ނުހައްގު މުއްސަނދިވުން ހުއްޓުވުމަށް ގާނޫނެއް މަޖިލީހަށް ހުށަހަޅަނީ

ނުހައްގުން މުއްސަނދިވުން ހުއްޓުވުމަށް ގާނޫނެއް ފާސްކުރަން ރައްޔިތުންގެ މަޖިލީހަށް ހުށައަޅަން ސަރުކާރުން ނިންމައިފި އެވެ. މިކަން ކުރުމަށް ނިންމާފައި ވަނީ ރައީސް އިބްރާހިމް މުހައްމަދު ސޯލިހްގެ ސަރުކާރުގެ ފުރަތަމަ 100 ދުވަހުގެ ތެރޭގައި އެވެ.

ނުހައްގު މުއްސަނދިކަން ހުއްޓުވުމަށް ގާނޫނެއް މަޖިލީހަށް ހުށައަޅަން ސަރުކާރުން ނިންމާފައިވާ ކަން ހާމަކޮށްފައި ވަނީ ސަރުކާރުގެ ފުރަތަމަ 100 ދުވަހުގެ ތެރޭގައި ކޮރަޕްޝަން ހުއްޓުވުމަށް އަޅާ ފިޔަވަޅުތަކުގެ ތެރޭގައި އެވެ. ރާއްޖޭގައި ސިޔާސީ މަގާމުތަކުގައި ތިބޭ ފަރާތްތަކާއި ދައުލަތުގެ މަގާމުތަކުގައި ތިބޭ ފަރާތްތަކުގެ މައްޗަށް ކޮރަޕްޝަނުގެ ބޮޑެތި ތުހްމަތުތައް ކުރެވުނު ނަމަވެސް އެމީހުންގެ މާލީ ހާލަތު ދެނެގަނެވޭނެ ގާނޫނެއް ނެތެވެ. އަދި އެހެންމެ ފުރަތަމަ 100 ދުވަހުގެ ތެރޭގައި ސަރުކާރުގެ އިދާރާތަކާއި ދައުލަތުގެ ކުންފުނިތަކަށާއި، މިނިވަން މުވައްސަސާތަކަށް އައްޔަންކުރާ ހުރިހާ މުއައްޒަފުންނާއި އެމީހުން އިނދެގެން އުޅޭ މީހުންގެ މުދަލާއި މާލީ ބަޔާން ގަވައިދުން ހާމަކުރަން ވެސް ސަރުކާރުން ވަނީ ނިންމާފަ އެވެ.

ކޮރަޕްޝަން ހުއްޓުވުމަށް ކުރާ ކަންކަންމުގެ ތެރޭގައި ބިދޭސީންނަށް ކޯޓާ ދޫކުރުމާއި އެމީހުންނާ ގުޅޭ ކަންކަމުގައި ރިޝްވަތު ނެގުން ހުއްޓުވުމަށް އަޅަން ޖެހޭ ފިޔަވަޅުތައް ވެސް 100 ދުވަހުގެ ތެރޭގައި އަޅަން ފަށަން ވަނީ ނިންމާފަ އެވެ.

ސަރުކާރުގެ ފުރަތަމަ 100 ދުވަހުގެ ތެރޭގައި ވިސްލް ބްލޮވިންގް ޤާނޫނު ރައްޔިތުންގެ މަޖިލިހަށް ފޮނުވުމަށް ވެސް ނިންމާފައިވާ ކަމަށް ސަރުކާރުން ވަނީ ހާމަކޮށްފަ އެވެ.

މީގެ އިތުރުން ވެސް އާންމުންނަށް ޚިޔާލު ހުށައެޅުމާއި ކޮރަޕްޝަނާ ގުޅޭ މައްސަލަތައް ފަސޭހަ އިން ހުށަހެޅޭނެ ޕްލެޓްފޯމެއް ޤާއިމްކުރުމަށާއި ޒީރޯ ޓޮލެރެންސް ޓު ކޮރަޕްޝަން ކެމްޕެއިން ފެށުމަށް ސަރުކާރުން ނިންމާފައި ވަނީ ވެސް ސަރުކާރުގެ ފުރަތަމަ 100 ދުވަހުގެ ތެރޭގައި އެވެ.

