ކޮމިޝަނާ އޮފް ޕްރިސަންސްގެ މަޤާމުން ޝިހާން ވަކިކޮށްފި
22 ނޮވެމްބަރު 2018 | ބުރާސްފަތި 15:50ޝިހާން މަޤާމުން ވަކިކޮށްފައިވަނީ ބުރާސްފަތި ދުވަހު
ކޮމިޝަނާ އޮފް ޕްރިސަންސް، އަޙުމަދު ޝިހާން
ކޮމިޝަނާ އޮފް ޕްރިސަންސްގެ މަޤާމުން އަޙުމަދު ޝިހާން ވަކިކުރައްވައިފިއެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު މޯލްޑިވްސް ކަރެކްޝަނަލް ސާރވިސް، އެމްސީއެސްގެ ހިންގެވުމާއި ހަވާލުވެ ހުންނެވި މ. މާޔާ، އަޙުމަދު ޝިހާން އެ މަޤާމުން ވަކިކުރައްވާފައިވަނީ ބުރާސްފަތި ދުވަހުގެ ހަވީރުއެވެ.
ޝިހާން މަޤާމުން ވަކިކުރެއްވިއިރު، ކުރީގެ ރައީސް، ޔާމީން ޢަބްދުލްޤައްޔޫމްގެ ވެރިކަމުގައި ޖަލާއި ހަވާލުވެ ހުންނަވައި ގައިދީންނާއިމެދު ތަފާތުކުރުން ގެންގުޅުމާއި، ގައިދީންނަށް ޖަލުގައި ލިބުނު އެކި އަނިޔާތަކުގެ ޒިންމާ ޝިހާން ނަންގަވަން ޖެހޭނެކަމަށް އެކި ފަރާތްތަކުން ދަނީ ބުނަމުންނެވެ. އަދި ޚާއްސަކޮށް ބައެއް ގައިދީންގެ ބޭސްފަރުވާއަށް ޝިހާން ހުރަސް އަޅާފައިވާ ކަމަށް ގައިދީންގެ އައިލާތަކުން ވަނީ ތުހުމަތު ކޮށްފައެވެ. އެގޮތުން ކުރީގެ ނައިބުރައީސް އަޙުމަދު އަދީބުގެ ބޭސްފަރުވާއަށް ހުރަސް އެޅުމުގައި ޝިހާންގެ ސީދާ ބައިވެރިވުން ވާކަމަށް ގިނަ ފަރާތްތަކަކުން ދަނީ ތުހުމަތު ކުރަމުންނެވެ.
އަދި ހަމަ މިއާއިއެކު ޖަލުގައި ނިސްބަތުން ގިނަ އަދަދެއްގެ ގައިދީން މަރުވެފައިވާއިރު، އެ މަރުތަކަކީވެސް ޝިހާން އާއި ކަރެކްޝަންސްގެ އިސްވެރިންގެ އިހުމާލުން ވީ ކަންކަން ކަމަށް ގިނަ ފަރާތްތަކަކުން ތުހުމަތު ކުރެއެވެ.
