ޓުއަރިޒަމް މިނިސްޓްރީން ފޯރުކޮށްދޭ މައުލޫމާތުތައް ނޫސްވެރިންނާއި ރައްޔިތުންނަށް ލިބޭނެ ކަމަށާއި އެމިނިސްޓްރީ އަކީ ރައްޔިތުންގެ ތަނެއް ކަމަށް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ވަޒީރުކަމާ ހަވާލުވުމަށްފަހު ބޭއްވި ފުރަތަމަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ އަލީ ވަހިދު ވިދާޅުވީ އެމަނިކުފާނަކީ ކެބިނެޓްގައި ހިމެނޭ އެންމެ ހަގު ބޭފުޅާ ކަމަށާއި، އެއީ ވަރަށް ބޮޑު ޗެލެންޖެއް ކަމަށެވެ.
އެމަނިކުފާނު ވަނީ ފުރަތަމަ ހަފްތާގައި އެ މިނިސްޓްރީން ކުރި މަސައްކަތް ނޫސްވެރިންނާ ހިއްސާ ކޮށްފައެވެ. އެގޮތުން އެންމެ ފުރަތަމަ ހަފްތާގެ ތެރޭގައި މަޓީ، ގެސްޓްހައުސް އެސޯސިއޭޝަން، މީރާ، އެންވަޔަރަމެންޓް މިނިސްޓްރީ، އެއަރޕޯޓް ރެޕްސް، ފަތުރުވެރިކަމުގެ ދާއިރާގެ މުވައްޒަފުން، ޓްރެވަލް އޭޖެންސީތައް، ޓުއަރ ގައިޑް އެސޯސިއޭޝަން، ޔޮޓް އެޖެންޓްސް، ފިނޭންސް މިނިސްޓަރ، ފޮރިން މިނިސްޓަރ، މަޓާޓޯ އަދި ހޯމް މިނިސްޓްރީ އާއި ބައްދަލު ކުރެވިފައިވާ ކަމަށް އަލީ ވަހީދު ފާހަގަ ކުރެއްވިއެވެ. މީގެއިތުރުން ބައްދަލު ކުރެއްވި ކައުންސިލްތަކުގެ ތެރެއިން އައްޑޫ އަދި އެހެން ބައެއް ކައުންސިލްތައް ހިމެނެއެވެ. މިނިސްޓަރ ވިދާޅުވީ ކަންކަން ހުއްޓިފައި ހުރުން ނިމުމަކަށް ގެންނާނެކަމަށާއި މިކަމުގައި ރައްޔިތުންގެ އެއްބާރުލުން ބޭނުންވާކަމަށެވެ.
މިނިސްޓަރ ވަނީ ނޫސްވެރިންގެ ބައްދަލުވަމަށް ފަހު ލޯކަލް ޓޫރިޒަމް އެންމެ ފުޅާ ދާއިރާއެއްގައި ކުރެވޭ ކ. މާފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކޮށް ދިމާވާ އުނދަގޫތައް އޮޅުން ފިއްލުވާފައެވެ. އަދި އެރަށުގެ ގެސްޓް ހައުސް ވިޔަފާރިކުރާ ފަރާތްތަކާއި ވެސް ބައްދަލުކުރައްވައި، ބައެއް ގެސްޓް ހައުސްތަކަށް ވަޑައިގެންނެވިއެވެ.
