ދައުލަތުގެ ކުންފުނިތަކުގެ ޕާރފޯމަންސާއި މާލީ ހާލަތު ވެސް ދަނީ ދަށަށް: އޮޑިޓާ ޖެނަރަލް
27 ނޮވެމްބަރު 2018 | އަންގާރަ 10:36ކުންފުނިތައް ހިންގަމުންދާ ގޮތުގެ މައްސަލަތަކެއް ފާހަގަ ކުރެއްވި
އޮޑިޓަރ ޖެނެރަލް ހަސަން ޒިޔަތު
މި އަހަރުގެ ތެރޭގައި 186 އޮޑިޓް ރިޕޯރޓް ހަދާފައިވާނެ ކަމަށާއި އޮޑިޓް ރިޕޯޓުތަކުން ދައްކާ ގޮތުން ދައުލަތުގެ ކުންފުނިތަކުގެ ޕާރފޯމަންސާއި މާލީ ހާލަތު ދަށްވަމުންދާ ކަމަށް އޮޑިޓާ ޖެނަރަލް ހަސަން ޒިޔަތު ވިދާޅުވެއްޖެއެވެ.
ދައުލަތުގެ ކުންފުނިތަކުގެ މާލީ ހާލަތު ދަށްވަމުން ދާތީ، އެ ކުންފުނިތަކުގެ ޕާރފޯމެންސް އޮޑިޓެއް ހެދުމާއި ގުޅޭ ގޮތުން އޮޑިޓަރ ޖެނެރަލްގެ ލަފާފުޅެއް ހޯއްދެވުމަށް އަންގާރަ ދުވަހު ބޭއްވި މާލިއްޔަތު ކޮމިޓީގެ ބައްދަލުވުމުގައި ވާހަކަދައްކަވަމުން ޒިޔަތު ވިދާޅުވީ އޭގެ ތެރޭގައި ހިމެނެނީ ޕާރފޯރަމަންސް އޮޑިޓް ފަސް ރިޕޯރޓް، މިނިސްޓްރީ ތަކުގެ 13 ރިޕޯރޓް، މިނިވަން މުއައްސަސާތަކުގެ 21 ރިޕޯރޓް، ސަރުކާރުގެ ޕްރޮޖެކްޓް އޯނަރ ފަންޑެޑް ޑޯނަރ ފަންޑެޑް ޕްރޮޖެކްޓްތަށް ހަތެއް، ސްޓޭޓް އޯންޑް އެންޓަރޕްރައިސަސް ތަކުގެ 25 ރިޕޯރޓް ކަމަށެވެ.
ހެދިފައިވާ އޮޑިޓް ރިޕޯރޓްތަކަށް ބަލާއިރު ދައުލަތުގެ ކުންފުނިތަކުގެ ޕާރފޯމަންސް ދަށްވަމުންދާކަން ފާހަގަވެގެންދާ ކަމަށް ޒިޔަތު ވިދާޅުވިއެެވެ. ޒިޔަތު ވިދާޅުވީ މިހާތަނަށް ހަދާފައިވާ ދައުލަތުގެ ކުންފުނިތަކުގެ އޮޑިޓް ރިޕޯރޓްތަކަށް ބަލާއިރު ދައުލަތުގެ ކުންފުނިތަކުގެ ފާއިސާ އެއްދުވަހުން އަނެއް ދުވަހަށް ދަށްވަމުންދާ ކަމަށް ފާހަގަކުރެވޭ ކަމަށެވެ.
