ތާލިބާނުންގެ ހަމަލާއެއްގަ އަފްޣާނިސްތާނު ފުލުހުންގެ 22 މީހަކު މަރާލައިފި
ތާލިބާނުން ވަނީ ހަމަލާދިންކަމަށް އެއްބަސްވެފަ
ތާލިބާން ހަނގުރާމަވެރިންތަކެއް
އަފްޣާނިސްތާނުގެ ފަރަހް ޕްރޮވިންސްގައި ތާލިބާނުން ދިން ހަމަލާއެއްގައި އެ ގައުމުގެ ފުލުހުންގެ 22 މީހަކު މަރާލައިފިއެވެ.
ތާލިބާނު ހަނގުރާމަވެރިން މި ހަމަލާ ދިނީ އަފްގާނިސްތާނު - އިރާނު ބޯޑަރު ސަރަހައްދުން ދަތުރުކުރަމުން ދިޔަ ފުލުހުންގެ އުޅަނދުތަކަކަށް ދިން ކުއްލި ހަމަލާއެއްގައެވެ. މި ސަރަހައްދުގެ ބޮޑުބައެއް އޮންނަނީ ތާލިބާނުންގެ ބާރުގެ ދަށުގައެވެ.
އަފްޣާނިސްތާނު ފުލުހުންގެ ތަރުޖަމާނު މުހޭބުއްﷲ މޮހެބް ވަނީ ހަމަލާދިންކަން ޔަގީންކޮށްދީފައެވެ. ނަމަވެސް އެ ހަމަލާއާއި ބެހޭ އިތުރު މައުލޫމާތެއް އޭނާ ނުދެއްވައެވެ.
ތާލިބާނުންގެ ތަރުޖަމާނު ޢާރީ ޔޫސުފް އަހްމަދީ ވަނީ ހަމަލާދިންކަމަށް އެއްބަސްވެފައެވެ. އަދި 25 ފުލުހުން މަރާލާފައިވާ ކަމަށާއި، ހަތަރު ވެހިކަލް ގޮއްވާލުމަށްފަހު ގިނަ އަދަދެއްގެ ހަތިޔާރު ވެސް އެ މީހުންގެ ބެލުމުގެ ދަށަށް ގެނެވިފައިވާ ކަމަށް އޭނާ ވަނީ ބުނެފައެވެ.
ހަމަލާތައް އިތުރު ވެފައި މިވަނީ ތާލިބާނުންނާއި އެކީ ސުލްހައިގެ ވާހަކަތައް ފެށުމުގެ ގޮތުން އެމެރިކާ އިން މަސައްކަތް ކުރަމުންދާ ދަނޑިވަޅެއްގައެވެ.
