ހަތަރު ލީޑަރުންގެ ގުޅުން ވަރަށް ވަރުގަދަ: ނާދިރާ
25 ނޮވެމްބަރު 2018 | އާދީއްތަ 23:25އެއްވެސް ލީޑަރަކު މަސްލަހަތު ފުށޫ އަރާ އެއްވެސް ކަމެއް ކުރައްވާފައި ނުވޭ
ފަލަސުރުހީ ޕްރޮގްރާމްގައި އައިމިނަތު ނާދިރާ ވާހަކަ ދައްކަވަނީ
ގުޅިފައިވާ ކޯލިޝަންގެ ހަތަރު ލީޑަރުންގެ ގުޅުން ވަރަށް ވަރުގަދަ ކަމަށް ރައީސް މައުމޫން ރީފޯމަންޓް މޫވްމަންޓްގައި އިސްކޮށް މަސައްކަތްކުރައްވާ އައިމިނަތު ނާދިރާ ވިދާޅުވެއްޖެއެވެ.
އާދިއްތަ ދުވަހުގެ ރޭ ރާއްޖެޓީވީގެ ފަލަސަރުހީ ޕްރޮގްރާމްގައި ގުޅިފައިވާ ކޯލިޝަންގެ ހަތަރު ލީޑަރުންގެ ގުޅުމާއި ބެހޭ ގޮތުން ވާހަކަ ދައްކަވަމުން ނާދިރާ ވިދާޅުވީ އެއްވެސް ލީޑަރަކު މަސްލަހަތު ފުށޫ އަރާ އެއްވެސް ކަމެއް ކުރައްވާފައި ނުވާނެ ކަމަށާއި އެ ހަތަރު ލީޑަރުންގެ ގުޅުން ވަރަށް ވަރުގަދަ ކަމަށެވެ.
"އަޅުގަނޑެއް ހަމަގައިމުވެސް އަދި ނުދެކެން އެއްވެސް ލީޑަރަކު އަނެއް ލީޑަރަކާ ދިމާލަށް އެއްޗެއް ބުނެ، ނޫނީ މަސްލަހަތު ފުށޫއަރާ އެއްވެސް ކަމެއް ކުރައްވާ ތަނެއް. ވަރަށް އެއްކޮށް ވަރަށް ގާތްކޮށް އެ އުޅުއްވަނީ. އަޅުގަނޑު ޤަބޫލުކުރަނީ އެ ބޭފުޅުންގެ ގުޅުން ވަރަށް ވަރުގަދަ ކަމަށް" ނާދިރާ ވިދާޅުވިއެވެ.
މީގެ ކުރިން ވެސް ކޯލިޝަނުން އެކަތިގަނޑެއްގެ ގޮތުގައި މަސައްކަތް ކޮށްފައިވަނީ ވަރަށް ގިނަ ގޮންޖެހުންތަކާ، ހިޔާލު ތަފާތުވުންތަކާއެކުކަން ފާހަގަކުރައްވާ ނާދިރާ ވިދާޅުވީ ރައްޔިތުންގެ މަޖިލީހުގެ އިންތިހާބަށްފަހުވެސް ކޯލިޝަނުން އެ ހިޔާލު ތަފާތުވުންތަކާއެކު ރައްޔިތުންނަށްޓަކައި މަސައްކަތް ކޮށްދޭނެ ކަމަށް އުންމީދު ކުރައްވާ ކަމަށެވެ. އަދި ކޯލިޝަންގެ ތެރެއިން ރަނގަޅު ކެންޑިޑޭޓުންތަކެއް މަޖިލީސް އިންތިހާބަށް ނެރެ އިންތިހާބު ކާމިޔާބު ކުރާނެ ކަމަށް ނާދިރާ ވިދާޅުވިއެވެ.
ޕާޓީތަކުގެ ޕްރައިމަރީ ޓިކެޓުގައި މަޖިލީސް އިންތިހާބަށް ކެންޑިޑޭޓުން ވާދަކުރެއްވި ނަމަވެސް އަމިއްލަ ގޮތުން އެ އިންތިހާބުގައި އެހެން ކެންޑިޑޭޓުންނަށް ވާދަކުރުމުގެ ފުރިހަމަ ހައްޤު އޮންނާނެ ކަމަށާއި އެ ހައްޤު އޮންނަން ޖެހޭނެ ކަމަށް ވެސް ނާދިރާ ވިދާޅުވިއެވެ. މީގެ އިތުރުން ރައްޔިތުން މަޖިލީހުގެ މެމްބަރުންނަކީ އެމީހެއްގެ ޖީބު ބޮޑުކޮށް، އެމީހާގެ އާއިލާއަށް ފައިދާވާ ގޮތަށް ކަންކަން ކުރަން ނިކުންނަ މީހަކަށް ވެގެން ނުވާނެ ކަމަށް ނާދިރާ ވިދާޅުވިއެވެ.
ޕްރޮގްރާމްގައި އިތުރަށް ވާހަކަ ދައްކަވަމުން ނާދިރާ ވިދާޅުވީ ރައްޔިތުންނާއި ގުޅުން ހުރި ގިނަ ކަންތައްތަކެއް ރައްޔިތުންގެ މަޖިލީހުގެ ތެރެއިން ރަނގަޅު ކުރަން ޖެހިފައިވާ ކަމަށެވެ. އެގޮތުން މިނިވަން މުއައްސަސާތައް ހިނގަމުންދާ ގޮތުގެ ޤަވާއިދުތައް ބަދަލު ކުރަން ޖެހޭ ކަމަށް ނާދިރާ ވިދާޅުވިއެވެ.
"މިނިވަން މުއައްސަސާތަކުގެ ޤަވާއިދުތައް އެބަހުރި، އެ ޤަވާއިދުތައް އެއީ މިނިވަން މުއައްސާތަކުގެ ގޮތުގައި ހިންގުމަށްޓަކައި ކުރަން ޖެހޭ ބައިވަރުކަންތައް އެބަހުރި. މި ހުރިހާ ކަމެއް ރަނގަޅު ކުރަން އެބަޖެހޭ، އަދި މި ހުރިހާ ކަމެއް ރަނގަޅު ވާނީ އަޅުގަނޑުމެން އެންމެން އެކައްޗެއް ކިޔައިގެން. ސިޔާސީ ނުފޫޒުން އެއްކިބާވެފައިވާ މުއައްސަސާތަކަށް އެ މުއައްސަސާތައް ހަދަންޖެހޭ، އެ މަސައްކަތް ހާސިލްވާނެ ކަމަށް ޤަބޫލުކުރަން ފަސް އަހަރު ނިމެންވާއިރަށް" ނާދިރާ ވިދާޅުވިއެވެ.
