ފަސް އޮފީހެއްގެ ބަޖެޓް ބޮޑުކޮށްދޭން އެދެފި
މިހާރު ކަނޑައަޅާފައިވާ ބަޖެޓް ކުޑަ ކަމަށް ބުނި
ރައްޔިތުންގެ މަޖިލީހުގެ ބަޖެޓް ކޮމެޓީ:-މި ކޮމެޓީއަށް 5 މުވައްސަސާއެއްް ހާޒިރުކޮށްފައިވޭ
އަންނަ އަހަރުގެ ބަޖެޓު ދިނުމަށް ކަނޑައަޅާފައިވާ ފައިސާގެ އަދަދު މަދުވާނެ ކަމަށް ބުނި ފަސް މުއައްސަސާ އެއް ބަޖެޓް ދިރާސާ ކުރަމުންދާ ކޮމެޓީ އަށް ހާޒިރުކޮށް ސުވާލުކޮށްފި އެވެ.
އަންގާރަ ދުވަހުގެ ރޭ މަޖިލީހުގެ ބަޖެޓް ކޮމެޓީ އަށް ހާޒިރުކޮށްފައި ވަނީ އިލެކްޝަންސް ކޮމިޝަނާއި އިސްލާމިކް ޔުނިވަސިޓީ އާއި ސިވިލް ސާވީސް ކޮމިޝަނާއި ގައުމީ ޔުނިވަރސިޓީގެ އިތުރުން ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަނެވެ. މި ތަންތަނުން ވަޑައިގެންނެވި ބޭފުޅުންނާއި ބަޖެޓް ކޮމެޓީގެ މެމްބަރުން ވަނީ އިތުރަށް ފައިސާ ބޭނުންވާ ސަބަބުތަކާ ގުޅޭ ގޮތުން ސުވާލު ކުރައްވާފައި އެވެ. އަދި އެ ބޭފުޅުން ވަނީ އޭގެ ސަބަބުތައް އޮޅުންފިލުވާ ދެއްވާފައި އެވެ.
އިލެކްޝަންސް ކޮމިޝަނުން ބުނީ ފިނޭންސް މިނިސްޓްރީން މަޖިލީހަށް ފޮނުވި އަންނަ އަހަރަށް ލަފާކުރާ ބަޖެޓްގައި އެ ކޮމިޝަނަށް ދިނުމަށް ކަނޑައަޅާފައިވާ ފައިސާގެ އިތުރަށް 9.2 މިލިއަން ބޭނުންވާ ކަމަށެވެ. މިހާރު މަޖިލީހަށް ފޮނުވާފައިވާ ބަޖެޓްގައި އިލެކްޝަންސް ކޮމިޝަނަށް ދޫކުރަން ކަނޑައަޅާފައި ވަނީ 105 މިލިއަން ރުފިޔާ އެވެ.
އަންނަ އަހަރުގެ ބަޖެޓަށް ފައިސާ އިތުރަށް ބޭނުންވާ ސަބަބުތަކުގެ ތެރޭގައި އަންނަ އަހަރު ބާއްވާ ރައްޔިތުންގެ މަޖިލިސް އިންތިހާބުގައި ދެ ދާއިރާ އިތުރުވެގެން ދިއުމާއި އެ އިންތިހާބުގައި ކޮންމެ 700 މީހަކަށް ވޯޓު ފޮއްޓެއް ބެހެއްޓުމަށް ނިންމާފައިވުމާއި އިންތިހާބާ ބެހޭ މަރުކަޒުގެ ސެކިއުރިޓީ އިތުރު ކުރަން ނިންމުން ހިމެނެ އެވެ. އެހެންމެ ވަގުތީ މުވައްޒަފުން މަދުކޮށް 14 ވަޒީފާ އެއް އަލަށް އުފެއްދުމާއި ލީގަލް ކޮންސަލްޓަންޓެއް ހޯދުން ފަދަ ކަންކަން ހިމެނެ އެވެ.
އިލެކްޝަންސް ކޮމިޝަނުން ބަޖެޓް އިތުރުކޮށް ދޭން އެދޭ ސަބަބުތަކާ މެދު ބައެއް މެމްބަރުން ވަނީ އެނޫން ގޮތަކަށް އެ ހަރަދުތައް ކުރެވޭނެ ގޮތެއް ނޯންނާނެތޯ އާއި އަދި އިލެކްޝަނުން އެދިފައިވާ މިންވަރު މަދު ނުކުރެވޭނެތޯ ސުވާލު އުފައްދަވާފައި އެވެ.
ސިވިލް ސާވީސް ކޮމިޝަނުން ބުނީ އެ ކޮމިޝަނަށް އަންނަ އަހަރު ދިނުމަށް ކަނޑައަޅާފައި ވަނީ 21.7 މިލިއަން ރުފިޔާ ކަމަށާއި އެ އަދަދަކީ ހަމަ އެކަނި މުސާރަ އަށް ބޭނުންވާ ވަރު ކަމަށެވެ. މިހާރު ބަޖެޓްގައި ޖަހާފައިވާ އެ އަދަދަށް ފައިސާ ދޫކޮށްގެން ކޮމިޝަނުގެ މައްޗަށް މަތިކޮށްފައިވާ ގާނޫނީ ވާޖިބު އަދާ ނުކުރެވޭނެ ކަމަށް ބުނެ އެ ކޮމިޝަނުން ވެސް ވަނީ ގިނަ ސަބަބުތަކެއް ދައްކާފައި އެވެ. އެ ކޮމިޝަނުން ބުނީ މިއަހަރުގެ ބަޖެޓަށް ކަނޑައެޅި ފައިސާ އިން ވެސް ނުވެގެން މިއަހަރު ފިނޭންސްގައި އެދިގެން ފައިސާ ހޯދި ކަމަށެވެ.