• ބިދޭސީންނަށް ކޯޓާ ދޫކުރުމާއި އެ މީހުންނާ ގުޅޭ ކަންކަމުގައި ރިޝްވަތު ނެގުން ހުއްޓުމަކަށް ގެނައުމަށްޓަކައި އަޅަންޖެހޭ ފިޔަވަޅުތައް އެޅެންފެށޭނެ
• ވިސްލް ބްލޮވިންގް ޤާނޫނު ރައްޔިތުންގެ މަޖިލިހަށް ފޮނުވޭނެ
• ދައުލަތުގެ މުދަލާއި ފައިސާ އަށް ވެފައިވާ ހިޔާނާތާއި މަނީ ލޯންޑަރނިގް މައްސަލަތައް ބެލުމަށް ކޮމިޓީ އެއް އުފައްދާ އެކަން ހޯދާ ބަލަން ފެށުން
• ނުހައްގު މުއްސަނދިވުން ހުއްޓުވުމަށް ޤާނޫނެއް މަޖިލިހަށް ހުށައެޅޭނެ
• ސަރުކާރުގެ އިދާރާތަކާއި ދައުލަތުގެ ކުންފުނިތަކަށް މިނިވަން މުއައްސަސާތަކަށް އައްޔަންކުރާ ހުރިހާ މިހުންނާއި، އެމީހުންގެ އަނބިން/ފިރިންގެ މުދަލާއި މާލީ ބަޔާން ހާމަކުރެވޭނެ އަދި ގަވައިދުން ރިވިއުކުރެވޭނެ
• އާންމުންނަށް ޚިޔާލުހުށައެޅުމާއި ކޮރަޕްޝަނާ ގުޅޭ މައްސަލަތައް ފަސޭހަ އިން ހުށަހެޅޭނެ ޕްލެޓްފޯމެއް ޤާއިމްކުރެވޭނެ
• ޒީރޯ ޓޮލެރެންސް ޓު ކޮރަޕްޝަން ކެމްޕެއިން ފެށޭނެ
• މިނިވަން މުއައްސަސާތައް މިނިވަން ކަމާއެކު ހިންގޭނެ ގޮތަށް ޤާނުނުތައް އިސްލާޙްކުރަން މަޖިލިހަށް ހުށައެޅޭނެ
• ހުރިހާ އިންތިޚާބީ އަދި އައްޔަންކުރެވޭ މަގާމުތަކަށް ވަޑައިގަންނަވާ ފަރާތްތަކަށް އެންޓިކަރަޕްޝަން އަދި ގުޑް ގަވަރނެންސް އާގުޅޭ ޕްރޮގްރާމެއް ހިންގޭނެ
• ރިޝްވަތު ހިފާ މީހާ އާއި އެއްވަރަށް ރިޝްވަތުދޭ މީހާ ވެސް ކުށްވެރިވާގޮތަށް އެންޓިކޮރަޕްޝަން ޤާނޫނަށް ބަދަލު ގެނެވޭނެ

މިނިވަން މުއައްސަސާތައް މިނިވަން ކަމާއެކު ހިންގޭނެ ގޮތަށް ޤާނުނުތައް އިސްލާޙްކުރަން މަޖިލިހަށް ހުށައެޅުމާއި އިންތިޚާބީ އަދި އައްޔަންކުރެވޭ ހުރިހާ މަގާމުތަކަށް ވަޑައިގަންނަވާ ފަރާތްތަކަށް އެންޓިކަރަޕްޝަން އަދި ގުޑް ގަވަރނެންސް އާގުޅޭ ޕްރޮގްރާމުތައް ވެސް ހިންގަން ވަނީ ހަމަ ޖައްސާފައި އެވެ. ރާއްޖޭގައި ކޮރަޕްޝަނާ ދެކޮޅަށް މަސައްކަތް ކުރުމަށް ސަރުކާރުން އިސްނަގައިގެން މިހާތަނަށް އެފަދަ މަސައްކަތްތަކެއް ކޮށްފައިނުވެ އެވެ. އަދި ކޮރަޕްޝަން ހުއްޓުވުމުގެ މަގުސަދުގައި ވަކި ވަކިން ހާއްސަ ގާނޫނުތަކެއް ހަދާފައިނުވެ އެވެ.