ޖުމްހޫރީ ޕާޓީއަށް މެމްބަރު އިލްހާމާއި ހުސެއިން ސޮއިކުރައްވައިފި
22 ނޮވެމްބަރު 2018 | ބުރާސްފަތި 14:06ގާސިމްގެ ޕޮލިޓިކަލް އެޑްވައިޒަރެއްގެ މަގާމަށް އިލްހާމް ވަނީ އައްޔަންކުރައްވާފައި
ޖެޕީއަށް މެމްމަބަރު އިލްހާމްއާއި ހުސައިން ގުޅިވަޑައިގަތުން ފާހަގަކުރުމަށް ބޭއްވި ރަސްމިއްޔާތުގެ ތެރެއިން
ދަނގެތީ ދާއިރާގެ މެމްބަރު އިލްހާމް އަހުމަދާއި، ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފު ޖުމްހުރީ ޕާޓީއަށް ސޮއިކުރައްވައިފިއެވެ.
މި ދެ މެމްބަރުން ޖޭޕީއަށް ސޮއިކުރައްވާފައި ވަނީ މ. ކުނޫޒުގައި މިކަމަށްޓަކައި ބޭއްވި ޚާއްސަ ރަސްމިއްޔާތެއްގައެވެ. މި ދެ މެމްބަރުން ސޮއިކުރެއްވި ފޯމާއި ހަވާލުވެ ވަޑައިގެންނެވީ ޖުމުހޫރީ ޕާޓީގެ ލީޑަރު ގާސިމް އިބްރާހިމް އެވެ. އިލްހާމް ޖޭޕީ އަށް ސޮއި ކުރެއްވުމުން ގާސިމްގެ ޕޮލިޓިކަލް އެޑްވައިޒަރެއްގެ މަގާމު އޭނާ އަށް ވަނީ ދެއްވާފައެވެ. މެމްބަރު އިލްހާމް ރައްޔިތުންގެ މަޖިލީހަށް 2014 ވަނަ އަހަރު އިންތިހާބުވެ ވަޑައިގެންނެީ ޖޭޕީގެ ޓިކެޓުގައި އެވެ.
ޖޭޕީއަށް ސޮއިކުރެއްވުމަށްފަހު ނޫސްވެރިންނަށް މައުލޫމާތުދެއްވަމުން އިލްހާމް ވިދާޅުވީ ޖުމްހޫރީ ޕާޓީގެ ލީޑަރު ގާސިމް އިބްރާހިމް ރާއްޖޭގެ ރައީސުލްޖުމްހޫރިއްޔާ ކަމަށް ގެނައުމަށް ކުރަންޖެހޭ މަސައްކަތް ކުރައްވާނެ ކަމަށެވެ.
އިލްހާމްގެ އިތުރުން ޖުމްހޫރީ ޕާޓީއަށް ސޮއިކުރެއްވި މެމްބަރު ހުސެއިން މުހައްމަދު ލަތީފަކީ، ރައީސް އަބްދުﷲ ޔާމީންގެ ވަރަށް އަރިސް ބޭފުޅެއްގެ ގޮތުގައި މަސައްކަތް ކުރެއްވި ބޭފުޅެކެވެ. އަދި ރައީސް އަބްދުﷲ ޔާމީން އެންމެ އިތުބާރުކުރައްވާ ބޭފުޅުންގެ ތެރޭގައި މެމްބަރު ހުސެއިން މުހައްމަދު ލަތީފް ހިމެނިވަޑައިގަންނަވަ އެވެ.
ސޮއިކުރެއްވުމުގެ ރަސްމިއްޔާތުގައި ވާހަކަ ދައްކަވަމުން ހުސެއިން މުހައްމަދު ވިދާޅުވީ އޭނާ އަބަދު ވެސް މަސައްކަތް ކުރައްވަނީ ދާއިރާގެ ރައްޔިތުންގެ އަޑު އެއްސެވުމަށްފަހުގައި ކަމަށެވެ. އަދި ރައީސް ޔާމީނާއެކު އެންމެ ފަހުވަގުތާ ހަމައަށް ވެސް މަސައްކަތްކުރެއްވިކަން އޭނާ ފާހަގަކުރެއްވި އެވެ.
މިއަހަރު ބޭއްވި ރިޔާސީ އިންތީޚާބުގައި ރައީސް ޔާމީން ބޮޑުތަނުން ބަލިވުމާއި ގުޅިގެން އެމަނިކުފާނުގެ އަރިހުގައި މަސައްކަތް ކުރެއްވި ގިނަ ބޭފުޅުން އަންނަނީ ޖުމްހޫރީ ޕާޓީއާ ގުޅިވަޑައިގަންނަވަމުންނެވެ.
