން ހުށަހެޅުއްވި ބިލުގައި ދެ ރިޔާސީ ކޮމިޝަނަށްވެސް ދައުވާ ކުރުމުގެ ބާރާއި އެހެނިހެން ވެސް ބޮޑެތި ބާރުތަކެއް ލިބިދީފައިވެއެވެ.
މި ބިލުގެ ފުރަތަމަ ކިޔުން ހޯމަ ދުވަހު މަޖިލީހުގައި ކުރިއަށް ގެންގޮސްފައި ވާއިރު، މި ބިލް މަޖިލީހަށް ހުށައަޅުއްވި މެމްބަރު މުޙައްމަދު ރަޝީދު ވިދާޅުވީ މިފަދަ ބިލެއް މަޖިލީހަށް ހުށައެޅުއްވުމުގެ މަގްސަދަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އުފައްދަވާފައިވާ ފައިސާއާއި މުދަލަށް ޚިޔާނާތްތެރިވުމުގެ މައްސަލަތަކާއި ގޮތް ނޭނގޭ މަރުގެ މައްސަލަތަކާއި ބެހޭ ދެ ކޮމިޝަނަށް ގާނޫނީ ބާރު ދިނުމާއި ޖުމްލަކޮށް ގާނޫނީ އިމުގެ ތެރެއިން މިކަމަށް ހައްލެއް ހޯދުން ކަމަށެވެ.
މީގެ އިތުރުންވެސް މެންބަރު ރަޝީދު ވިދާޅުވީ ގާނޫނުގެ ތެރެއިން ޒިންމާދާރުވާންޖެހޭ ފަރާތްތައް ޖަވާބުދާރީ ކުރުވުމާއި، ގެއްލިފައިވާ ފައިސާ ހޯދުމަށް އަޅަންޖެހޭ ފިޔަވަޅުތައް އެޅުމަށްވެސް ގާނޫނުގެ ދަށުން މަގުފަހިވެގެން ދާނެކަމަށެވެ. އަދި މަގުސަދު ހާސިލް ކުރުމަށްޓަކައި ކޮމިޝަނެއް ނުވަތަ ކޮމިޝަންތަކެއް ހެދުމުގެ ބާރުވެސް ބިލުގެ ސަބަބުން ރައީސުލްޖުމްހޫރިއްޔާއަށް ލިބިގެންދާނެކަމަށެވެ.
"މިހާރު އުފައްދަވާފައި މިވަނީ، މަރާލެވިފައިވާ މީހުންނާއި ގެއްލުވާލެވިފައިވާ މީހުންގެ މައްސަލަތައް ތަހުގީގުކުރުމުގެ ކޮމިޝަނެއް، އަދި ޕްރެސިޑެންޝަލް ކޮމިޝަން އޮން އެސެޓް ރިކަވަރީގެ ނަމުގައި ކޮމިޝަނެއް އުފައްދަވާފައިވެއްޖެ. މި ދެކޮމިޝަނަށް ގާނޫނީ ބާރު ދިނުމަށްޓަކައި ގާނޫނީ ގޮތުން މި ކަން ކުރެވޭނެ ހަމައެއް ގާނޫނުގެ ދަށުން ލިބިގެން ދާނެ. މި ގާނޫނަކީ 1 ޖެނުއަރީ 2012 އިން ފެށިގެން 17 ނޮވެމްބަރު 2017 އާއި ހަމައަށް ދައުލަތުގެ ފައިސާއާއި ވެފައިވާ ޚިޔާނާތްތަކުގެ މައްސަލަތަކާއި ކޮރަޕްޝަންގެ މައްސަލަތަކާއި އެކިއެކި ސަބަބުތައް މެދުވެރިވެގެން އެކަށިގެންވާ މިންވަރަށް ތަހުގީގު ނުކުރެވި ހުރި މައްސަލަތައް އޭގެ ހަގީގަތް ހޯދާ މައްސަލަތައް ބަލާ އިންސާފް ހޯދައިދިނުމަށް އެކުލަވާލެވޭ ޤާނޫނެއް" މެމްބަރު ރަޝީދު ވިދާޅުވިއެވެ.
ސަރުކާރުގެ ފަރާތުން، އަލިފުށި ދާއިރާގެ މެންބަރު މުޙައްމަދު ރަޝީދު ޙުސައިން ހުށަހަޅުއްވާފައިވާ، ދައުލަތުގެ ފައިސާއާއި މުދަލަށް ޚިޔާނާތްތެރިވުމުގެ މައްސަލަތަކާއި ގޮތް ނޭނގޭ މަރުގެ މައްސަލަތައް ބެލުމުގެ ބިލުގެ ފުރަތަމަ ކިޔުން އިއްވުމަށްފަހު އެ ބިލުގެ އިބްތިދާއީ ބަހުސް ކުރިއަށްގެންދިއުމުގެ ފުރުޞަތު ދިނުމަށްޓަކައި، ރައްޔިތުންގެ މަޖިލީހުގެ ގަވާއިދުގެ 75 ވަނަ މާއްދާގެ (ނ) ގައިވާ ގޮތުގެމަތިން ވޯޓަށް އެހުން މިއަދުގެ މަޖިލީހަށް އެޖެންޑާކޮށްފައި ވެއެވެ.
