ސިއްދީގަށް ހަމަލާ ދިން ކަމުގެ ތުހުމަތުގައި ހައްޔަރުކުރި ސްމިތު ދޫކޮށްލައިފި
ހައްޔަރު ކޮށްފައި ވަނީ ކްރިމިނަލް ކޯޓުގެ ކުރިމަތިން ސިއްދީގަށް ހަމަލާދިން ކަމުގެ ތުހުމަތުގައި
ސުމިތު އާއި މަހުލޫފް
ރައިސް ޔާމިންގެ ސަރުކާރުގެ ހޯމް މިނިސްޓްރީގައި ޑެޕިއުޓީ މިނިސްޓަރު ކަމުގެ މަގާމު ފުރުއްވި، އަހަމަދު ސިއްދީގަށް ހަމަލާދިން ކަމުގެ ތުހުމަތުގައި ހައްޔަރުކުރި އަލީ ހާޝިމް (ސުމިތު) ދޫކޮށްލައިފިއެވެ.
ސުމިތު ހައްޔަރު ކޮށްފައި ވަނީ ކްރިމިނަލް ކޯޓުގެ ކުރިމަތިން ސިއްދީގަށް ހަމަލާދިން ކަމުގެ ތުހުމަތުގައެވެ. ކޯޓަށް ހާޒިރުކުރުމުން އޭނާގެ ބަންދަށް ވަނީ 7 ދުވަސް ޖަހައިދީފައެވެ.
ސިއްދީގު އަށް ހަމަލާ ދިން ކަމަށް ބުނެ އޭނާ ކުރި ޓްވީޓެއްގައި ބުނެފައި ވަނީ "ޖަޒީރާ ރާއްޖެ" ޖަހާފައިވާ ޓީޝާޓެއް ލައިގެން ހުރި މީހަކު ކްރިމިނަލް ކޯޓު ކުރިމަތިން އޭނާ އަށް އިއްޔެ ހަމަލާދީ ގައިން ލޭ ދުއްވާލާފައިވާ ކަމަށެވެ. އަދިވެސް އިތުރަށް ހަމަލާދޭނެ ކަމަށް ބުނެ ފުލުހުންގެ ކުރިމަތީގައި ވެސް އޭނާ އަށް އިންޒާރު ދީފައިވާ ކަމަށް ސިއްދީގު ވަނީ ވިދާޅުވެފައެވެ.
ފުލުހުންގެ ބަންދުން ސްމިތު ދޫކޮށްލި އިރު، އޭނާ މިނިވަން ކުރަން ގޮވާލާ މުޒާހަރާ އެއް ވެސް ވަނީ ކުރިއަށް ގެންގޮސްފައެވެ. މީސް މީޑިއާގައި ވެސް އެތައް ބަޔަކު ދިޔައީ އޭނަ ދޫކޮށްލަން ގޮވާލަމުންނެވެ. އަދި މި ސަރުކާރުގައި އިސްދައުރެއް އަދާ ކުރަމުންދާ ބައެއް ބޭފުޅުން ވެސް ވަނީ އޭނަ ވަގުތުން ވަގުތަށް ދޫކޮއްލަން ޖެހޭ ކަމަށް ގޮވާލާފައެވެ. އޭގެ ތެރޭގައި ރައީސް ނަޝީދު އާއި މިނިސްޓަރު މަހުލޫފު އަދި މަޖިލިސް މެންބަރު އީވާ ވެސް ހިމެނެއެވެ.