އިސްލާމިކް ޔުނިވަރސިޓީން ވެސް ވަނީ ބަޖެޓުގައި ކަނޑައަޅާފައިވާ ފައިސާގެ އަދަދާމެދު ހިތްހަމަ ނުޖެހޭތީ އެކަމާމެދު ގިނަ ޝަކުވާތަކެއް ކޮށްފައި އެވެ. އަންނަ އަހަރުގެ ބަޖެޓްގައި ކަނޑައަޅާފައިވާ މިންވަރަށް ވުރެ 40 މިލިއަން އިތުރަށް ބޭނުންވާ ކަމަށް އެ ޔުނިވަރސިޓީން ވަނީ ކޮމެޓީގައި ބުނެފައި އެވެ. ފައިސާ އިތުރުކޮށްދޭން އެދުނު ސަބަބުތަކުގެ ތެރޭގައި އިސްލާމިކް ޔުނިވަރސިޓީގެ ލިފްޓް ހަލާކުވެފައި އޮތުން ފާހަގަ ކުރި އެވެ. ނަމަވެސް އެ ޔުނިވަރސިޓީން ފައިސާ ދޭން އެދިފައިވާ އަދަދާ ގުޅޭ ގޮތުން މެމްބަރުން ކަންބޮޑުވުން ފާޅުކުރި އެވެ. އަދި ބައެއް ކަންކަމަށް ފައިސާ އިތުރުކޮށްދޭން އެދުނު ސަބަބު ސާފުނުވާކަން ވެސް މެމްބަރުން ފާހަގަ ކުރެއްވި އެވެ. އިސްލާމިކް ޔުނިވަރސިޓީން ވަނީ އެ ޔުނިވަރސިޓީގައި ސެކިއުރިޓީ ސިސްޓަމާއި ފަޔަރ ސިސްޓަމެއް ގާއިމު ކުރުމަށް ވެސް އިތުރަށް ފައިސާ ބޭނުންވާ ކަން ފާހަގަކޮށްފަ އެވެ.
ގައުމީ ޔުނިވަރސިޓީން ވެސް ބަޖެޓްގައި މިހާރު ޖަހާފައިވާ ފައިސާގެ މިންވަރާމެދު ހިތްހަމަ ނުޖެހޭއިރު އެ ޔުނިވަރސިޓީން ވެސް ވަނީ 50 މިލިއަން އިތުރަށް ބޭނުންވާ ކަމަށް ފާހަގަ ކުރައްވާފައި އެވެ. މިހާރު ބަޖެޓްގައި އޮތީ 192 މިލިއަން އެ ޔުނިވަރސިޓީ އަށް ދިނުމަށެވެ. މި ގޮތުން އަންނަ އަހަރު ޑިގްރީއަށް ކިޔަވާދިނުން ހިލޭ ހަމަ ޖައްސާދޭތީ މީގެ ކުރިން އެ ކޯސްތަކަށް ނަގަމުންއައި ފީ އަންނަ އަހަރުން ފެށިގެން ލިބެމުންނުދާނެތީ އޭގެ ދަތިތައް ކުރިމަތިވާނެކަން އެ ޔުނިވަރސިޓީން ފާހަގަ ކުރި އެވެ. އަދި އަންނަ އަހަރު މެޑިކަލް ސްކޫލެއް ގާއިމު ކުރަން ޖެހުމަކީ ވެސް އިތުރަށް ފައިސާ ބޭނުންވާ ސަބަބެއް ކަމަށް ފާހަގަ ކުރެއްވި އެވެ.
ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަނަށް ކަނޑައަޅާފައިވާ ބަޖެޓަށް 87 މިލިއަން އިތުރުކޮށްދޭން އެދި އެ ޑިޕާޓްމަންޓުން ކޮމެޓީގައި ބުނީ، ބަޖެޓް އިތުރުކުރަން އެންމެ ބޮޑަށް ބޭނުންވާ އެއް ސަބަބަކީ 15 ފަނޑިޔާރުން މިއަހަރު އިތުރުވެގެންދިއުމެވެ. ކޯޓުތައް މަރާމާތުކުރުމަށާއި ފަނޑިޔާރުންގެ ފެންވަރު ރަނގަޅުކުރުމަށް ވެސް އިތުރަށް ފައިސާ ބޭނުންވާކަން ފާހަގަ ކުރި އެވެ. ނަމަވެސް ބަޖެޓް ކޮމެޓީގެ ކަންބޮޑުވުމަކަށްވީ ރައްޔިތުންނަށް ބޭނުންވާ އަދުލު އިންސާފު ގާއިމު ކުރެވިގެން ނުދިއުމެވެ. އަދި އެ ބަޖެޓް ދީފިނަމަ އަދުލު އިންސާފު ގާއިމު ވެގެންދާނެތޯ މެމްބަރުން ސުވާލު އުފެއްދި އެވެ.
ބަޖެޓް ދިރާސާ ކުރަމުންދާއިރު މިތަންތަންނަށް އިތުރަށް ފައިސާ ދިނުމާމެދު ކޮމެޓީން އަދި ގޮތެއް ނިންމާނެ އެވެ.
