ދޯސްތީގައި ބައިވެރިވާ އިންޑިއާ އަދި ސްރީލަންކާގެ މަނަވަރުތައް ރާއްޖެ އަތުވެއްޖެ
މާދަމާ އިން ފެށިގެން އަންގާރަ ދުވަހާ ހަމައަށް ކުރިއަށް ދާނެ
އެމްއެންޑީއެފްގެ ދޯސްތީ އެކްސަސައިޒްގައި ބައިވެރިވާ އުޅަދެއް
އެމްއެންޑީއެފް ކޯސްޓްގާޑާއި އިންޑިއާގެ ކޯސްޓްގާޑު އަދި ސްރީލަންކާގެ ކޯސްޓްގާޑް ގުޅިގެން ހިންގާ ޓްރައިލޭޓްރަލް ޖޮއިންޓް އެކްސަސައިޒް ދޯސްތީ 14ގައި ބައިވެރިވާ އިންޑިއާ އަދި ސްރީލަންކާގެ ކޯސްޓްގާޑުގެ މަނަވަރުތައް އާދިއްތަ ދުވަހު ހެނދުނު މާލެ އައިސްފައިވާ ކަމަށް އެމްއެންޑިއެފުން ބުނެފިއެވެ.
ރާއްޖެ އައި މަނަވަރުތަކުގެ ތެރޭގައި އިންޑިއަން ކޯސްޓްގާޑް ޝިޕް ސަމަރު އާއި އިންޑިއަން ކޯސްޓްގާޑް ޝިޕް އާރޔަމަން ހިމެނޭ ކަމަށާއި ސްރީލަންކަން ކޯސްޓްގާޑް ޝިޕް ޝުރަކްޝާ ހިމެނޭ ކަމަށް ވެސް އެ އިދާރާއިން ބުނެއެވެ.
މީގެ އިތުރުން މި އެކްސަސައިޒުގައި އިންޑިއަން ކޯސްޓްގާޑް ޑޯނިއަރ މަތިންދާބޯޓަކާއި އިންޑިއަން ކޯސްޓްގާޑް ޝިޕް ސަމަރު ގެ އޮން ބޯޑު ހެލިކޮޕްޓަރެއް ވެސް ހަރަކާތްތެރި ވާނެ ކަމަށް އެމްއެންޑީއެފުން މައުލޫމަތު ދެއެވެ.
މިމަހުގެ 26 ވަނަ ދުވަހުން ފެށިގެން 27 ވަނަ ދުވަހުގެ ނިޔަލަށް ބާއްވާ މި އެކްސަސައިޒަކީ ރާއްޖެ އާއި އިންޑިއާ އަދި ސްރީލަންކާގެ ދެމެދުގައި އޮންނަ އަސްކަރީ ގުޅުން އިތުރަށް ހަރުދަނާ ކުރުމާއި، ކަނޑުމަތީގައި ދިމާވާ ހާދިސާތަކާއި އޮޕަރޭޝަންތަކުގައި ތިން ޤައުމު ގުޅިގެން ހަރަކާތްތެރި ވާނެ ގޮތްތައް ފަރިތަކުރުމުގެ މަޤްޞަދުގައި ބާއްވާ ތަމްރީނުތަކެކެކެވެ.
މި އެކްސަސައިޒް ފެށުމުގެ ގޮތުން ބާއްވާ ޚާއްޞަ ރަސްމިއްޔާތު ބޭއްވުމަށް ހަމަޖެހިފައި ވަނީ ހޯމަ ދުވަހު އިސްލާމީ މަރުކަޒު ޖަލްސާ ކުރާ މާލަމުގައެވެ.
އެކްސަސައިޒް ދޯސްތީ އަކީ 1991 ވަނަ އަހަރުން ފެށިގެން ކޮންމެ ދެ އަހަރުން އެއް އަހަރު އިންޑި އާއި އެމްއެންޑީއެފް ކޯސްޓްގާޑް ގުޅިގެން ހިންގަން ފަށާފައިވާ އެކްސަސައިޒެކެވެ. މި އެކްސަސައިޒްގައި ސްރީލަންކާ ބައިވެރިވެފައި ވަނީ 2012 ވަނަ އަހަރުން ފެށިގެންނެވެ. މި އެކްސަސައިޒް އެންމެ ފަހުން ބާއްވާފައި ވަނީ 2016 އޮކްޓޯބަރުގަ އެވެ.
