ބޯހިޔާވަހިކަމަކީ ޝަރީއަތަށް ގޮސްގެން ހޯދަން ޖެހޭ އެއްޗެއް ނޫން ކަމަށާއި ބޯހިޔާވަހިކަމަކީ ގާނޫނު އަސާސީއިން އެކަމަށް ބޭނުން ވެފައިވާ ކޮންމެ ރައްޔިތަކަށް އެއިރެއްގައި އޮންނަ ސަރުކާރަކުން ފޯރުކޮށްދޭން ޖެހޭ އަސާސީ ޚިދުމަތެއްކަމަށް މާލޭ ސިޓީގެ ޑެޕިއުޓީ މޭޔަރ ޝަމާއު ޝަރީފް ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީގައި ބުދަ ދުވަހުގެ ރޭ ވާހަކަ ދައްކަވަމުން ޝަމާއު ވިދާޅުވީ ބޭ އިންސާފުން ބޯހިޔާވަހިކަން ނުލިބި ތިބި ހުރިހާ ފަރާތްތަކަކަށް ރައީސް އިބްރާހިމް މުހައްމަދު ސޯލިހްގެ ވެރިކަމުގައި ބޯހިޔާވަހިކަން ލިބޭނެކަމުގެ އުއްމީދު ބޮޑު ކަމަށާއި އެގޮތުން ރައީސް ސޯލިހްގެ ވެރިކަމުގައި ރައްޔިތުންނާއި ގުޅިފައިވާ މިފަދަ ބޮޑެތި ކަންތައްތައް ނިމިގެންދާނީ އަނދިރި ކޮޓަރިއެއްގައި ފިލާތިބެ މާކްސް ދޭ އުސޫލުން ނޫންކަމަށެވެ. އޭގެ ބަދަލުގައި ވީހާ ވެސް ހާމަކަން ބޮޑު އަދި ދެފުށް ފެންނަ ގޮތަކަށް ކަމަށެވެ. ކުރީގެ ހައުސިން މިނިސްޓަރ ޑރ. މުހައްމަދު މުއިއްޒު ކުރެއްވި ހާ ވެސް ކަމަކީ އެހެންބަޔަކު ކޮށްފައިވާ ކަމެއްގެ ފާއިދާ ނެގުން ކަމަށްވެސް ޝަމާއު ވިދާޅުވިއެވެ.
އިތުރަށް ޝަމާއު ވިދަޅުވީ ރައްޔިތުންނަށް ވަންހަނާކޮށް ފޮރުވަންޖެހޭ ކަމެއް ސަރުކާރެއްގައި ނޯންނާނެ ކަމަށާއި ދައުލަތުގެ މަގާމުތަކުގައި ތިއްބަވާ ފަރާތްތަކަށް ސަރުކާރުން ދޭ މުސާރައަކީ ރައްޔިތުން ދޭ އެއްޗެއް ކަމަށް ވާއިރު އެ ދައުލަތަކުން ރައްޔިތުންނަށް ޓަކައި ކޮށްދޭން ޖޭހެ ޚިދުމަތެއް އަދި އެހެން ކަމެއްވިޔަސް އެކަމެއްގެ ދެފުން ފެންނަން ޖެހޭނެ ކަމަށެވެ.
އެގޮތުން ކުރީގެ ރައީސް މުހައްމަދު ނަޝީދުގެ ސަރުކާރުން ހަފްތާއަކު އެއްފަހަރު މީޑިޔާ އާއި ބައްދަލްކޮށް އެފަދަ ކަންކަން ރައްޔިތުންނަށް ހާމަކޮށްދެމުން ދާކަމަށާއި އިބްރާހިމް މުހައްމަދު ސޯލިހުގެ ސަރުކާރުން ވެސް ކަންތައްތައް ކުރައްވާނީ ހާމަކަމާއި އެކު ދެފުށް ފެންނަ ގޮތަށްކަމަށެވެ.
"ވޭތުވެ ދިޔަ ހަތް އަހަރު އަޅުގަނޑުމެންނަށް ރަސްމީ ހައިސިއްޔަތަކުން އެއްވެސް އިރެއްގައި ހައުސިންގ މިނިސްޓަރާއި ބަދަލު ވެފައެއް ނެތް. އެހެން ނަމަވެސް އަޅުގަނޑު ހަމަ އުފަލާއި އެކު ފާހަގަ ކޮށްލަން މިސަރުކާރު އަދި ހިނގައިގަތް ތާ ދެތިން ދުވަސްނުވެ ހައުސިން މިނިސްޓަރާއި ސިޓީ ކައުންސިލްގެ މޭޔަރާއި ވެސް ބައްދަލުވި. އަދި އަޅުގަނޑުމެންނާއި އެކު ބައިވަރު ބައްދަލުވުން ތައް ކުރިއަށް ރޭވިފައި ވެސް އެބަހުރި އެހެންވީ މާ ވަރަށްބޮޑު ކުރިއެރުމެއް ކަމަށް އަޅުގަނޑު ގަބޫލުކުރަން،" ޝަމާއު ވިދާޅުވިއެވެ.
ރައީސް އަބްދުﷲ ޔާމީންގެ ސަރުކާރުގައި ރައްޔިތުންގެ ހިތުގައި ނަފްރަތާއި ބިރުވެރިކަމާއި ޝައްކާއި ވަހުމް އުފެއްދުން ނޫންކަމެއް ކުރައްވާފައި ނުވާކަމަށް ތުހުމަތުކުރައްވައި ޝަމާއު ވިދާޅުވީ މިސަރުކާރުން އެފަދަ އެއްވެސް ކަމަކަށް ޖާގަ ނު ދޭނެކަމަށެވެ. އަދި ވޭތުވެ ދިޔަ ސަރުކާރުން ރަނގަޅަށް ކަމެއް ކޮށްފައިވާ ކަން ގަބޫލުފުޅު ނުކުރެއްވޭ ކަމަށާއި ނަމަވެސް ހެދިފައިވާ ގާނޫނު ތަކާއި ގާވާއިދުތަކާއި ޚިލާފަށް ކޮށްފައިވާ ހުރިހާ ކަމެއް ބެލުމަކީ ރައީސް ސޯލިހުގެ ސަރުކާރުގެ ޒިއްމާ އެއް ކަމަށް ދެކެވަޑައި ގަންނަވާކަމަށް ވެސް ޝަމާއު ވިދާޅުވިއެވެ.
