މާލޭގައި ޖާގަ ނެތުމުގެ ސަބަބުން މިނީ ބަސް ގެންނަނީ
29 ނޮވެމްބަރު 2018 | ބުރާސްފަތި 16:10މިނީ ބަސް މާލެ ގެންނަން ޕްލޭނެއް އެކުލަވާފައިވާފައިވޭ
ޓްރާންސްޕޯޓް މިނިސްޓަރ ޢާއިޝަތު ނަހުލާ
މާލޭގައި ބަސް ހިދުމަތް ތައާރަފް ކުރާނެކަމަށާއި ބޮޑެތި ބަސް މާލޭގައި ޖާގަނެތުމުގެ ސަބަބުން ނު ދުއްވޭނެކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރ ޢާއިޝަތު ނަހުލާ ވިދާޅުވެއްޖެއެވެ.
މިނިސްޓަރ ނަހުލާ މިހެން ވިދާޅުވެފައި ވަނީ ބުދަ ދުވަހުގެ މެންދުރު ޓްރާންސްޕޯޓް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައެވެ. މިނިސްޓަރ ވިދާޅުވީ މިނީ ބަސް މާލެ ގެންނަން ޕްލޭނެއް އެކުލަވާފައި ވާކަމަށާއި މާލޭގައި ވަރަށް އަވަހަށް ހިދުމަތް ފެށިގެންދާނޭ ކަމަށެވެ.
"މާލޭގެ ބަސް ހިދުމަތް ވެސް ދޭ ގޮތަށް އިންނަނީ، އެކަމަކު އަޅުގަނޑުމެން މި ގެންގުޅޭ ބޮޑެތި ބަސްވީމަ އެބަސްތަކަކީ މާލޭގައި ދުއްވޭނެ ބަސް ތަކެއް ނޫން، އަޅުގަނޑުމެން މާލެޔަށް މި ޖެހެނީ މިނީ ބަސް ނޫނީ ސައިޒް ކުޑަ ބަސް ގެންނަން މި މުއްދަތު ތެރޭގައި ފައްޓާނަން" މިނިސްޓަރ ވިދާޅުވިއެވެ.
މީގެއިތުރުން ނޫސްވެރިންގެ ބައްދަލުވުމުގައި މިނިސްޓްރީގެ ޑެޕިއުޓީ ޑިރެކްޓަރ ޖެނެރަލް މުހައްމަދު ރާފިއު ވިދާޅުވީ ބްރިޖް ހުރަސް ކުރުމަށް މިހާރު އޮތީ މާލޭގެ މައި ބަސް ސްޓޮޕް އިން ހުލުމާލެ އަށް ވަންނަ ހިސާބަށް ކަމަށާއި ރައްޔިތުންނަށް ފަސޭހަ ކޮށް ދިނުމައްޓަކައި އިތުރު 5 ބަސް ސްޓޮޕް ހެދުމަށް ނިންމައިފައިވާ ކަމަށެވެ. އެގޮތުން ހަފްތާ ބަންދު އައުމުގެ ކުރިން ބަހުގެ ހިދުމަތް ފައްޓާނެކަމަށް ވެސް ވަނީ ވިދާޅުވެފައެވެ. މީގެ އިތުރުން ރާފިއު ވިދާޅުވީ ބަހުގެ ހިދުމަތް ފެއްޓުމާއެކު ޓްރެފިކް ފްލޯއަށް ވަރަށް ބޮޑެތި ބަދަލްތައް އަންނާނެކަމަށެވެ.
