އާ އަހަރާއި ދިމާކޮށް ލިކަމެކް ޕްރައިވެޓް ލިމިޓެޑްގެ ފަރާތުން "ނިއު އިޔާ ރިލޭ ރަން" އެއް ބާއްވަން ނިންމައިފިއެވެ.

ނޫސްވެރިންނަށް މައުލޫމަތު ދެއްވަމުން ލިކަމެކް ޕްރައިވެޓް ލިމިޓެޑުގެ މެނޭޖިން ޑިރެކްޓަރު ހަސަން ލަބީބް ވިދާޅުވީ މި ދުވުން ބޭއްވުމަށް ހަމަޖެހިފައިވަނީ 31 ޑިސެމްބަރު 2018 ވަނަ ދުވަހުގެ ރޭ 11 ޖަހާއިރުކަމަށެވެ.

މީގެ އިތުރުން އޭނާ ވިދާޅުވީ 2018 ވަނަ އަހަރު ފަށާ މި ދުވުން ނިމޭނީ 2019 ވަނަ އަހަރުގެ ދަންވަރު 1 ޖަހާއިރު ކަމަށެވެ.

ލިކަމެކް އިން ބުނީ ޓީމް އިވެންޓެއްގެ ގޮތުގައި ކުރިޔަށް ގެންދާ މި ދުވުމުގައި ބައިވެރިވެވޭނީ ކޮންމެ ޓީމެއްގައިވެސް 10 ބައިވެރިން ހިމަނައިގެންކަމަށެވެ.

ކޮންމެ ބައިވެރިޔަކުވެސް 2.1 ކިލޯ މީޓަރު ހަމަކުރަންޖެހޭނެކަމަށާއި ޖުމްލަ 21 ކިލޯމީޓަރު ކޮންމެ ޓީމަކުންވެސް ފުރިހަމަ ކުރަންވާނެ ކަމަށް ލިކަމެކުން ބުނެއެވެ.

މި ދުވުމުގައި އެއްވަނަޔަށް ދާ ފަރާތަކަށް ތަށްޓާއެކު 50000 (ފަންސާސް ހާސް) ރުފިޔާ ، ދެވަނަޔަށް ދާ ފަރާތަކަށް 10000 (ދިހަ ހާސް) ރުފިޔާ އަދި ތިން ވަނައަށް ދާ ފަރާތަކަށް 5000 (ފަސް ހާސް) ރުފިޔާ ދިނުމަށް ހަމަޖެހިފައިވާކަމަށް ލިކަމެކުން ވަނީ ބުނެފައެވެ.

މީގެ އިތުރުން 2.1 ކިލޯމީޓަރު ހަމަކުރާ ކޮންމެ ބައިވެރިޔަކަށް މެޑަލް އެއް ލިބޭނެކަމަށް ވެސް ވަނީ ބުނެފައެވެ.

މި ދުވުމުގައި ބައިވެރިވެވޭނީ ކޮންމެ 10 ދުވުންތެރިންގެ ޓީމްއަކުން 3000 ރުފިޔާ ފީއެއް ދައްކައިގެންނެވެ. ބައިވެރިވާން ބޭނުންވާ ފަރާތްތަކަށް ރެޖިސްޓަރ ކުރުމުގެ ފުރުސަތު އަންނަ ޑިސެމްބަރ މަހުގެ 1-6 ވަނަ ދުވަހުގެ ނިޔަލަށް އޮންނާނެ ކަމަށް ލިކަމެކުން ވަނީ ބުނެފައެވެ.

މިއީ ދިވެހި ރާއްޖޭގައި މިގޮތަށް ދުވުން ބާއްވާ ފުރަތަމަ ފަހަރުކަން ފާހަގަކޮށްލެވެއެވެ.