އިންޑިއާ ދަތުރުފުޅަށްފަހު ޝާހިދު ޔޫއޭއީ އަށް
27 ނޮވެމްބަރު 2018 | އަންގާރަ 21:48ޔޫއޭއީ އާއި ރާއްޖޭގެ ގުޅުން އިތުރަށް ބަދަހިކުރުމާއި ބެހޭ ގޮތުން މަޝްވަރާ ކުރައްވާނެ
ޚާރިޖީ ވަޒީރު އަބްދުﷲ ޝާހިދު ޔޫއޭއީ ގައި
ރާއްޖޭގެ ޚާރިޖީ ވަޒީރު އަބްދުﷲ ޝާހިދު ރަސްމީ ދަތުރުފުޅެއްގައި ޔުނައިޓެޑް އަރަބިކް އެމިރޭޓްސް (ޔޫއޭއީ)އަށް ވަޑައިގެންފިއެވެ.
އިންޑީއާގެ ރަސްމީ ދަތުރުފުޅު ނިންމަވާލެއްވުމަށްފަހު، އެގައުމުން ޔޫއޭއަށް ފުރައިވަޑައިގަންނަވަމުން ޝާހިދު ކުރެއްވި ޓްވީޓެއްގައި ވިދާޅުވީ ދެއްލީގެ ދަތުރުފުޅު ވަރަށް ކާމިޔާބު ކަމަށާއި، އެސިޓީ އޮތީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ޑެސެންބަރު 17ގައި އިންޑިއާއަށް ވަޑައިގެންނެވުމުން މަރުހަބާ ދެންނެވުމަށް ތައްޔާރަށް ކަމަށެވެ.
ޝާހިދު ވިދާޅުވީ އަބޫ ދާބީއަށް ކުރައްވާ މިދަތުރުފުޅުގައި އިސްވެރިންނާއި ބައްދަލުކުރައްވާ މުހިންމު ގިނަ ކަންކަމާއި ބެހޭ ގޮތުން މަޝްވަރާތައް ކުރައްވާނެ ކަމަށެވެ. އަދި ޔޫއޭއީ އާއި ރާއްޖޭގެ ގުޅުން އިތުރަށް ބަދަހިކުރުމަށް ކުރާނެ ކަންކަމާއި ގުޅޭގޮތުން މަޝްވަރާ ކުރައްވާނެ ކަމަށެވެ.
ޝާހިދު އިންޑިއާއަށް ވެސް ކުރެއްވި އެ ދަތުރުފުޅުގައި ރާއްޖެއާއި އިންޑިއާގެ ގުޅުން ވަރުގަދަ ކުރުމާއި މެދު ގިނަ މަޝްވަރާތަކެއް ވަނީ ކޮށްފައެވެ. އެގޮތުން އިންޑިއާގެ ރައީސް ރާމްނާތު ކޯވިންދްއާ ބައްދަލުކުރައްވާފައިވެއެވެ. އަދި ރާއްޖޭގެ ސަރުކާރުން އިޖްތިމާއީ އަދި އިގްތިސާދީ ތަރައްގީގައި އިސްކަންދޭ ކަންކަމުގައި އެހީވެ ސަރުކާރަށް އެހީތެރިކަން ފޯރުކޮށްދެއްވާނެކަމުގެ ޔަގީން ރައީސް ރާމްނާތު ކޯވިންދް ވަނީ ދެއްވާފައެވެ.
