ދެކޮޅަށްވެސް މުހިއްމު ކޮމިޓީތަކެއް!

ރައްޔިތުންގެ މަޖިލީހުގައި ހިމެނޭ ދާއިމީ 13 ކޮމިޓީ އަލުން އެކުލަވައިލި އިރު، ވެރިކަން ކުރާ ކޯލިޝަނާއި އިދިކޮޅު މެމްބަރުންނަށް ވެސް ބައެއް މުހިއްމު ކޮމިޓީތަކުގެ އަޣުލަބިއްޔަތު ލިބިއްޖެ އެވެ.

މަޖިލީހުގެ ކޮމިޓީތައް އަލުން އެކުލަވައިލަން ޖެހުނީ މަޖިލީހުގެ މެމްބަރުކަމުން ވަކިވެފައިވާ ކަމަށް އިލެކްޝަންސް ކޮމިޝަން (އީސީ) އިން ކަނޑައެޅި 12 މެމްބަރުން ވެސް މަޖިލީހުން ވަކިނުވާ ކަމަށް ސުޕްރީމް ކޯޓުން ކުރި ހުކުމާ ގުޅިގެންނެވެ. އެގޮތުން ދާއިމީ 13 ކޮމިޓީގެ ތެރެއިން ހަތް ކޮމިޓީގެ އަގުލަބިއްޔަތު ވަނީ ވެރިކަން ކުރާ ކޯލިޝަނަށް ލިބިފަ އެވެ.

ކޯލިޝަނަށް އަގުލަބިއްޔަތު ލިބިފައިވާ ކޮމިޓީތަކަކީ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އާއި، މާލިއްޔަތު ކޮމިޓީއާއި، މިނިވަން މުއައްސަސާތަކުގެ ކޮމިޓީއާއި، އިމްތިޔާޒް ކޮމިޓީއާއި، އިޖުތިމާއީ ކޮމިޓީއާއި، ޕެޓިޝަން ކޮމިޓީގެ އިތުރުން ގަވައިދު ކޮމިޓީ އެވެ.

އިދިކޮޅު ފަރާތްތަކަށް އަގުލަބިއްޔަތު ލިބިފައިވާ ފަސް ކޮމިޓީއަކީ ގައުމީ ސަލާމަތާ ބެހޭ ކޮމިޓީއާއި، އިގްތިސާދީ ކޮމިޓީއާއި، ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއާއި ގައުމީ ތަރައްގީ ކޮމިޓީގެ އިތުރުން އާންމު ކޮމިޓީ އެވެ.

މިހާތަނަށް އެއްވެސް މައުލޫމާތެއް ހާމަކޮށްފައިނުވަނީ ސުލޫކީ ކޮމިޓީގެއެވެ.

މަޖިލީހުގެ ބައެއް މެންބަރުން ވިދާޅުވާ ގޮތުގައި މިކޮމިޓީގެ އަގުލަބިއްޔަތު ލިބޭނީ ސަރުކާރު ހިންގާ ކޯލިޝަނަށެވެ.

މިހާރު މަޖިލީހުގައި ހިމެނޭ 79 މެންބަރުންގެ ތެރެއިން 42 މެންބަރުންނަކީ ސަރުކާރު ހިންގާ ކޯލިޝަނަށް ނިސްބަތްވާ މެންބަރުންނެވެ. ޕީޕީއެމްގައި 32 މެމްބަރުން ތިއްބެވިއިރު އެމްޑީއޭގައި ތިއްބެވީ ފަސް މެމްބަރުންނެވެ.

ރައީސް އިބްރާހީމް މުހައްމަދު ސޯލިހް ވެރިކަމާ ހަވާލުވެވަޑައިގަތުމަށްފަހު އެކުލަވާލި ވަޒީރުންގެ މަޖިލީހުގައި ހަ މެންބަރަކު ހިމެނިވަޑައިގަންނަވާތީ އެބޭފުޅުން ވަނީ މަޖިލީހުގެ މެންބަރު ކަމުން އިސްތިއުފާ ދެއްވާފަ އެވެ. ޕީޕީއެމް ކޯލިޝަންގެ އަތުން މި ކޮމިޓީތައް މި ގެއްލުނީ ގާތްގަނޑަކަށް ފަސް އަހަރު ވާން ކައިރިވެފައި އޮއްވަ އެވެ. މީގެ ކުރިން، މަޖިލީހުގައި ހިމެނޭ ހުރިހާ ކޮމިޓީއެއްގެ މެޖޯރިޓީ އޮތީ ވެރިކަން ކުރި ޕީޕީއެމަށެވެ.