އިންޑިއާ އަސްކަރިއްޔާގެ ބޭސްއެއް ރާއްޖޭގައި ނުހަދާނެކަމަށާއި، އަސްކަރީ ބޭސްއެއް ރާއްޖޭގައި ހަދަންޖެހޭ ސަބަބެއްވެސް ނެތްކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ބުދަ ދުވަހުގެރޭ ވާހަކަދައްކަވަމުން މާރިޔާ ވިދާޅުވީ އިންޑިއާގެ އަސްކަރިއްޔާއިން ރާއްޖޭގައި އަސްކަރީ ބޭސްއެއް ޤާއިމްކުރަން އުޅޭކަމަށް ބުނެ ދައްކަނީ ދޮގު ވާހަކަތަކެއް ކަމަށެވެ. އަދި އިންޑިއާ އަސްކަރިއްޔާއިން ރާއްޖޭގައި ބޭސްއެއް ހަދަންޖެހޭ ސަބަބެއްވެސް ނެތްކަމަށް މިނިސްޓަރ ވިދާޅުވި އެވެ.
"އަޅުގަނޑު މި ދަންނަވަނީ މިއޮތް ހުރިހާ ދުވަސްވީއިރުވެސް ނެތޭ އިންޑިއާގެ ބޭސްއެއް އަޅުގަނޑުމެންގެ ރާއްޖޭގައި ހަދާފައެއް. އަދި އިންޑިއާގެ ބޭސްއެއް ހަދަންޖެހޭ އެއްވެސް ސަބަބެއްވެސް ނެތް. އެއީ މި ދަންނަވާހެން އެ މީހުންގެ ޤައުމު އެ އޮތީ މިރާއްޖެ ތެރޭގަހެން ބުނާހާ ކައިރީގައި،" މިނިސްޓަރ މާރިޔާ ވިދާޅުވި އެވެ.
ޗައިނާ އަސްކަރިއްޔާއާއެކު އަސްކަރީ ގުޅުންތައް ބާއްވާނަންތޯ ސުވާލުކުރުމުން މިނިސްޓަރ ވިދާޅުވީ މި ސަރުކާރުގެ ހާރިޒީ ސިޔާސަތަކީ ހުރިހާ ޤައުމަކާއިވެސް ގުޅިގެން މަސައްކަތްކުރުންކަމަށެވެ. އެގޮތުން އެއްވެސް ޤައުމަކާއި ރުޅި ހަދައިގެން މަސައްކަތް ނުކުރައްވާނެކަމަށް މިނިސްޓަރ ވިދާޅުވި އެވެ. ނަމަވެސް އަވަށްޓެރި ލަންކާ އަދި އިންޑިއާއާއެކު އަސްކަރީ ގާތް ގުޅުންތައް ބާއްވަނީ ތިން ޤައުމަކީ ކައިރިކައިރީގައިވާ ތިން ޤައުމަށްވެފައި، ގުޅިގެން ކުރެވޭނެ މަސައްކަތްތައް ގިނަވުމުންކަމަށް މާރިޔާ ވިދާޅުވި އެވެ.
އެކަމަނާ ވިދާޅުވީ އެކަން އެގޮތަށް އޮތުމާއެކު ރާއްޖޭގެ އީއީޒެޑަށް ގަވައިދާ ހިލާފަށް އުޅަނދެއް ވަންނަ ކަމަށްވާނަމަ އެކަން ކުރީ ބައިގައި އިންޑިއާއިން ރާއްޖެއަށް އެލަރޓް ކުރާކަމަށެވެ. ނަމަވެސް ޗައިނާއަކީ ޕެސިފިކްގައި އޮންނަ ޤައުމަކަށްވެފައި، ޗައިނާއާއެކު އަސްކަރީ ގުޅުންތަކެއް ބާއްވާނަމަ ޗައިނާގެ އަސްކަރީ ބޭސްއެއް ރާއްޖޭގައި ހަދަންޖެހޭކަމަށް މިނިސްޓަރ ވިދާޅުވި އެވެ.
"ޕެސިފިކްގައި އޮވެގެންނެއް އެ މީހުންނަށް އަޅުގަނޑުމެންނަށް އަސްކަރީ އެހީތެރިކަމެއް ވެވޭކަށް ނޯންނާނެ. އެކަމަކު އިންޑިއާ، އިންޑިއާ ޤައުމެއްހެން، އިންޑިއާ މީހުން އިންޑިއާގައި ތިބެ އަޅުގަނޑުމެން އެހީތެރިކަން ބޭނުން ވަގުތެއްގައި އެހީތެރިކަން ފޯރުކޮށްދެވޭގޮތަށް ތިބި ބައެއް އެއީ،" މިނިސްޓަރ ވިދާޅުވި އެވެ.
