މިއަދަކީ އަންހެނުންނާއި އަންހެން ކުދިންނަށް ކުރާ އެކި ބާވަތުގެ އަނިޔާއާއި ދެކޮޅަށް އަޑުއުފުލުމުގެ ގޮތުން ފާހަގަކުރާ ދުވަހެއެވެ. ކޮންމެ އަހަރަކުވެސް މި ދުވަސް ފާހަކުރަނީ ނޮވެމްބަރުމަހުގެ 25 އިން ޑިސެމްބަރުމަހުގެ 10 ވަނަ ދުވަހާއި ހަމައަށެވެ.

މި އަހަރުގެ އދ.ގެ ޝިއާރަކީ "ހިއަރ މީ ޓޫ: އެންޑް ވަޔަލަންސް އަގެއިންސްޓް ވިމެން އެންޑް ގަރލްސް" އެވެ. މި ޝިއާރުގެ ބޭނުމަކީ އަންހެނުންނާއި އަންހެންކުދިންނަށް ކުރާ އަނިޔާއާ ދެކޮޅަށް އަޑު އުފުލާ ފަރާތްތަކާއި، އެ ޙައްޤުތަކަށް މަސައްކަތްކުރާ ފަރާތްތަކާ ގުޅިގެން މި ބާވަތުގެ އަނިޔާ ހުއްޓުވުމަށް ބާރުއަޅައި، ކަމާ ގުޅޭ ސިޔާސަތުތައް ތަންފީޒުކުރާ ފަރާތްތަކުގެ މެދުގައި ޑައިލޮގެއް އުފެއްދުމެވެ.

އަންހެނުންނާއި އަންހެންކުދިންނަށް ކުރާ އެކި ބާވަތު އަނިޔާއާއި ދެކޮޅަށް ދުނިޔޭގެ ފެންވަރުގައި ދުވަހެއް ފާހަގަކުރަން ފަށާފައިވަނީ 1991 ވަނަ އަހަރުއެވެ. މި ދުވަސް އެންމެ ފުރަތަމަ ފާހަގަކޮށްފައިވަނީ 1991 ވަނަ އަހަރު، "ފަސްޓް ވުމަން ގްލޯބަލް ލީޑަރޝިޕް އިންސްޓިޓިއުޓް" ގެ ސެންޓަރ ފޯރ ވުމަންސް ގްލޯބަލް ލީޑަރޝިޕް އިން ރަޓްޔާރސް ޔުނިވަރސިޓީގައެވެ. އޭގެ ފަހުން މިހާރު ދުނިޔޭގެ 164 ގައުމުންނާއި 3700 ޖަމްއިއްޔާއަކުން ކޮންމެ އަހަރަކުވެސް ސޯޅަ ދުވަސް ވަންދެން މި ދުވަސް ކުލަގަދަކޮށް ފާހަގަކުރަމުންދެއެވެ.

އަންހެނުންނާއި ކުޑަކުދިންނަށް ކުރާ އަނިޔާއަކީ ދުނިޔޭގެ ގައުމުތަކުގައި އެންމެ ބާރަށް ފެތުރެމުން އަންނަ އިންސާނީ ހައްގުތަށް ގެއްލިގެންދާ އެއް މައްސަލައެވެ. ތަފާސް ހިސާބުތަށް ދައްކާ ގޮތުން ދުނިޔޭގެ އާބާދީގެ ތިން ބައި ކުޅަ އެއްބައި އަންހެނުންނާއި އަންހެންކުދިން އުމުރުގެ ކޮންމެވެސް ހިސާބަކުން އަނިޔާގެ ޝިކާރައަކަށްވެގެން ދެއެވެ. ދުނިޔޭގެ ގައުމުތަކުގައި އަންހެނުންނާއި އަންހެންކުދިންނަށް ކުރާ އަނިޔާ ހުއްޓުވުމުގެ ގޮތުން އެކި ޔޫނިއަންތަކުން ވަނީ ގިނަ މަސައްކަތްތަކެއް ކޮށްފައެވެ.

އަންހެނުންނާއި އަންހެން ކުދިންނަށް ކުރާ އެކި ބާވަތުގެ އަނިޔާއާ ދެކޮޅަށް އަޑުއުފުލުމުގެ ގޮތުން ބައިނަލްއަޤުވާމީ ފެންވަރުގައި ދުވަހެއް ފާހަގަ ކުރަމުން އަންނައިރު، ރާއްޖެއަކީ އަންހެނުން އަދި ކުޑަކުދިންނަށް ކުރާ އަނިޔާގެ އިންސައްތަ ބޮޑު ގައުމެކެއެވެ.