ކުންފުނިތަކުގެ ކޭޝްފްލޯ މެނޭޖްމަންޓްވީކް ވަމުންދާކަން ފާހަނގަކުރެވޭ ކަމަށް އޮޑިޓަރ ޖެނެރަލް ވިދާޅުވިއެވެ. ކުންފުނިތަކުގެ މެންޑޭޓާއި ދޭތެރޭ ސުވާލު އުފެދި ގަވަރނަންސްގެ ގިނަ މައްސަލަތައް ފާހަކުރެވިފައިވާ ކަމަށާއި، ދައުލަތުގެ ކުންފުނިތަކުގެ މާލީހާލަތު ދަށްވަމުންދާ ކަމަށާއި، އެކަން ބަލަންޖެހޭ ކަމަށް ޒިޔަތު ވިދާޅުވިއެވެ. އެހެންކަމުން ދައުލަތުގެ ކުންފުނިތަކުގެ މާލީ ހާލަތު ދެނެގަތުމަށް ދިރާސާތަށް ކުރެވިދާނެ ކަމަށާއި، މި ކަމަށް ހައްލެއް ހޯދުމަށް މާލިއްޔަތު ކޮމިޓީ އާއި އޮޑިޓަރ ޖެނެރަލް އާއި އެކުގައި މަސައްކަތް ކުރައްވަންޖެހޭ ކަމަށް ޒިޔަތު ވިދާޅުވިއެވެ.
"އޮޑިޓަރ ޖެނެރަލަކީ މާލިއްޔަތު ކޮމިޓީގެ އޭޖެންޓް. މިސާލަކަށްމާލިއްޔަތު ކޮމިޓީގެ ހާއްސަ މަސްއޫލިއްޔަތު ތެރޭގައި އެބަ އޮވޭ އޮޑިޓަރ ޖެނެރަލް އެކި އެކި ރިޕޯރޓް ދިރާސާ ކުރުމާއި، އަޅަންޖެހޭ ފިޔަވަޅުތަށް ފާހަގަކޮށް ސަރުކާރުގެ ކަމާބެހޭ އިދާރަތަކަށް އެންގުން" ޒިޔަތު ވިދާޅުވިއެވެ.
ޕަބްލިކް އެކައުންޓްސް ކޮމިޓީ ބޭރު ގައުމުތަކުގައި އާންމުކޮށް މަސައްކަތް ކުރާ ގޮތަކީ އޮޑިޓަރ ޖެނެރަލް އާއެކު ކަމަށާއި، އަހަރަކަށް ބަލާއިރު 12 ވަރަކަށް ބައްދަލުވުން ދުނިޔޭގެ ގައުމުތަކުގައި ޕަބްލިކް އެކައުންޓްސް ކޮމިޓީ އާއި އޮޑިޓަރ ޖެނެރަލްއާ އެކުގައި ބާއްވާ ކަމަށެވެ. ދައުލަތުގެ ކުންފުނިތަކަށް ގިނަ ތުހުމަތުތަކެއް ކުރެވޭއިރު، އެކަންތަށް ހައްލުކުރުމަށް މާލިއްޔަތު ކޮމިޓީގެ ހިންގުން ހަރުދަނާކޮށް އޮޑިޓަރ ޖެނެރަލް އާއި އެކީގައި ގުޅިގެން މަސައްކަތް ކުރައްވަންޖެހޭ ކަމަށް އޮޑިޓަރ ޖެނެރަލް ވިދާޅުވިއެވެ. އަދި ދިމާވާ މައްސަލަތަށް ހައްލު ކުރުމަށް މާލިއްޔަތު ކޮމިޓީ އާއި އެކީގައި މަސައްކަތް ކުރައްވަން ތައްޔާރަށް ހުންނެވި ކަމަށް ވެސް ޒިޔަތު ވިދާޅުވިއެވެ.
އަންގާރަދުވަހު އޮތް ކޮމިޓީގެ ބައްދަލުވުމުގައި ވަނީ އޮޑިޓަރ ޖެނެރަލް އޮފީހުން ނިންމާފައިވާ އޮޑިޓް ރިޕޯރޓްތައް ދިރާސާ ކުރުމަށް މާލިއްޔަތު ކޮމިޓީގެ ސަބް ކޮމިޓީއެއް އެކުލަވާލާފައެވެ. އެ ކޮމިޓީގައި ހިމެނިވަޑައިގަންނަވަނީ ގައްދޫ ދާއިރާގެ މެމްބަރު އަހްމަދު ރަޝީދު، ފޭދޫ ދާއިރާގެ މެންބަރު އިބްރާހިމްދީދީ (އައިބީ)، ކުޅުދުއްފުށި އުތުރު ދާއިރާގެ މެމްބަރު އަބްދުލް ގަފޫރު މޫސާއެވެ.