ދުނިޔޭގެ ނިސްބަތުން ބަލާއިރު އަންހެނުންނާއި އަންހެން ކުދިންނަށް ކުރާ އެކިބާވަތުގެ އަނިޔާ އެއްދުވަހުން އަނެއް ދުވަހަށް އަންނަނީ އިތުރުވަމުންނެވެ. މިނިސްޓްރީ އޮފް ޖެންޑަރ އެންޑް ސޯޝަލް ސާރވިސްގެ ތަފާސް ހިސާބުތައް ދައްކާ ގޮތުން މި އަހަރުގެ މިހާތަނަށް މިނިސްޓްރީއަށް 1400 މައްސަލަ ހުށަހެޅުނު އިރު އޭގެ ތެރެއިން 60 އިންސައްތަ މައްސަލައަކީ އަންހެންނާއި އަންހެންކުދިންނަށް ކުރާ އަނިޔާ އާއި ގުޅުންހުރި މައްސަލަތަކެވެ. އަންހެނުންނާއި އަންހެންކުދިންނަށް ކުރާ އަނިޔާގެ މައްސަލަތައް މިނިސްޓްރީއަށް ރިޕޯޓްކުރާ މިންވަރު އިތުރުވަމުންދާ ކަން ފާހަގަކުރެވެއެވެ.

މި އަހަރުގެ އޮކްޓޫބަރު މަހުގެ ތަފާސްހިސާބުތަކަށް އެކަނި ބަލައިލިކަމުގައި ވިޔަސް، ވަކި ޖިންސަކަށް ވީތީ ކުރާ އަނިޔާއާއި ގެވެށި އަނިޔާގެ 29 މައްސަލަ މިނިސްޓްރީއަށް ހުށަހެޅިފައިވާއިރު، މީގެ ތެރެއިން 25 މައްސަލައަކީ އަންހެނުންނާ ގުޅުން ހުރި މައްސަލަތަކެވެ.

މި ދުވަހާއި ގުޅުވައިގެން ރާއްޖެ އެމްވީއަށް ދެއްވި އިންޓަރވިއުއެއްގައި މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ވިދާޅުވީ އަނިޔާ ލިބޭ އަންހެނުންނަށް ބޭނުންވާ އެހީތެރިކަން ކޮންމެ މަރުޙަލާއެއްގައިވެސް ލިބެން ޖެހޭ ކަމަށާއި، މި ފަދަ ހައްސާސީ މައްސަލަތަކުގައި ކަމާ ބެހޭ މުއައްސަސާތަކުން ޚާއްޞަ ސަމާލުކަމެއް ދޭން ޖެހޭ ކަމަށެވެ. މިނިސްޓަރ ވިދާޅުވީ އަންހެނުންނަށް ކުރާ އަނިޔާއަކީ މިމުޖުތަމަޢުގައި ނުހިނގާ ކަމެއްގެ ގޮތުގައި ބައެއް ފަރާތްތަކުން ޤަބޫލުކުރުމަކީ ކަންބޮޑުވާ ކަމެއް ކަމަށާއި، މިކަން ހުއްޓުވުމަށް ފަރުދީ ފެންވަރެއްގައި މަސައްކަތް ކުރައްވަންޖެހޭ ކަމަށެވެ.

"ޖަމްއިއްޔާ ޖަމާއަތްތަކުގެ ފެންވަރުގައިވެސް ގިނަ ކަންތަށްތަކެއް ކުރަންޖެހޭ. މި ހުރިހާ ކަމެއް ގުޅުނީމަ ހަގީގަތުގައި މުޖްތަމައު ތެރޭގައި ކޮންމެ އަންހެން ކުއްޖަކީ ކޮންމެ އަންހެނަކީވެސް ރައްކާތެރިކަން އިހްސާސްވާ މީހަކަށް ވެގެން މި ދަނީ. ކަން ނިމޭއިރު އަޅުގަނޑުމެން ޖެހެން ބޭނުންވާ ހިސާބަކީ އެއީ" ޝިދާތާ ވިދާޅުވިއެވެ.

ކޮންމެ މީހަކީވެސް ރައްކާތެރިކަމާއެކީ މުޖްތަމައުގައި އުޅޭ މީހަކަށް ވުން، އެއީ ސަރުކާރުގެ އެންމެ ބޮޑު އަމާޒަށްވާއިރު، ދިވެހިރާއްޖޭގައި ތިބި ހުރިހާ އަންހެންކުދިންނާއި އަންހެނުންގެ ރައްކާތެރިކަން ކަށަވަރުކޮށްދޭން ޖެހޭ ކަމަށާއި، އެ ޒިންމާ ނަންގަވައިގެން ހުންނެވި ކަމަށް މިނިސްޓަރ ވިދާޅުވިއެވެ. ކުރިއަށް އޮތް ފަސްއަހަރަކީ އެ ޒިންމާ އެންމެ ފުރިހަމަ މިނުގައި ނަގައިގެން ކުރިއަށްދާނެ ފަސް އަހަރު ކަމަށް މިނިސްޓަރ ވިދާޅުވިއެވެ.

ރައްޔިތުންގެ އުއްމީދަކީ ކުރިއަށް އޮތް ފަސްއަހަރަކީ އަންހެނުންނާއި އަންހެންކުދިންނަށް ކުރާ އެކި ބާވަތު އަނިޔާއިން ދުރުހެލިވެފައިވާ ގައުމެއްގެ ގޮތުގައި ރާއްޖެ ވެގެން ދާނެފަސް އަހަރަށް ވެގެންދިއުމެވެ.